التصنيف: مشكلتي – لكل مشكلة حل

مشكلتي – لكل مشكلة حل

كيف اغير تصرفات خطيبي

صبحكن الله بالخير ✋🏼
انا ملجت من شهر وربي تمم اموري الحمدلله على خير ،،، لكن المشكله اني مب قادرة افهمه عدل يعني احس انه طيب وحنون الله يخليه 😹 ههههههه ،، لكن يلين الحين ماعرفت كيف اتخبره عن شخصيته يعني اللي عندها تجارب تخبرني .
انا ما ارمسه ع الفون واايد كل واحد يستحي من الثاني ،،يعني طول اليوم ع الواتساب بس ابا جي حركات عسب اعرف اهو شو يحب وكيف يحب شريكة حياته يعني مابي اكون ممله 😫 مشكلتي انا وايد استحي حتى يوم يَا لبيت ما رضيت ايلس وياه ..

ساعدني الله يخليكن وايسر اموركن

تمت الموافقه

عادي اسأليه انت شو تحب
كلمني عن نفسك أكثر
عن أطباعك
وحاولوا تكسرون الخجل شوي

حبيبتي عادي
انتي مع الايام راح تعرفين عن اطباعه اكثر

مثلا لو تطلعون ويا بعض او تيلسون تسولفون ويا بعض عن امور الحياة وتجاربكم
او لما تشوفين تعامله ويا الناس
هني راح تعرفين اكثر عن اطباعه وشخصيته
وعموما ماراح تعرفين ريلج عدل الا عقب الزواج والعشره

اختي من كلامج المشكلة فيج انتي مب فيه هو وانتي اللي لازم تتغيرين شوي وتبدين تكسرين الخجل
عادي سئليه عن اللي تبينه قوليله أبا اعرف شخصيتك اكثر, يمكن هو ما يرمس وايد وياج ويسألج لأنه مثلا يخاف يحرجج أو ما يلقى منج إجابة فاكسري انتي هالشي وابدي بالسؤال.

والله يوفقكم

عادي

بالعكس حلو المستحى الحين

بتذكرون هالايااام عقب وتضحكون على بعض

يمكن الريال عايبنه انج ثقيله

يمكن الريال يبا كل شي عقب الزواج

يمكن الريال يفكر اذا قال شي او سأل شي هالشي يضايقج

ف انتي ابدئي بالاسئله الخفيفه

خليج بشوشه

وفي واااايد اشياء بس اقول لو تأجلينها عقب العرس احسن واحلا

بالتوفيق

الله يسعدج

ازمة حياتي طباخة

أحس فيني غبنة وصيحة .. موضوعي سخيف في نظر البعض كبري في نظري لأنه مسبب لي أزمة ..

أنا موظفة من يوم صغيرة وتقريبا باقي لي 3 سنين للتقاعد ابو 20 سنة خدمة

عرست من 5 سنين وربي رزقني بنتين وحامل

ريلي مطلق وعنده ولدين عايشين معاي ..

اموري طيبة مع العيال ومشكلتي موب معاهم

أنا وريلي بينا انسجام وتفاهم ولله الحمد ..

مشكلتي الحقيقية الحين في اني موب محصلة طباخة تطبخ للعيال ,.. أنا موظفة وما اروم اجهز لهم غدا .. بناتي واولاد ريلي متبهذلين .. وكل ما يبت خدامة وعلمتها طلعت فيها علة ورديتها ..

يبت فلبينية وكانت زينة تمت سنتين وسافرت وقالت خلاص ما ابا ارد بنيت بيت وخلاص ..

يبت سيلانية كانت زينة وتطبخ طبخ عادي بس نفسها في الاكل موب لذيذ ما يبون ياكلون من طباخها

يبت اثيوبية ما تعرف تطبخ مول وتصبرت بس لان ما عندي حد يغسل

كل ما يبت طباخة تطلع ما تعرف ابد .. موب ان تعرف وبعلمها زيادة لا ما تعرف ومهما احاول اعلم تتعلم شيء تضبطه يوم و 10 لا ..

الوحيدة اللي تعلمت الطباخ الفلبينية ..

الاندونسيات يبت طباخة ممتازة قعدت 3 شهور وعقب كشفت عليها شيء ما ارضاه ورديتها ..

يبت وحدة تطبخ بس اسبوع ما تتسبح وما تغسل المواعين اول باول وبيتي خس صراصير

هلكت ابدل البشاكير .. وسالفة الطباخ ما اروم لها الحين ما عندي مكان له ..

تعبت وايد .. أنا حامل وفي رمضان كنت اداوم من الساعة 7 علشان ارد البيت الساعة 1 واسوي الفطور لأن دوم عندي ناس وضيوف والنتيجة المشيمة نازلة وتعب علي ..

الحين انا بتحمل التعب الجسدي .. بس التعب النفسي ..

ريلي هلك نفسيتي من عقب رمضان وهو متذمر .. أيبب الشغالة وأعلمها حتى كوب شاي حليب ما تضبطه او ما تبا تضبطه ..

الصبح يبا ريوق عدل ما اييب راسه سلايس وجبن .. يبا ريوق شعبي .. منو بيسوي له ؟؟؟! حاولت اغير الفكرة رافض .. مقتنع انه هو يبا جيه .. ويبا كم صنف حتى لو ما ياكل ..

يبا فواكه ويبا طبق حار وشاي وعصير .. نظام الفنادق .. بس أنا اقوم واركض اجهز بناتي اوديهم الحضانة ..

الغدا صعب اطبخ .. وتوني سامعة كلام كله تأفف ..

