السلام عليكم و رحمه الله وبركاته
بدون مقدمات انا ابا اقولكم قصتي في اخر ثلاث سنوات تقريبا من حياتي
فالبدايه انا تزوجت من شخص من العايله وزواجي كان برضاي ورضا اهلي واهله
و كنا نحب بعض حب مب طبيعي والحمدالله حياتنا ماشيه صح .. وكان دوم يحذرني من الناس وكلامهم
وفي وايد ناس من الاهل ( من بعيد) ماكانو راضين ع زواجنا وتم يطلع الكلام عن طليقي
رغم انه حذرني كذا مره اني ما اسمعلهم وفعلا الريال كان واضح معاي بكل شي لكن انا حزتها
ماكنت بوعيي كنت اصدق الكل الا هو وكنت اهتم بالكل الا هو .. وف يوم من الايام قالي
اخافج اتضيعين مني بسبب كلام الناس واهتمامج لهم ،وانا والله ماسويت شي يضرج ولا افكر اضرج حتي
هالكلام صارله ثلاث سنيين وللحين يرن باذني رن ! لاني فعلا ضيعت اغلى شخص واكثر شخص احبه بسبب
اسباب تافهه حتى انا مب متاكده من صحتها ! مافطنت بهالكلام الا بعد فتره طويله
بعد طلاقي الاول بكم شهر انخطبت مره ثانيه ووافقت بحجه اني اطلع من الحزن ومن فشل زواج قديم
للاسف هذا كان تفكيري وهو 100 ٪ غلط ! كنت ابا ارجع استانس و اعيش مره ثانيه وقلت يمكن انسى طليقي
لكن ماصار ! وزوجي الثاني طلع انسان سيء بكل ماتحمله من كلمه ! ولخوفي من الطلاق سكت فتره !
بس ماتحملت .. حسيت ان الزمن يعاقبني لاني يمكن ظلمت زوجي الاول وصدقت فيه العذال والناس !
وايد عانيت نفسيا مع زواجي الثاني وعرفت قيمه كل صغيره كان يسويها لي زوجي الاول
سبحان الله حسيت ان الشي كانه درس ! وعبره لي ! وتعلمت وايد وايد اشياء ومنها ! ان الناس كلامها
مايفيد وعادي يكون كله جذب ف جذب بس عسب يخربون حياتج وعادي جدا لنهم يشوفونج سعيده
يحقدون عليج ويحسدونج !
عقبها اتطلقت من زوجي الثاني وهو كان مغصوب على الزواج اصلا وعنده علاقات وخرابيط ..
باختصار انا ابا ارجع لزوجي الاول .. وكلمته بهالموضوع وانا ادري انه يبيني ولين الحين يحبني
وماتزوج من عقبي اصلا وقبل ما نتطلق كان يقولي بياخذج رييال غيري وبترجعيلي واعرفي اني بترياج
كان دوم جي يقولي وانا ماقدرته وارخصته واول الناس اللي بعتهم هو ! مع انه اشتراني بماي عيونه
لكن المشكله الاهل ! كيف برجع اقنعهم و انا اللي كنت مصره ع الطلاق !
كيف بقولهم اباه بعد ماقلت فييه وفيه … كيف باخذ موافقتهم بعد ما حاولو يصلحون بيني وبينه
وانا اللي كنت رافضه الشي رفض نهائي ..
مرت ع طلاقي منه سنه ونص وهو كل يوم ف بالي ، سنه ونص وانا احس ان فراقنا توه امسس !
سنه ونص ومافي احد ف قلبي غيره ..
مرت علي ليالي الحاجه والشوق والحنين وماكان عندي غير الصبر وسيادتي ..
وهو حاله اردى عن حالي .. وحزنه اكبر عن حزني وخصوصا اني تزوجت من عقبه ..
وحاليا نحن مانكلم بعض لين اكلم اهلي بالموضوع واخذ موافقتهم واخبره
لان بوقت الطلاق وايد صار شد بينه وبين ابوي وهو مايبا يتعرض للاهانه مره ثانيه
يباني اتاكد ان الكل موافق عشان يتقدم ..
تتوقعون اذا صارحت اهلي بيرضون ؟
لان حرام حبنا يضيع انا تعلمت وهو تعلم والدنيا صفعت بنا يمين ويسار
*تحفظت علي وايد تفاصيل من القصه واتمني تفهموني وتكتبون رايكم كيف بقدر اقنع هلي* ..