الوسم: النزيف

ساعدووووووني وزني نزل بعد النزيف

السلام عليكم

انا حامل من فترة وياني نزيف قبل اسبوعين وعطتني الدكتورة ابر تثبيت… لين الحين ماخذة ثلاث ابر من غير حبوب التثبيت

في هذي الفترة كان وزني 64 وبعد النزيف ومن كثر اللوعة استويت 57 فابا اعرف شو الاكل المفيد في هالحالة لانه استوالي التهاب بول من كثر ما قل اكلي وقلت السوائل في جسمي؟؟؟؟؟؟

اللي خذت ابر تثبيت كم ابرة احتاجت ؟؟؟؟

للرفع

ماعندي فكرة!!
سألي دكتورتج لانها بتكون لها خلفية اكثر!!
الله يثبته لج ان شاء الله

ماعندي فكرة عن النزيف…

بس أنا نفسج كنت 64 بداية حملي ونزلت لين 58 والسبب اللوووعة والترجيع وهالسوالف الأرف >.<
عالاسبوع 15 بدت تخف عني وتعدل أكلي شوي ….. والحين وزني بادي يزيد

يمكن وزنج نزل من الوحام… انشالله يخف عنج وتبدين تزيدين ^__^
عن ابر التثبيت ماعندي فكرة اسمحيلي…

النزيف أثناء الحمل ؟؟ مسببلي قلق !

السلااااااام عليكم ورحمة الله

شحالكم خواتي

اللي حملت اكثر من مره

وحصل وياها نزيف متى توقف وكيف وليش يستوي؟

انا اول حمل اجهضت في الثاني وهذا ثاني حمل وصار نزيف في الشهر الثالث ومستمر بس تحول من نزيف دم احمر الى بني بالرغم اني ارتاح وماسوي شي
وصراحه مسببلي قلق ونفسيتي تعبانه ؟

اريد اطمنوني بتجاربكم ؟

ولكم مني ارق تحيه

ودعوات صادقة عن ظهر الغيب

والسموحه

اختكم

شاعرة شجن

الصــــراحة انا مب متزوجة ،، بس شفت محد مارد عليج

قلت بخبرج عن بنت عمتي ،،

بنت عمتي من ماحملت وهي تنزف يحليلها ، والدكتــورة منعتها من الحركة وقالت لها

ارقدي وريحي عمرج، حتى خذت اجازة من الداوم ..

، لين ماوقف النزيف الحمدلله ، وهي الحين بالرابع .. ^^

انتي ماعليج الا تسيرين للدكتورة هي اخبر بهالسوالف واكيد

كل حرمة غير عن الثانية ..

وربـــي يثبت حملج ..

والله ياختي ماصادفني في حملي الاول الحمدالله بس انا اقلج لاتغلطين غلطت مرت حميي صار لها نزيف وهي مامخبره حد انها حامل وصارت تعالج نفسها بس مع ذالك ماخبرت حد وتشتغل تنظف حجرتها وتغسل ملابسها وريلها والدم يتوقف ويزيد ويخف وعلى حالها يلين ماجافت انها ماتقدر تتحمل خبرت عمتي ويوم ودوها المستشفي عقب البيبي ،،

فالنزيف مب زين لاي حامل راجعي الدكتوره فورا والله يتمم حملج على خير ان شاءالله

الله يعينج

اشربي ماي مخلوط مع 1 ملعقة نشا زين يوقف الدم وروحي عند الدكتورة احسنلج

شو تترين حبيبتي سري المستشفى عالطول

انا والله الحمل الاولى خذت ابر تثبين وحملي هذا حبوب تثبت …

حبيبتي انا مثلج ولين الحين اعاني اول ياني نزيف
وقالولي حاولي ترتاحين لانه المشيمه عندي نازله وانا الحين ف الرابع وانا اول مره يصيبني
يايبه عيال من قبل ما استوالي جذه
واتحول الحين من دم الى دم اسود(عزكم الله)
بس انتي حاولي اتسيرين المستشفى بس اتحملي يفحصونج تحت لانه مب اي وحده شاطره ممكن يفتحولج الرحم ويطيح
والله يثبت حملنا ان شاء الله

قلبي ينزف وما اظنه يوقف هالنزيف الا بمساعدتكم

السلام عليكم ورحمة الله وبركاته
عزيزاتي انا ما بطول لكم بالمقدمات انا بس ابكتب لكم مشكلتي اللي حاسه ان مفتاح العلاج بايديكم

