الوسم: التايلانديه

سويت اليوم طبخه اتخبل عليها ريلي.. خفيفه وسهله وطعمها خبااال

طبعا المقادير لشخصين.. يعني حق ليله رومانسية إتأكلون فيها بعض واتسولفون سوالف حلوه.. واتعيشون جو دافي.. طبعا ما وصيج بالشمووع والعصير الفريش.. وديزيرت خفيف بعد الأكله..

عيشتج جو هههه.. زين.. عشان اتعيشين ريلج جو يوم اتسويله الأكله وتدعيلي..

نبتدي بالمقادير

بصله صغيره مقطعه مربعات
٢ طماط متوسطات
نص باذنجانه متوسطه
حليب جوز الهند coconut milk
ملعقه صغيره نشا مذابه في فنجان ماي
قرن فلفل
فص ثوم
زنجبيل
ربيان منظف ومقشر
عصير ليمون حامض أو ليمونه حامضه
خل أبيض
بهارات
ملح

بعد ما انغسل الربيان عدل من القشور.. انذر عليه شوي ملح وكركم وانخليه لين ما انسوي الخلطه اللي بنحطها عليه.. الخلطه هي عباره عن الفلفل والثوم والزنجبيل.. انحطهن فالخلاط..
انغسل الربيان عن الكركم والملح وبعدين انحط عليه الخلطه وعصير الليمون وخل أبيض شوي..

انخليه في خلطته لين ما يحين وقت أنا نضيفه فالطبخه.. طبعا يفضل نص ساعه فالثلاجه بعد ما اتلحفينه ببلاستيك شفاف..

الحين نبتدي نطبخ على نار هاديه.. اذا عندكم تاوه غزيره شوي يكون أحسن.. أنحط فيها زيت نباتي شوي.. ونقلى مكعبات نص الباذنجانه.. ما نبغي انحمرها وايد بس شوي عشان بنرد نطبخها في الكاري بعدين.. انشلها وانصفيها من الزيت على ورقة كلينكس المطبخ.. في نفس التاوه انحط البصل لين ما يبتدي يذوب وبعدين انزيد عليه نص طماطاه وحده وباقي الطماط انحطه فالخلاط عشان بنستخدمه بعدين..

لما يبتدي يذوب الطماط انضيف عليه الربيان بالخلطه مالته كلها وانخليه على النار لين ما ينشف شوي عنه الماي.. وبعدين انحط عليه البهارات اللي انتي اتحبينها.. أنا حطيت قرفه فلفل أسود بزار عربي ورقة غار وكمون.. خلطيهم مع بعض شوي وبعدين ضيفي الطماط اللي سويتيه فالخلاط.. نصيحه.. لا اتحطون ملح لين آخر الطبخه عشان تتأكدين أنه كمية الملح مناسبه للمكونات كلها..

بعد ما انخلي ماي الطماط يغلى شوي ويا الربيان.. نضيف حليب جوز الهند.. ممكن تستغنين عنه ببودره جوز الهند اللي تضيفيلها ماي.. وانحط فنجان الماي اللي ذوبنا فيه النشا.. واتخلينه على النار لين ما اتحسين أنه الربيان انطبخ عدل وانه الصالونه فيها كثافه شوي.. انضيف عليها الباذذنجان المقلاي وانخليه شوي ياخذ النكهه وانضيف الملح.. وانسكر عليه النار..

وهاذي هي كل الطبخه.. وبعدين بتتهنون بأحلا عشا..
أنا سويت اشوي ستيكي رايس اللي هو العيش اللين.. وايد حلو معاه.. بس تراها بعد تنفع شوربه اذا قطعتي الربيان صغار..

وبالعافيه

شكله لذييذ

عووافي ع قلووبكم

شكله عجيب يمي يمي