العشا اسوي ومحد ياكله بس اسوي تجنبا للنكد

أنا قلبي يعورني وسمعت كلام عن الاهمال وانتي عيبج بس الطبخ والبيت يباله حرمة تطبخ و و و ..

الحين انا موب طايقة الخدامة وابا اطفرها وجابرني اتحملها .. وكنت ابا مربية اضمن انها تساعدني في نفاسي لكن والله ما اريد الحين الا طباخة تنقذني من هالمعمعة ..

كرهت الطبخ وعفته وطفرت طفرت من الكلام المزعج

تتخيلون لي فوق السنة وانا مشكلتي بس الطبخ .. يقول لي العيال ما ياكلون والعيال اكلهم سم وأنا ما الومه اللي عندي اصلا مالها بارض تغسل صحن علشان يكون لها بارض تطبخ

احس مشكلة سخيفة بس والله مسببة لي ارق وصداع

اللي تعرف لي حل تساعدني ..

تمت الموافقه

مافي غير حل واحد هو انج تتركين الشغل وتتفرغين للعيال وزوجج والطبخ، لا تقولين باقيلي 3 سنين واتقاعد واحتاج الفلوس راتبك كله راح عالخدم وعيالك متبهدلين دوري وظيفة ثانية دوامها اقل او استقيلي ولا بيتزوج عليج وحدة تطبخ وراعية بيت.

ما عندج احد مثلا امج او عمتج خبريها تطرش لكم وانتي عطيها مبلغ لمير البيت شرات الدياي والعيش والسمك
او فيه حريم يطبخن لشهر بمبلغ معين دوري في الانستا او في المنتدى اقرب لبيتج
او جهزي اكل انه بالليل تطبخين المرق والعيش علمي البشكارة ولما ترجعين من الدوام طلعي الدياي او السمك وحطيه بالفرن او اقليه
او اشتري قدر الضغط حطي كل الخضرا والدياي مع البهار بنص ساعه بيجهز كل شي
ما أداوم لكن اهتم بأكل عيالي وأحب يكون صحي اذا تبين وصفات سريعة وصحية خبريني

اطلبي طباخه او نزلي اعلان فدبيزل للطباخات

في شركات توفر طباخات

جربي طباخهن الي تعيبج خذيها ومع السلامه

لا تعورين راسج وايد

واعمري عنج ، عندج التاجرات ترومين تسوين أشتراك مع وحدة
تروم تطبخ لج إلي تبينه يوميا بدال ما تعقين فلوسج على خدم ما يتمون إلا بالعافية
و بخصوص غسيل المواعين عندج غسالة الصحون وايد زينة لهالشي
بخصوص تنظيف البيت بالإسبوع 3 مرات بالإسبوع تنظيف شامل
و لازم تعلمين الصغارية على الترتيب و النظافة من هم وصغار

المشاركة الأصلية كتبت بواسطة سوسو 92
مافي غير حل واحد هو انج تتركين الشغل وتتفرغين للعيال وزوجج والطبخ، لا تقولين باقيلي 3 سنين واتقاعد واحتاج الفلوس راتبك كله راح عالخدم وعيالك متبهدلين دوري وظيفة ثانية دوامها اقل او استقيلي ولا بيتزوج عليج وحدة تطبخ وراعية بيت.

لا حرام شو تفنش.. أنا باقي لي 6 سنين على التقاعد ومستحيل أفكر استقيل كيف هي .. ماللي تعودت على الراتب 17 سنة صعب تقعد تتريا العطايا ..

اللي أشوفها عيالها موب وايد حاسين .. على اساس انها متزوجة من 5 سنين يعني عيالها صغار .. عيال زوجها يمكن اللي حاسين وهذي مسؤولية الزووج يدور خدامة بيرفكت او يوفر لهم أكل ..

بعد موب منطقية سالفة تفنش علشان ما يتزوج عليها وتضيع جهد السنين خوفا من هالشيء .. أعتقد لازم تشوف خيار ثاني ..

مطلقة تعبانه

مشكلتي عندي اكتئاب حاد ها الأيام انا مطلقة من تسع سنين وايد عانيت خلالها لأني كل ما اتمنى شيء ما يصير حتى الأصدقاء فقدت أعز صديقاتي مب وحدة ثنتين ثلاث ما صار لي أحد ركزت على عيالي الإثنين بنتي كبرت وبدت مراهقتها وصارت تبعد عني شوي شوي أنا فاهمة انه شيء طبيعي للي في عمرها وولدي روحه في أبوه ما في على لسانه إلا بابا بديت أحس بالوحدة وحدة متعبة كلمت كم خطابه ودفعت مبالغ كبيرة بس ما شيء فايدة تخيلوا من سنة كله اقتعد في غرفتي أطلع اليهال وأرجع والله حتى الكلام ما أدري صار صعب بالنسبة لي تفكيري صار نفس تفكير بنتي والله مب قادرة اتناقش مع الناس اللي بعمري في الدوام انطوائية وإذا تكلمت مع أحد ارتجف وعادي أبكي أتمنى اموت وأتمنى أسير الطب النفسي مرة ثانية حتى ولدي ذوي احتياجات مب قادرة اعتني فيه ودوم شو أريد منه إذا من صغري ما في ريال بحياتي من صغري ما حسيت انه رجل لي سند لي ظهر منهارة واكتب وأنا أصيح محتاجة أرجع للطب النفسي يمكن يعطوني أدوية أنسى العالم كله