انا عارفه بعد ما اكتب لكم قصتي كثير منكم راح تنظر لي نظره ثانيه بس اتمنى انكم ما تخذلوني بالحلول حتى لو انا كنت الغلطانه انا ما فكرت اكتب قصتي بهالمنتدى الا لاني عارفه انكم ما تخذلون احد احتاج لمساعدتكم
اولا
عشت حياة متشتته من صغري عانيت لان الله كتب اني انولد والقى امي زوجه ثانيه وابوي عقليته عقليه محدوده
المهم مرت الايام وكبرت واكتشفت ان امي تعاني من مرض وهو الخيانه كنت اعرف انها تخون ابوي وما ادري اعذرها ولا لا امي عاشت حياه قاسيه امي عاشت مع ريال حرمها من كل شي صح انه ما تجرأ عليها ولا ضربها ولا شي بس حرمها من اهم شي وهو الحب والحنان اللي ادور عليه كل حرمه وانا كلما امي زادت بهالشي وانا ثقتي بنفسي وبغيري تنعدم مادري شو السبب بس هذا اللي حسيته
انخطبت لواحد ما توقعت ابد ان نكون لبعض وهو ولد خالتي دامت خطبتنا 6سنين وطبعا صارت من بينا مكالمات لين الله كتب وملكنا وما بخبي عنكم انها بعد كانت ايام صعبه علي لاني ما عرفت كيف اتعامل معاه ولا كيف اكسب قلبه واللي صدمني فيه اني اكتشفته انه كان يخوني ايام خطبتنا ووما قدرت اسوي شي غير اني اصارحه وصارحته ولقيت منه الكذب والله ستر وعدى هالموضوع على خير وانكتب لنا الزواج عقب شهرين من ملكنا وتزوجنا وانا من تزوجت وانا احس بالنقص مادري شو سبب هالنقص بس اللي اعرفه ان زوجي شمالي شرقي وبخييييييل جدا بمشاعره مرت الايام والشهور واخير وصلني احلى خبر بحياتي كلها ان في جنين يتكون باحشائي
بس ليش كلما ابغي الفرح يدوم يصدني الزمن
انا ما انكر
زوجي طيب وحنون واااايد بس ما يعرف يعبر عن مشاعره والحين انا صارلي 4 شهور متزوجه وبعدني احس بالضياع والنقصان
وصااار اللي ما كنت ابغيه يصير ابدا وهني مشكلتي الكبيره
تعرفت على شاب من النت طبعا وكانت من بينا احاديث بسيطه بالبدايه وانا اعرف مهما كانت الاحاديث المفروض اني ما اكلمه بس والله ما كنت اعرف شو اللي يجذبني له والله عانيت واايد حاولت واايد اني ابعد نفسي عن هالشي بس ما قدرت اقاوم لاني كنت اعاني من الحرمان من جهة زوجي كله مشغول الصبح يروح الدوام ويرجع على طوول على الجامعه ويرجع ع الليل والله حسيت اني خلااص بنفجر وكنت افرغ كل قهري من زوجي باني احاول اكسب هذا الشاب طبعا بعد ما تطورت العلاقه واعترف انه يحبني ووطلب رقمي وانا ما رضيت وضلينا شهر يمكن وهو يحاول معاي عشان الرقم وانا كنت رافضه وبلحظة ضعف عطيته الرقم وصرت احس بضيق كل يوم وانا اكلمه مرة وحده باليوم مع اني كنت استانس لما اسمع كلمات الحب منه بس والله عمري ما حسيت بالراحه لما اشوف زوجي داخل احس بسجاجين تطعني بذاتي وقلببي يصرخ انتي خاينه خاااينه خاااينه وعلى فكره انا من يوم عرفت بخيانه زوجي وانا ثقتي فيه معدووووومه و قمت اشك بكل شي فيه بطلعاته وبكل شي وطبعا صارت علاقتنا متوترة لابعد الحدود وقمت اعصب على اتفه الاسباب واحس اني خلااص على حافة الضياع والحين قاعده احاول اقطع علاقتي بالشاب اللي تعرفت عليه لما يتصل ما ارد عليه طيعا هو ما يتصل الا لما انا اطلب بس لاني انقطعت عن المسن من فترة قام يتصل ويطرش مسجات وانا ما ارد بس والله تعبت خلااص لاني مو عارفه كيف انهي موضوع هالخيانه ولان مو عارفه كيف اكسب قلب زوجي والله خلااص حاسه حملي ما بيكمل بسبب هالصراع النفسي اللي اعانيه ساعدوني ارجوكم ساعدوووووني وعطوني حلول تمنعني اني ادخل المسن عشان اشوف الشخص اللي ملى فراغي والله احاول كثر ما اقدر اني ما ادخل بس والله احس بفراااغ كبير عايشه بروحي بالبيت ومحد عندي وهذا من الاسباب اللي خلتني اتعلق فيه اكثر وساعدوني وعطوني نصايح اكسب فيها قلب زوجي اللي احسه بدى يمل من الحاله اللي نحن فيها وكله يدخل البيت وهو مكشر وما يرمس وياي الا نادرا لامن يعرف ان ماشي تفاهم ووالله مب عارفه كيف ارضيه ساعدوووووني الله يخليكم ساعدوني ولا تتركوني بمعاناتي بروحي
ملاحظه ::
نسيت اذكر اني اعاني من فراااغ كبير وحاولت مع زوجي اني اكمل دراستي بس رفض لان نحن ساكنين بالعين وانا قبلوني بجامعة العين بس رفض على كثر ما سمع عنها واحاول اني اروح اي مكان ثاني بس يقول انتي ما بحاجة الدراسه الحين

