بسم الله الرحمن الرحيم
كيف حالكن خواتي؟؟؟
ادري الموضوع يضحك
بس صدق تراها مشكلة…
بدخل بالموضوع
ابوي الله يبارك فيه اسمر و شعره غليظ و اجعد
و امي الله يخليها بيضا حلوة و شعرها اسود و ناعم ماشاء الله عليه
حتى ابوي حليو بس المشكلة بالشعر
و انا بنتهم المصونه ماخذة بياض امي و شعر ابوي
اللهم لا اعتراض
والله تعبت من شعري انتو اكيد تعرفون كيف شعر السمر
ما ينطرى ابدا
فظيييييييييييييييييييييييييييييييييييع
شعري اجعد وايد وايد و ما يطول الا كل سنتين ملي واحد
لما استخدم التمليس يتم كمين شهر و بعدين ترجع القفة
استشوره و يستوي حلو و يسيح ع الكتف و اترسه زيت عشان يلمع و ما يخترب
بس من يجيسه شويت ماي ينكمش
الله لا يراويكم
و الله احيانا اقفط قدام ريلي
بس هو ولامرة قالي شي
و دايما يقول لي انا ما يهمني شكلج اهم شاي قلبج عشان كذه كان الموضوع عادي
بس من ربيت صار اللي حرق قلبي من الاحراج
قال لي: و انتي رايحة غرفة الولادة كان شعرج فظيع
بحكي لكم موقف واحد
من كثر الصريخ و الترفيس و التعب و انا رايحه اولد
قفط شهري على فوق
والله ما تصدقون كيف كان شكلي
ولا شعره على رقبتي
كله فوق كنه طربوش و لا تاج
والله انحرجت مع اني كنت تعبانه و لا لي بارض
و اقول لريلي روح البيت ييب لي لاستيك و لا شي هالمواقف ما ينفع فيها المشبك
حتى الشمد كنت اربطه ع راسي عشان ينزِّل القفة و ما شي فايد
… خوال اصليين …
انتهى الموقف
و فيه مواقف وايدة
في الدوام ربيعاتي ما شاء الله عليهم ما بحسدهم
كلهم شعرهم ناعم و روعة
الله يبارك لهم فيه
وايد كنت انحرج لما يتكلمن عن الصبغات و التسريحات و يسألوني …
بس بعدين قلت ليش اتبرا من اصلي
هذا شعري و ما عليي من حد
و الله ما اعرف شو اسوي
اللي عندها خلطات للخوال تنعم الشعر تعطيني
اهم شي يكون خاص بالقفه بعد مو بالشعر المجعد بس
صار موقف يضحك
مرة وحدة قالت لي بقص شعرج وايد متقصف
عاد ان ذاك اليوم مستشورتنه و مخلتنه مثل الحرير عشان ما انحرج
الحبيبة هدت شعري و حطت عليه ماي اونه عشان تقصه عدل
….
والله
الله لا يراويكم
شعري من شاف الماي …
انتهى مفعول الاستشوار و قفط على فوق
الحرمة قامت تضحك و قصته عقب و من هذاك اليوم للحين ما طول…
ادري يمكن الموضوع عادي بالنسبة لبعضكن
بس بالنسبة لي موهيم وااااااااااااااااااايد
اللي تعرف تلميس دايم و زين تخبرني
على فكرة يوم عرسي سويت تلميس دايم وكان وايد حلو
و الصالون اللي سويت عندهم قالولي لا تستخدمي الشامبو كله بلسم
بس البلسم ما ينظف زين
و شعري وخم و طلعت منه ريحه ،
فقمت استخدم الشامبو مرة بالاسبوع بس عشان الريحة
و منها بدا يخف مفعول التلميس و رجعت حليمة لعادتها القديمة…
ساعدوني
اللي عندهم دوا زين لهالنوع من الشعر لا تبخل علينا
و اتمنى ما حد يفهمني غلط
خاصة الخوال
ادري بنا احنا وايد حساسين