تمت الموافقة
الكلمة الطيبة صـــدقة

السلام عليكم اختي مادري ليش تححسني بنفسي …. بخبرج شيء … مع انا متزوجه بس جني مب متزوجه لانه مب معاي والي تحسين فيه احس فيه مرات انسى الكلام؟!!!!!!!!!!!!!! ممنوع اطلع ممنوع اسوي شيء ممنوع حتى امسك التلفون؟ تخيلي ………. وفوق هذا ماشي فلوس او مصروف الحمدلله على كل حال ……

…………………………….
الوحدة صعبة جدا خصوصا لو كنت مع حد بس جنه محد وياج !!! …. ع فكرة ممكن تتزوجين وبكل سهولة بس انتي افكارج جداااااااااااا سلبيه نفسي تقريبا والي خلاني اعيش في متاهة احس اني ابا اجتل نفسي اليوم قبل بكرا ……. واتمنى الموت …. هالكلام كله مايفيد …….. لا ينفعنا ولا يفيدنا في شيء

………………….
أولا : حافظي على صلواتج ( بخشووووع )
ثانيا : استغفري ( يرسل السماء عليكم مدرارا ويمددكم بأموال وبنين ) يعني الله ما بيعطيج عيال الا اذا تزوجتي! يعني الاستغفار بيجلب هالشيء ان شاءالله
ثالثا: خذيلج دورات الطاقة الايجابية (الطاقة البشرية ) وتعملي عن الشاكرات الي في الجسم الانسان الي اذا ضعفت تسبب لج مشاكل ف الجسم ….
رابعا : لا تمين في فراغ ……. اشغلي نفسج في الداوم / بزنس / الخ الخ الخ من الامور خلج بزنس وومن ماعندج وقت تحكين راسج ..
خامسا : دورة لحفظ القرآن الكريم ( شوفي كيف النفسية )
سادسا : الرجل لن يضيف اي شيء على حياتج فقط عشان تكملين حياتج خلي لحياتج معنى قبل لا ادخلين اي انسان وان دخلتيه خليه من الكماليات وليس الاساسيات الي اذا رحل متي /اكتئبتي / راحت طاقتج
سابعا : اشكري الله دائما على النعم ( ولئن شكرتم لأزيدنكم )
ثامنا : ودري عنج الطب النفسي والادوية والي ينسيج العالم وغيره …… ( كله خرابيط ) اخوي مسوي جيه في عمره لا عايش ولا ميت مرات اتمنى ربي يرحمه بأخذ روحه والله استغفر الله بس شفت كيف حالته وما اتمنى اي حد تكون حالته جيه
تاسعا : الموت مب بايدنا الي بأيدنا انه نحيا حياة لعبادة الله ان رضيتي ربج … ربج بيرضيج …. وان مارضييتيه بتلقين الي ما يسرج ..
عاشرا: الدنيا دار فناء …. اذا بعد هذا كله ما لقيتي الزوج الصالح … حطي في بالج باجر احنا رايحين والجنة فيها احلى من 100 رجل في هالدنيا ….

فقط لا تيئسين

الله يفرج كربك يارب ,,حاولي حبيبتي الإستغفار حتي لو مقصره والإستغفار بيقربك من ربك ,,وخلي لو نصف ساعه من الثلث الاخير من الليل تناجي فيها ربك بالتبجيل والاستغفار والحمد ثم الدعاء وإن شاء الله بتشوفي
النتيجه

ماشاء الله الاخت السنقباسيه كفت ووفت والله انا متزوحه وساعات تمرزعلي ايام اكون فيها حزينه ومكتئبه بس ارجع وبقوه لنيي رجع لربي هو الوحيد الي يفهمج ويعرف شو في داخلج حاولي تغلبين الحزن والياس الي بداخلج خليه مثل اتحدي ادخلي دورة حفظ للقران بيفيدج وايد اغلبي الشيطان يلي بداخلج واكيد لا تنسين تدعين الله يرزقج بالزوج الصالح يارب

الله اييسر امرج ويفك كربتج ةيرزقج الزوج الصالح عاجلا غير اجل ..الله يرزقج السعادة ةيزيح همج

اختي انتي محتاجة ترجعين لرب العالمين وتشكين له كل همومج واحساسج هو بس اللي يقدر يساعدج مشكلتنا انه نحن ما نطلب الشي بثقة دوم عندنا شك بإنه اللي نباه ما بيستوي, ثقي في رب العالمين واطلبي منه اللي تبينه وصدقيني ما بيردج
لا تدورين على ريل ولا ترمسين خطابات وتهينين نفسج لمجرد الرغبة فالزواج, حاولي تغيرين أسلوب حياتج
تقربي من بنتج حتى لو هي بعيدة عنج خذيها وياج للسوق مثلا قوليلها اشتري لج لبس حابة اعرف شو بتختارين وشو ذوقج, حتى لو ما عيبج اختيارها قوليلها حلو خليها باسلوبج تقرب منج وتكون وياج
وحتى ولدج قربي منه بنفس الطريقة بالكلمة الطيبة والحنان, ظهري ولا تنعزلين عن الناس وتيلسين تفكرين وايد, وودري عنج الأطباء النفسيين لا تبلين عمرج فيهم ترى مب كلهم يساعدون شرات الناس الا يعطون ادوية صعب تتخلصين منها لو خذتيها.

غيري حياتج وتفكيرج ورب العالمين بيسهل كل أمورج وبترتاحين.