انتظر ردودكم وانا كلي امل انكم ما بتخذلوني &_&

الله يعينج أختي أتجربي من ربج..هو معينج ف هالوقت..محد بينفعج..
حطي ف بالج أن اللي تسوينه حراااام..لاتحطين لعمرج الأعذار حبيبتي..
ريلج تقدرين تكسبينه بالطيب إذا كان هو جاسي كوني أنسانه عون وسند له..

أنسي خيانته لأن مافي حد مايغلط..أنتي محطيه هالشي ف بالج عسب جي مب متقبلتنه..
وبشو بينفع المسن غيريه وسويه ايميل ثاني وكنسليه لاأدشين الجات ولاتردين على اتصالاته
ومسجاته مع الأيام بنسى…

استحضري ربج ف كل غلطه أتسوينها..ربج يشوفج ..

وأخيرا" فديتج مافي مشكله ومالها حل..
وحلها(الشكوى لغير الله مذله)

لا حول ولا قوة إلا بالله . . وااااااايد عندي كلام أقوله . . شي
منه يريّحج وشي منه جاف وايد ما أعتقد بتحبين تسمعينه مني
بس ما عندي إلا : اتقي الله يا أختي . . ولا تدورين أسباب لخيانتج
غير : غياب الخوف من الله . . الله يتوب عليج ويعينج يا رب
ويثبت قلبج

بسم الله الرحمن الرحيم

شحالج الغاليه ؟؟

اول شي يشرفني اني ارد عليج وانصحج..

اول شي انا مابعصب عليج ولا بسمعج كلام يجرحج لأنه كلنا نغلط ونتعظ من غلطنا والحمدلله انج عرفتي غلطتج قبل ريلج مايدري وتستوي مصيبه كبيره ..

اول شي ببدأ في الشاب اللي تعرفتي عليه فالمسن :انا بقولج اشيا تسليج وتضيع وقتج ..كل ماحسيتي انج تبين تدخلين المسن قومي صلي ركعتين وادعي أو قومي ادخلي المطبخ وسويلج طبخه صغيره تفرحين ريلج فيها (كيكه او حلويات أو حتى عشا بسيييط)
أو مثلا حسيتي نفسج ملانه وعندج وقت فراغ طويل قومي نظفي الحجره والحمام(انتي بكرامه ) او الصاله اي شي عندج عدلي الكبت شوفي الثياب اللي ماتبينها او اشياء مالها لزمه فالبيت ..

ادخلي المعهد اتعلمي انجليزي واذا انتي انجليزيتج اوكي اتعلمي شي ثاني ما شاء الله معاهد وايد فالبلاد وتخصصات وايده طبي وتخيري ..والله انا جي اسوي ادخل معاهد واخذ شهايد بتنفعج بعدين والله اسمعي كلامي ..

