خواتي انا وحده مثلكم ما خليت شي ما جربته ..
و ركضت ورا اوهام عيادات التخسيس و ادوية الرجيم لين ما لاعت جبدي و لا في فايده .. اضعف كم كيلو و ارجعهم دبل !!
و طبعا المثل يقول اسأل مجرب و لا تسأل طبيب .. و بعد تجربة طوييييلة رتبت افكاري و جمعتها في نظام واحد صحي و مشيت عليه و الحمدلله ياب نتايج مبهرة ..
عزيزتي الرجيم اللي انا اتبعته بطيء و يباله نفس طويل لأنه مب شرات الانظمه العاديه اللي تنزل بسرعه الوزن و اول ما توقفين الدايت يرد الوزن دبل …
قبل ما تبدين الدايت لازم تفهمين طبيعة انسجة الجسم ،،
انتي لما تسوين الدايت تبين تخسرين من الانسجة الدهنية مب من العضل و و لما ينزل الوزن من العضل شي ينعكس سلبيا على شكل الجسم و مرونة الجلد خاصة اذا نزل الوزن بسرعه ..
و بناء عضل الجسم يعتمد على البروتينات (( اللحوم بأنواعها و الألبان و الأجبان و البيض.. الخ)) و مرونة الجلد نستمدها من الكاربوهيدرات (( الخبز و الأرز …الخ))
يعني لما تحرمين جسمج من هالامور تكون النتيجه جسم مترهل و انهيار في البناء العضلي و معدل حرق الدهون منخفض و المعروف ان العضل يرمم نفسه بسرعه يعني اول ما توقفين الدايت يرد الوزن بسرعه خياليه لان الوزن المفقود يكون من النسيج العضلي مب من الدهون …
بالاضافه الى ان الجسم لما ينحرم فجأة من السعرات الحرارية يحاول انه يعوض الفاقد بأنه يخفض سرعه حرق الدهون ،، عشان جيه تلاحظين مع الانظمه اللي تمنع الاكل فجأة ان الوزن ينزل بسرعه في اول الايام بعدين يوقف لانج حتى لو ما كنتي تاكلين ، الجسم نفسه ما يحرق لأنه يحاول يعوض النقص ،،
بتسئليني شو الحل ؟
الحل اللي انا اتبعته هو كالتالي :
*رجيم 6 أيام و اليوم السابع مفتوح
اليوم المفتوح عشان يرجع الجسم يسرع الحرق و ما يمر بمرحلة خمول
*النظام اليومي هو كالتالي:
6 وجبات يوميا
اكبر وجبه الصبح و اصغر وجبه قبل النوم ب2- 3 ساعات ع الاقل
ال6 وجبات 3 رئيسية و 3 وجبات خفيفة (( سناك)) و لازم ما يكون الفاصل بين الوجبة و الثانية اكثر من 3 ساعات لأن لو طالت المدة بين الوجبات يبطئ الجسم سرعة حرق السعرات الحرارية عشان يعوض النقص
اتبعي نظام حساب السعرات الحرارية ..
و لا تتجاوزين في اليوم الواحد اكثر من 1500 سعرة حرارية في أسوأ الحالات و خلي المعدل المتوسط تقريبا 1200 سعرة
*الصبح :لازم تكون وجبة الريوق هي اكبر وجبه في اليوم
على الريج اشربي عصير جريب فروت او كلي شرايح اناناس فرش او عصير اناناس مع ليمون بدون سكر و أو شاي اخضر مع زنجبيل و نعناع و كمون و ليمون او اي خلطة اعشاب تحبينها
استبدلي الخبز الابيض بالاسمر مع جبن قليل الدسم و حبة فاكهه حسب الرغبة ، ، او كلي الكورن فليكس الاسمر لانه بيحسسج بالشبع فترة طويلة مع حليب منزوع الدسم ، و حتى لو حسيتي برغبه في تناول قطعه جوكليت يفضل انج تاكلينها الصبح لان الجسم بيلحق يحرقها باقي النهار ..
*بعد الريوق بساعتين خذي وجبه ثانيه :روب منزوع الدسم او فراوله او صنطرة او شرايح يح او شمام او برتقالتين أو>>> شرايح أناناس أو سلطة فواكه>>>> ((متوفر في محطات بترول إمارات)) اذا كنتي اداومين و ما عندج وقت ،،يعني ع حسب مزاجج و الظروف
الظهر ترومين تسوين عيش اسمر يعني (( غرفة ملاس واحد)) مع صدر دجاجه مشوي مع خضار ع البخار و حاولي تتفنين في البهارات عشان تحسين بلذة الاكل ، او سمج مشوي مع خبز اسمر و سلطات ،، و اذا تحبين تطلبين من برع شي عند سب واي سندويجات دجاج مشوي تنفع للدايت او سلطة السيزر مال ماكدونالدز بس بدون الصلصة، و اذا تحبين و ممكن حبة بطاطا متوسطة الحجم مشوية مع سلطات بس بدون خبز (( اكيد بتستغربين)) بس الكاربوهيدرات ضروريه عشان ما يترهل الجلد
بعد الغدا بساعتين : سناك خفيف جزر او فاكهة او بسكوت قليل الدسم (( بتحصلينه في كارفور)) او جبس قليل الدسم او جوكليت قليل الدسم (( بتحصلينه في عيادة دكتور نيوترشن)) مع اني ضد النظام اللي يتبعه لانه يسبب ترهل للجسم او جاي مع سكر الرجيم .. الخ
المغرب : وجبة العشا : لازم تكون اصغر من وجبة الغدا و حاولي تمنعين فيها الكاربوهيدرات ممكن تاكلين فيها صدر ديايه مشوي او علبة تونا (( اللي بالماي و الملح مش بالزيت )) او ستيك او و تسوين كطبق جانبي روب مع خيار مثلا ….
* اذا حسيتي باليوع بعد العشا خذي سناك صغير من الفواكه او الخضار قليلة السعرات الحرارية: مثل الفراولة ، الصنطرة ، اليح ، الجزر ، الخس الخ
* حاولي تشربين لتر و نص ماي يوميا يعني غرشة مسافي من الكبار
* لازم تمشين يوميا ساعة متواصلة مشي سريع
* كلي الاكل ببطء و اشربي كوب من الماي قبل الاكل مب اثناءه و لا بعده
* شي كتب يحطونلج فيها نوع الاكل و كم سعرة حرارية فيه عشان تعرفين تحسبين بالارقام و ما تزيدين عن الحد المسموح ،،
مثال: كتاب >>> ألف باء الرجيم و التغذية الصحيحة ‘ مايا نوك بركات
انا ماخذتنه من كارفور و بتحصلين سايتات على النت فيها جداول توضح السعرات الحرارية في الأكل بعد ..
مثلا:
اذا انتي كلتي في وجبة وحده دجاج مشوي مع عيش و سلطه و تفاحه
مكتوب ان حبة التفاح فيها 50 سعرة حراريه
100 جرام دجاج مشوي 300 سعرة حرارية
100 جرام ارز ابيض 90 سعرة حرارية
=440 سعرة حرارية
و انتي لازم ما تاكلين اكثر من1200 سعرة حرارية و في أسوأ الحالات 1500 سعرة حراريه في اليوم عشان ما يزيد وزنج
فهمتوا الفكرة ؟؟
اذا عندكم استفسارات ثانية انا حاضرة .. و بالتوفيق للجميع ان شاء الله
و لا تنسون تدعولي دعوة حلوة بظهر الغيب و ان شاء الله لكم مثلها و احسن 
المشاركة الأصلية كتبت بواسطة خبز رقاق 