ريلي وجاهه اجتماعية وبس مو عادته زوج

السلام عليكم
ريلي يا حريم احسه وجاهه اجتماعيه .. برواز… سواق .. مندوب … حمالي اي شي غير زوج …
ما احس اني أحبة ولا اغليه
يطلع ولا افكر اتصل به..
تخرج من التجنيد ولا سويتله سالفه ..
يوم يبعد ارتاح ويوم هو جريب احس اعصابي مشدوده..
انا قايمه بنفسي .. من كل نواحي .. وجوده مجرد كرت أخضر… لأني معرسه فلي كامل حريه بكل شي .. بيت ابوي في قواعد تخنقني… ما استحمل أتم في بيت ابوي حتى لو زياره أكثر من 5 ساعات …
بس ها لسبب الي مخليني اعيش معاه ..
هو إنسان خاين وراعي بنات .. لدرجه ان يواعدهم بسيارته.. وحدث ولا حرج
مابينا كلام ولا سوالف .. لأن بإختصار اي شي اقوله يقولي انتي هبله انتي غبيه انتي متعرفين تتكلمين
مع اني والله اونس وسوالفي حلوه .. وايد على ويهي .. ودمي خفيف بس هو عافانا الله من كثر ما يرمس.. ما يعيبه اسلوبي ولا شكلي و لا كشختي .. مع ان لا يعلى علي صراحه …
ما أقوله حبيبي ولا حياتي الا اذا أبا شي
قبل كنت اترياه واطرشله صور سلفي وحركات .. ما يستثير ولا يقرب مني .. اثريه عنده الي مكفيه
حالياً انا الي مااباه ولا أقرب منه ولا احب أحبه ينام معاي بحجره ..
إذا طلع ياني الفرج

مادري .. ليش .. احس بيكون في نهاية لحياتي معاه .. بس اتريا شي ما عرف شو …
عندي عيال 3 .. كلهم أقل من 6 سنوات ..

تمت الموافقة
الكلمة الطيبة صـــدقة

الله المستعان

تبين تكملين باجي حياتج جي ؟

هالسووال تسالينه نفسج و الرد عندج

عندج حل من 3 حلول ياتكملين معاه جي و معى نفسيتج المحبطة و بتيج امراض الدنيا

او تكملين معاه + تقوين ثقتج بنفسج من خلال دوره ناعمه الهاشمي كوني ملكة ( و الله انها دوره تغير شخصيتج و تخليج تتكيفين مع أي محيط انتي تكونين فيه )

او كلن يروح بدربه

بس حطي في بالج تتحملين النتايج اللي تترتب

في سكن لج بيت اهلج ؟ تتوقعين بيتقبلون ردتج مع 3 أطفال

حريتج الطلعه و الدخله ؟

في شي وايد مهم , كيف يقولج هبلة و غبيه !!

انا ما احرضج بس انتي ادري باللي انسبلج و بعد لازم تحطين كل الاحتمالات المتوقعه

اعبر عن نفسي و عسى ربي ييسر امورج

عزيزتي غير يمن نفسج لفسج لا تقولين لريلي و بو عيالي
اذا انتي تغيرتي من داخلج عقب بيحس بالتغيير و يمكن يودر بنات الحرام
الطلاق مب حل ، فكري فيها عندج 3 مب 1 ماشاء الله

ما عليه حبيبتي

لا تفكرين فيه و انشغلي في نفسج و اهتمي بشكلج و لا تعطينه اي اهتمام
خليه يحس انج متغيرة
عيشي حياتج مع عيالج و استانسي
و صدقيني في النهاية بيندم
مافي إنسان يمشي في درب الغلط و ما يندم
تحمليه و وكلي امرج لله و تأكدي انج بتكسبين في النهاية
خليه برواز بس أحسن من الطلاق
الله يفرج همج

للأسف اثنينتكم غلط،،،

تعقيب1/ ابوي وولد ابوي

شكراا ع كل الردووود
https://forum.uaewomen.net/showthrea…A8%D9%88%D9%8A
الي قالت وكلي محامي ترى لا وضعي ولا وضع اخواني يسمح انه نوكل محامي تكاليفه كبيره علينا / لانه اساسا اخواني موكلين حق امي واحد ف كل جلسه 10 الاف واكثر تقريبا

والي قالت كلميه ودي ترى والله العظيم نحن عادي نكلمه مب انه ماخذين موقف ومول ما نكلمه بالعكس قبل كنا نتصل فيه كان يصكر الخط ف ويهنا بس من نذكر اسامينا حتى مره سرنا لين بيت حرمته ال3 ع اساس بنجوفه و بنتكلم وياه لانه اكثر الاوقات هناك تخيلو نحت عند الباب يانا اتصال من مركز شرطه �� اونه نحن سايرين بيته نبي نضرب حرمته تخيلو مع انه كنا بنات رايحين حق موضوع اختي

واصلا هالفتره يعني من عقب رمضان الي طاف هو قام يمر البيت ويلس ويقوم عاااادي ولا كنه في شي كل مره اي يسولف ونيلس وياه وكل شي كان يقول حق امي تنازلي عن النفقه من وين ايب تراك تاخذ من الشوؤن حقي وحق عيالي قال اصرفه ع اشياء ثانيه وااالخ ف امي حن قلبها وقالت خلاص انا مابتنازل بس مابطالبك فيه فالمحكمه ،،
فجئه طلعت لنا هالسالفه �� وتغير
يعني اي ويلس ويقوم بس ولده من يجدم خطوه هو يقطع مانعرف شو الموضوع