اذا ريلج ما يوافق تدرسين في هالجامعه شوفي جامعه ثانيه ..قوليله بشتغل في مكان كله حريم اذا ريلج من النوع اللي مايحب الاختلاط …. اخذي ليسن

أما عن زوجج : لازم لازم لازم كل يوم يشوفج غير مثلا يوم لابسه قميص نوم ويوم بجامه ويوم تيشرت الريايل يحبون الوحده للي ادلعهم وانتي لاتقصرين من الكلام الحلو واللبس مافي اسهل من هالشي لا تقولين استحي هذا ريلج ملكج انتي ماتبين وحده ثانيه ثاخذه عنج صح ولا انا غلطانه ..مثلا بي من الجامعه اكيد بيكون هلكان لآنه مب راقد سويله عشا من يديج الحلوه ..سويله ليله حلوه في الحجره ..غيري من شكلج او من شكل الحجره ..يوم الحجره تكون حمره ويوم خضرا وانتي تعرفين الحركات الباقيه ..

ولاتنسين الريال يحب الكلام الحلو والدلع انتي شوناقصنج حبيبتي قوليله كلام حلو وادلعي ترى الريال يموووت فالدلع ..

لاتبخلين على نفسج ولا عليه اشتريله هدايه من فتره لفتره خليه يحس انج تحبينه وتغيرين مشاعره اتجاهج..واذا كان بخيل لازم تخلين كريم بس شوي شوي ..يعني مصروفج الشهري يوصلج ولا درهم ناقص ..

مثلا فالويكند او ايام اجازته اطلعي معاه اتعشي برع او اتغدو برع ..سويله مفاجأه واحجزيله في فندق من مصروفج مثلا ..والله الريال بيتغير صدقيني مدام انتي في اول الطريق..

مثلا خليه ياخذ اجازه سنويه او حتى اسبوع سيرودبي برع سافرو البحرين قطر او حتى بلاد اوروبيه

اصبغي شعرج بدون مايدري وخليه يتفاجأ ترى والله انا مجربه الحركه قصيت وصبغت بدون مايدري ..

اسمحيلي افكاري متخربطه بس ان شاء الله وصلتلج المعلومه

والسمووحه

اختي باين انج صغيره

صدقيني هذا الي في المسن يتسلى لانه ها طبع كل شباب النت التسليه .ترضين تكونين تسليه؟

غيري باسوردج خليه شي صعب وايد اكتبيه في ورقه وخلاف شقي الورقه عشان ابدا هالايميل ما تدخلينه خير شر والولد طرشي له مسج قولي له خلاص لا يتصل لانه احتمال لو استمريتي يسوي لج فضيحه

وعن زوجج عطيه فرصه توكم 4 شهور عايشين مع بعض والخيانه هاي كانت ايام الخطبه الحين غير انتي حرمته والشيطان لو قص عليه مره ما بيقص عليه مره ثانيه ولا تقلدين امج ترا امج غلطانه لو كل حرمه ريلها ما يحسسها بالحب تخونه صدقيني الامارات كلها بتكون حريم خاينات لانه بطبع الريال ما يعرف يعبر هذا مب حل انج تدورين الحب برع البيت دوريه في بيتج بدل ما تضيعين وقتج مع واحد غريب جربي كل الطرق الي تخلي زوجج يتعلق فيج وما تعيشين حياة مثل الي عاشتها امج في الحرام والخيانات للاسف امج مب قدوه زينه عشان تقتدين فيها اتمنى ما تسمحين لهاي المهزله تستمر معاج ومع عيالج بعدج انتي حطي نهايه لهاي القصه المؤلمه جابلي ربج اكثر وتثقفي في وقت فراغج وحاولي مع زوجج انه يسمح لج تدرسين اصري على موقفج ورايج وان شاء الله نسمع عنج علوم زينه

يالله شو اقول وشو ارد عليكم
والله ادهشتوني بردودكم وبكيتوني بعد والله حاسه اني واايد بعيده عن ربي والله ياخذ الشيطان

وكنت اتوقع انكم تجرحوني بس ولا وحده جرحتني بكلمه بالعكس انتو صحيتو ضميري اللي كان نايم
والله هب عارفه شو اقووول ؟؟؟
دعواتكم اخواتي انا بحاجتهاا واااااااااااايد ادعولي ان ربي يقربني من زوجي ويخليه هو قرة عيني الوحيده وانا قرة عينه الوحيده بليييز لا تنسوني من الدعاء

ما عندي شي اقوله غير الله يعينج
ويوفقج بحاتج ويخرجج من الدوامه اللي انتي عايشتنها ويجعل زووجج قرة عينج الوحيده وانتي قرة عينه ياااارب

وبالتوفيق اختي

الأناناس و النزيف

السلام عليكم خواتي ..