والي تقول اخوج اكبر منكم و ايلسو وياه تفاهمو ترى هو مب اكبر واحد شي الي اكبر منه بس ابوي عاطيه هو التوكيل و نتفاهم ( اصلا هو كل نيته يدمر بيتنا وبس وهالشي انا ما اقول لانه ولد ابوي لا في مواقف )
1- كل ما حد يخطب اختي العوده كان يدخل ويعترض مع انه محد خذ رايه / قبل لا ياخذ الوكاله (يعني نظامنا كان كل حد عليه من بيته هم مايخصهم فينا ونحن مايخصنا فيهم ) كان يرفض اونه خواته اكبر من خواتي خلهم يعرسون عقب اختي لها تعرس ��ترى اختي بعد مب صغيره 28 اذا هم ماياهم هي شو ذنبها كذا مره وقف وسوا مشاكل لين حصل التوكيل ويا واحد خطبها وابوي رضا وقاله سير وقع جدامنا تخيلو يوووم الملجه فالمحكمه الريال واهله واختي وامي واخوي نتريا اخر شي نتصل ف ابوي فونه مغلق اتصلنا فيه يقول مب ياي الريال قال بوها راضي قال انا مب راضي وصكر الخط ف ويها ��وتووكل الريال ف حال سبيله
2-يوم استوت هالسالفه ريل اختي اتصل ف ابوي ع اساس ليش محاكم وهاي بنتك واللخ جان ابوي يحط مشاكله ويا امي جدام ريل اختي ويوم خلص قال موضو ع القضيه عند اخوها واتصل ريل اختي فيه جان يترس راسه (ترى ريل اختي قال انا ما ارضا حرمتي تدور محاكم واللخ ) جان يقوله جي انته ماتدري كم مره حرمتك يايه المحكمه كذا كذا كذا -لانه اختي يوم كانت تسير هايج الفتره ريلها كان يمر ف ضروف بعد تخص المحاكم وماكانت تقوله صح بتقولون اختج غلطانن ليش ما خبرته هي ماخبرته اوكي هو ليش ؟
3-ريل اختي الثانيه بعد كلمه قاله حرمتي ماداوم كيف اطالبونها واللخ جان يقول حكم وصدر هي ماعندها انت عندك ادفع قال وانا مب مجبور اصرف على ابوها قاله غصبن عنك جان تبا حرمتك تدفع �� ريل اختي عصب وتفاتن وياه جان ولد ابوي يهدده اونه انت ماعرفتي عدل براويك يوك بيفنشونك من دوامك (بلديه ) جان يصكر ف ويها //// اساسا ريل اختي مايداوم هناك بس ولد ابوي يتحرى هو نفسه الي خطبها قبل وكان رافض

يعني شو بعد اخبركم من مواقف ترا هالريال ماناوي بالخير وانتو تقولون ودي ��

واساسا عياله الباقين مايعطونه وساكتين عن الموضوع لانه محد دخلهم فالسالفه

والي قالت ها ابوي شو يعني 1000 ولا 2024 من وين ايب ها1000 اذا انا مصروفي من ريلي 1000 ��ومايكفيني بس الحمدالله متعايشين

تمت الموافقة
الكلمة الطيبة صـــدقة

الاستشارة ببلاش ف المحكمة
روحي المحكمة أو حد من أخوانج واطلبوا ملف القضية
ودشوا ع القاضي ارفعوا عريضة عسب توقف الحكم مؤقت
سيروا هناك ف المحكمة شي محامين حاطتنهم الحكومه للاستشارات هو بيوجهكم شوه تسوون
من غير محامي وإن شاء الله بتنحل مشكلتكم

المشاركة الأصلية كتبت بواسطة [..دانــة..]
الاستشارة ببلاش ف المحكمة
روحي المحكمة أو حد من أخوانج واطلبوا ملف القضية
ودشوا ع القاضي ارفعوا عريضة عسب توقف الحكم مؤقت
سيروا هناك ف المحكمة شي محامين حاطتنهم الحكومه للاستشارات هو بيوجهكم شوه تسوون
من غير محامي وإن شاء الله بتنحل مشكلتكم

الله يكون ف عونكم .. انا مع الاخت

اكثري من قول حسبي الله و نعم الوكيل
و حاولو تكلمون ابوكم و تبرونه كثر ما ترومون حتى لو كان مقصر معاكم
عند الله الاجر ما يضيع ابدا و بيثمر في عيالكم ان شاء الله
و مثل ما قالو الخوات في استشاريين في المحكمة مجانا
خذو موعد عندهم و ان شاء الله بيوجهونكم
بالتوفيق

يختي هالقضايا ياكلها الريال يعني اخوانج بيدفعون مب البنات يعني المعرسه بتكون مفتكه انا ريل اختي جي فوق العشرين ولد عاده هذا ابوه ما وكل حد روحه راح واشتكيانهمحد يصرف مع انه عياله كل واحد مع امه لانه كان يعرس ويطلق ويفر العيال المحكمه جبرت الاولاد يدفعون شهريا للابو 2024 لكل واحد تخيلي استغنى الشيبه انتو فحالتكم للاسف لازم محامي عشان يقلب السالفه ع اخوج يعني الدفع يكون من الكل مب بس منكم ثانيا الوضع المالي لابوج لازم ينطرح والمستفيد لازم بعد ينطرح يعني اذا بتعطون كم بيكون المبلغ وبيت الاجار لي ماجرينه بعد لاز ينطرح عشان القاضي يتفهم النصب لي صاير شي محامين مصاروه ياخذون اقل جوفولكم حد فالنهايه هالقضايا تحتاج طوله بال ومحامين والاحسن انه مرات انتو تحضرون الجلسه وع فكره ابوكم حاولو تزورونه واذا رفض ولا ما خلوكم حجه حلوه بعد جدام القاضي انه ما يخليكم اتيونه ولا يروغونكم واخوكم هذا طبو عنكم لوتي بيبهدلكم وامج لا تنازل عن شي لانه هذا كله عشان النفقه ولا يحن قلبها ترا بتعذبون محد مبهدلنا الا امهاتنا في هالامور

المحاكم توفر محامين للي ماعندهم ميزانيه

الحق معاكم

حايرة ما بين اهلي و زوجي

السلام عليكم .. اتمنى منكم المساعدة

انا متزوجة صارلي سنتين ونصف عانيت كثير من المشاكل مع زوجي بسبب تآخر الحمل وكنت اعيش مع بيت اهل زوجي
وزوجي من النوع المتسلط والي كلمته مابتصير ثنتين وبصراحة انا كثير احبه

صارت معنا مشاكل كثيرة ومن بينها ان اهلي واهل زوجي ماصاروا يتكلمون مع بعض مع العلم زوجي يصير ابن عمي

وحاليا انا في بيت اهلي لان هو زعلني وقالي انا ماعاد بدي شوفك لانك مابتحملي ولا بيصيرلك اولاد
مع العلم نحنا سبب تآخر الحمل مني ومنه انا عندي تكيس وهو عندة الحركة صفر

عاد زعلني وقالي خلي اهلج يرفعولج محامي لاني بدي يصير عندي اولاد وبالفعل اني رحت بيت اهلي
ورة اسبوع تقريبا ارسلي الغراض تبعي

وبعد مرور شهرين على وجودي ف بيت اهلي .اتصل بخالي وقالي انا بدي احكي مع زوجتي وهي مسكرة تلفونها خالي قلو م انت الي مزعلها وانت الي بدك اطلقها وهو حكة عني حكي مش منيح قدام الكل

وبعدها اني رضيت اني احكي معاه بالتلفون وقالي ها رح ترجعي لو لا
انا قلتلو مابقدر لازم ابوك يجي لعند اهلي ويصالحني قالي ابوي مالة شغلة بينه
مع العلم هو ابوه وامه كانوا سبب هجمان بيتي لان دائما بيحكولو عني اني انا مستحيل يصيرلي اولاد
وانهم بدوا يزوجوا وحدة تانية

واهلي كلهم واقاربنا لما عرفوا انو بدوا يرجعني قالولي لا انتبهي هذا شخص مؤذي ورح يآذيكي ويدمر مستقبلك

وهو لما حكى معي قالي انا وانتي رح نلتزم بالعلاج واصبر ليحد مابيصر عندنا اولاد وعطاني وعد

المشكلة انو انا مرتين ازعل وكان لما يصالحني يوعدني انو رح يعيشني احلى عيشة وانو مابدوا يتزوج وحدة تانية ورح يكمل مشواره معي لكن بس ارجعلوا ويصير على رجوعي اسبوع بيتحول لانسان تاني
يبدي بيعيط عليه وبيضربني ويهملني واكثر الاوقات بيكون مع اصحابه ولما يرجع للبيت حتى ما بيكلمني

واهلي الان مانعيني حتى من اني ارد عليه لان هو بيتصل وابوي قلي هذا الانسان كاذب ولا تصدقيه
هو بدو يرجعك عشان يآذيكي

وانا مرتين دست على كلام اهلي وكنت برجعلوا وكان بيطلع كلامهم صحيح وهالمرة الثالثة خايفة انو مابطيع اهلي وارجعوا واتندم

خصوصا اهلي قلولي اذا بترجعيلوا ونحنا مش راضين عنك انسي عندك اهل لان نحنا اهلك ونحنا ادرى بمصلحتك وادرى ان كان زوجك منيح معك ولة لا

تمت الموافقة
الكلمة الطيبة صـــدقة

وعليكم السلام والرحمه

لا ترجعين له إذا مافيه احترام وفوق هذا ضرب واهانه وقذف ( الكلام اللي قاله عنك)
مااشوف شي يخليك ترجعي لعنده وخصوصا انه ما عندكم عيال ،،، استخيري اولا واخيرا
واهلك مالهم بديل مهما كان لا تفرطي فيهم
واذا كان معهم الحق فاسمعي كلامهم هم ادرى

الله يكتب لك الخير حبيبتي

ياحبيبتي خبري ريلج قوليله انت طلعتني من بيتي وما صنت العشرة اللى بيننا في ريال يطلع مرته ويطردها من بيتها للمرة الثالثة و يقعد يترجى ترجع
قوليله انه الموضوع صار معقد أكثر عن قبل وان الشور والرأي عند ابوج تقدر تكلمه لو صدق متمسك فيني وارجعي بشروط أهمها الاحترام
و عن سالفة العيال لاتسمحين لأحد يغلط عليج
خاصة أن المشكلة منكم انتوا الاثنين ومب انتي تتحملين المسؤولية ولا اعتراض على قضاء رب العالمين ربنا له حكمة محد له الحق يتدخل عليكم تأخذين بالأسباب والعلاج وتوقفون انتي وزوجج يدام كل أحد يعايركم
و بخصوص العلاج تصدقي وادعي وخليها دعوتج الدايمة بين الأذان والإقامة ووقت الإفطار وكل ساعة من يوم الجمعة وكوني على يقين أنها تستجاب وثقي بربج وتصدقي واستغفري وكلها فترة قصيرة بإذن الله وتشوفين نفسج حامل

وفي الأخير ها زوجج وانتي أدرى به
استخيري رب العالمين وجوفي اذا الأمور تيسرت وتفاهمتوا ارجعيله

اسمعي كلام اهلج لانه هم ادرى بمصلحتج وانتي شفتي هالشي مرتين
واحتسبي اجر صبرج عند الله وهو بيعوضج ان شاءالله خير
يمكن خيره انج ماتييبين عيال منه لانه انسان ما قدرج

سبحان الله يمكن خيره انج ما تيبين عيال منه
انا مع اهلج .. ريلج انسان مزاجي ومب عند كلمته
اسمعي كلام اهلج احسن

بالنسبالي شخصيا اسمعي كلام اهلج

مشكلتي ما احب الدلع الزايد

عمري 22 و شخصيتي احسها عصيبة و جادة و ما احب الدلع الزايد دوم اعصب ع اشياء ، يعني في البيت اضارب اخواني و اصارخ و ازاعجج حتى لما اقول سالفة اصارخ جي ها بس مع اخواني و ربيعاتي ، بس في نفس الوقت عادي اضحك و اتشغمر ، و اذا اطلع مكان يكون اسلوبي مع الناس جاف وجدي و ما ابتسم اتم جي مكشرة و عابسة و خاصة مع شباب (احسسهم جي كانهم يايين يغازلوني) ، وغالبا اللي يرمسون وياي يقولون ليش جي انتي شديدة و عصبية مع اني احس انا عادي اسلوبي ما فيه شيء و صح اني عصبية بس بعد من نوع اللي استحى يعني اذا حد سولف وياي واطالعني اخوز عيني و ارتبك في الكلام مرات و مب اجتماعية وايد، المهم الحين كيف اخلي اسلوبي يكون لاجاف و لا جي دلوعة و اكون فرفوشة و مرحة توسع الصدر لانه اسلوب احس مرات ينفر الناس مني

تمت الموافقة
الكلمة الطيبة صـــدقة

اشوف اسلوبج زين جيه
شو الفايدة صوت ضحكتج يوصل لآخر مكتب او اسلوب المايع
الناس يايه تبي تخلص معامله معينه انتي عليج تخلصينها واذا صار خلل في الكمبيوتر استسمحي بطريقة مأدبه
مع كبار السن تعاملي معاهم بأسلوب مثلا تنادي الحرمه عموه صبري شوي بتأكد ولين أتأكد انتي تقهويي

مرحبا اختي

مممم المشكله انه هذا طبعج ودووم الطبع بيغلب ع التطبع ..
انتي بنت لازم يكون فيج حتى لو شوية دلع مش شرط الدلع يكون مع الغرب مع الغرب يكفي الحيا والاحترام بس مع لي حولج اخوانج هلج ربيعاتج لازم تكونين شوي دلوعه

تبتعدين عن العصبيه والنرفزه والصوت العالي لانها صفات مش حلوه لبنت

فديتج حاولي وانشالله يتغير طبعج وب العكس هالشي بينعكس ع نفسيتج و ع اللي حولج بعد بتحسين الناس يحبون السوالف واليلسه معاج وما ينفرون منج

سمحيلي اذا غثج كلامي بس حبيت انصحج لا اكثر 🌚

حل مشكلتج ب ايدج .. وطبعج مافيه شي بالعكس اشوفه احسن من الدلع والمياعه وغيره

الحل بايدج عزيزتي .. حق شو الصريخ والازعاج .. بالعكس انا ضد كلام الخوات اللي تقول حق شو الدلع ؟ عيل ليش انتي انثى ؟! معروف الدلع للبنات مب صوت عالي وصريخ .. بالعكس هالشي منفر ويخلي الناس تبتعد عنج ..

المشاركة الأصلية كتبت بواسطة ماحد شراتي
الحل بايدج عزيزتي .. حق شو الصريخ والازعاج .. بالعكس انا ضد كلام الخوات اللي تقول حق شو الدلع ؟ عيل ليش انتي انثى ؟! معروف الدلع للبنات مب صوت عالي وصريخ .. بالعكس هالشي منفر ويخلي الناس تبتعد عنج ..

الحياء شعبة من شعب الإيمان
وهي حددت تبي تعرف كيف تدلع جدام الشباب ؟
واذا قلتلج انه الشباب يمكن يحبون اللي تتميع ويقضون سوالف وياها لكن ما تدخل القلب عكس الحياوية واللي تتكلم برزانه وادب بتشوفينهم يراكضون من وراها يسألون عنها وعن اهلها

امي تدعي علينا

السلام عليكم ورحمه الله وبركاته
انا بنت عمري 16سنه
ماعندي حد اتكلم معاه بغيتكم تساعدوني مشكلتي هي امي يوم تعصب علينا ترفع ايدهاا وتدعي علينا اليوم انا سويت شي اعترف اني غلطت دعت عليه قالت عساج السنه اليايه تسقطين والمره اللي طافت دعت على اختي انها اتم عانس طول عمرها وهي عمرها 22سنه انا صرت اخاف منها ومن دعاويها علينا اخاف الله يستيجب لانه دعوة الأم مستجابه
دخيلكم ساعدوني امي عصبيه وماتتفاهم

تمت الموافقة
الكلمة الطيبة صــــــــدقة

هذي امممج و اكيد مضغوطه وانتو تقربو منهاواستوو صديقاتها والدعاوي الي الدعيها عليكم مب من قلبها وخاطرها وان صابكم شي بتجوووفونها اول وحده طايحه من الخووف واختج عمرها 22بعدها كتكووته ع اسم العنوسه بيي نصيبهااا ان شاء الله

وواذا انتي تتحرينها دعت عليج من قلبها جربي ع ايام الدراسه صيحي اونج خايفه ترسبين وبجوفينها كيف تحن عليج

الامهات مضغوطات انا بعد امي عصبيييه مادعي علي بس تقول كلام يجرح 😢اضايق بس مالي غنا عنها يوم اي مشكله تصير لي ابيها عندي

لا حول ولا قوة الا بالله
يا اختي انتي بنفسج قلتي انج غلطتي واكيد امج طول هالسنين وهي تعلمكم وتربيكم وتعلمكم الصح من الغلط
اكيد وصلت لمرحلة تعبت وتشوفكم ما تسمعون كلمتها وتغلطون فأكيد بتدعي عليكم
بري فأمج واسمعو كلامها اكيد بتدعيلكم بالتوفيق والسعادة

لما تصيرين ام بتعرفين شو تحملت المسكينة
انا امي بعد كانت وقت العصبية تقول كلام ماينقال واقعد اصيح واحسبها تكرهني
لما تزوجت و حملت وربيت عرفت شو اللى كانت تعاني منه وندمت ع اللى كنا اسويه

حاولي ما تزيدين ع اللى فيها هي مستحيل تشكي همها وتكتم بخاطرها

تحملوها مثل مأ هي متحملتنكم

خذي لها وردة وعاونيها في البيت
وقوليلها ادعيلي أنجح بتدعيلج وهي تضحك

مشكلتنا نشوف أخطاء الآخرين و مانحب نصحح الوضع وماتكون المبادرة من طرفنا ونحط اللوم عليهم وخلاص

ماعليه حبيبتي انا متاكده انها لحظة غضب لا اكثر وبينها وبين نفسها دووم تدعييلكم ب الخيير
انتو المفروض ما تضايقوبها ترا الامومه متعبه ومسؤوليه وايد صعبه وكبيره كلها ضغوطات ف لاتصيرون انتو حمل ثقيل عليها المفروض اتدورون راحتها ورضاااها

الله يطول بعمرها ويخلييها لكم ❤

روحي اعتذري منها .
الامهات نعمة من الله .
مهما عصبت وزعلت تريد مصلحتج في النهاية
ومستحيل تدعي من قلبها عليكم

راجعي نفسك وشوفي شو الاشياء الي تعمليها تخليها تعصب منج ولا تعمليها مرة ثانية وخلاص

المتصفح

بنات شو مشكلة متصفح المنتدى يعني يوم اضغط عشان اشوف الردود في الصفحات الثانية ما يستوي شو السالفه؟؟؟

لا أجد أي مشكلة بالمتصفح .. فضلا أخبريني عن نوع المتصفح
ومن أي جهاز تتابعي المنتدى .. مع إبلاغنا ماذا يظهر لك لكي يتم حل الأمر

يُغلــــــــــــــــــق

ريلي و الفلبيني

بنات انا مب عارفة افكر
اخاف اكون مبالغة فالموضوع
ريلي صارله فترة مرابع فلبيني يشتغل فمحل
كل شوي طالع وياه اوقات الفلبيني يدقله الساعة 12 او 1 فالليل و يطلع وياه
و يرجع 3:30 او 4 الفجر
و تقريبا كل يومه وياه اذا قاعد فالبيت يكلمه واتساب و اذا طالع يقولي طالع وياه و مره تم يدقله الساعة 3 الفجر ريلي كان راقد و انا واعيه تم الفلبيني يدقله 4 مرات و عقب ربع ساعة سمعت حرس الباب سرت وايجت من فتحة الباب شفت الفلبيني واقف و وياه حلويات قلت هذا مينون كيف يتجرا و اي البيت هالوقت!!!!!
طبعا طنشته و رقدت و الصبح خبرت ويلّي يقولي مسكين كان يايب حلويات حق ولدنا
نعم يعني حلويات الفجر!!!! لهالدرجة مب قادر يصبر!!!
و اليوم ريلي وقد من وقت و الفلبيني اتصل الساعة 3 الفير شفت رقمه سويت التلفون صامت و عقب شوي طرش عالواتساب كلمة baby
شو رايكم عاد؟؟؟ في ريايل يطرشون لبعض هالكلمة؟؟؟؟
اخاف يكون ريلي وياه في شي حرام
يعني كل الأشياء اللي جدامي تبينلي جي شو رايكم؟؟؟ والله بتخببل اذا ريلي طلع جي

تمت الموافقة

الكلمة الطيبة صــدقة

يمكن والله صح تفكيرج

لان حركاتهم ما تطمن

الله يعينج

انا اقول اتأكدي اختي ولا تظلمينه أن بعد الظن إثم
وبعدين اذا صدق السالفه .. حاولي تهدين نفسج واتحلين المشكله … انا لو مكانج ما بخبر حد عن السالفه بس بقلب الدنيا على راسه .. يا يبتعد عن هالطريج الوصخ يا اني أخبر أهله بس تهديد لا تخبرين. . وان شاء الله بيعتدل … كل شي له حل ويمكن هو صغير وفي شباب يسونها ويعرسون ويعقلون ..

لاحول لا قوة الا بالله!
انا ماريد اخوفج بس صدق الحركات مب طبيعيه
خصوصا المسج وكلمة بيبي؟ انا اقول واجهيه احسن
وخلج مفتحه عيونج عدل لان لاسمح الله ممكن يكون بينهم شذوذ
وهالشي صرنا نسمع عنه وايييد " الله يهديهم بس "

خليه يكره الفلبينيين
أو قوليله انا مأحب انك تتمشى معاه أشكال هالشعب مب أشكال رياييل وانا أبا لك الأفضل
صاحب اللى له قدر و فيه مرجلة
تكلمي عن امراضهم و عدم نظافتهم
أي شيء خليه ينفر