اليوم كلت أناناس 3 قطع صغار و صار معاي نزيف .. هل هذا مؤشر خطر و شو أسوي ..؟؟

فيدوني لأني بجر و مب عارفة أتصرف.. للعلم إني ما أحس بأي ألم غير النزيف بس ..

؟؟؟؟؟؟؟؟؟؟؟؟؟؟؟

بسم الله عليج
فديتج سيري المستشفى بسرعه شو تتريين
ان شاءالله انها ولاده لاتخافين فديتج وطمنينا عنج

الله يقومج بالسلامه ان شاء الله هي علامه ولاده

المشاركة الأصلية كتبت بواسطة meemeee
بسم الله عليج
فديتج سيري المستشفى بسرعه شو تتريين
ان شاءالله انها ولاده لاتخافين فديتج وطمنينا عنج

بس أنا ما أحس بأي ألم .. عادي .. بس خيفانة من النزيف..

المشاركة الأصلية كتبت بواسطة barakaa
الله يقومج بالسلامه ان شاء الله هي علامه ولاده

الله يسلمج غناتي .. والله يسمع منج فديتج .. أبغي أربي بسرعة قبل ما يسافر ريلي يوم الأحد لأنه عنده دورة برع البلاد.. فديته يبى يشوف نونوتنا الأول .. (( ولي العهد)) ^___^

سيري المستشفى حبيبتي احسن

معجزة قرآنية في وقف النزيف. .

بسم الله الرحمن الرحيم

الحمد لله رب العالمين والصﻼ‌ة والسﻼ‌م على أشرف المرسلين سيدنا محمد وعلى آلة وصحبةومن تبعة بإحسان إلى يوم الدين

.أمـــــــــــــــــــــــا بعـــــــــــــــــــــــــــــد.

السلام عليكم ورحمة الله وبركاته

 موضوعنا اليوم هو معجزة قرآنية بكل المقاييس في ( وقف النزيف ) .نعم هناك في العالم أكثر من 65% من النساء المتزوجات يعانين من النزيف الرحمي .وأكثر الحاﻻ‌ت ﻻ‌ تستجيب للعﻼ‌ج الطبي مع جميع محاوﻻ‌ته وبكل تقدمة التقني عﻼ‌وة على ما يسببه هذا النزف من حالة نفسية سيئة وسؤ في العﻼ‌قة الزوجية و غير ذلك الكثير.
 ولهذا أقدم لكي يا أمي وأنت يا أختي وأنت يا أبنتي أقدم لكن هذا الحل القرآني المعجزه .لوقف النزيف إفعلي الآتي :
أحضري كمية من الماء الطاهر وحوالي ربع كيلو جرام من زيت حبة البركة المعطر (مضاف علية رائحة طيبة )وصلى ركعتين لله بنية الشفاء وأخرجي صدقة أيضا بنية الشفاء فلقد قال صلى الله عليه وسلم داووا مرضاكم بالصدقة.
ثم أقرأ اﻷ‌تي :
سورة الفاتحة. . مرة واحدة
سورة البقرة من الآية رقم 1 إلى الآية رقم 5. . مرة واحدة
سورة البقرة الآية رقم 102. . مرة واحدة
سورة البقرة الآية رقم 164.. مرة واحدة
سورة البقرة الآية رقم 255. . مرة واحدة
سورة البقرة من الآية رقم 284 إلى الآية رقم 286. . مرة واحدة
سورة هود الآية رقم 44. . سبع مرات
سورة الهمزة. . مرة واحدة
سورة الفلق. . مرة واحدة
سورة الناس. . مرة واحدة
سورة الإخلاص. . مرة واحدة

طريقة التنفيذ :
أشربي كمية من الماء المقروء عليه ثم استحمي بالباقي بعيدا عن دورة المياه ثم دلكي الثلث اﻷ‌وسط من الجسم بزيت حبة البركة المقرؤ عليه لمدة ثﻼ‌ثة أيام متتالية ثم ليلة بعد ليلة ثم ليلة بعد ليلتين.
سيقف النزيف إن شاءالله وبفضلة.
أسأل الله العلى القدير لي ولكم العفو و العافية وأعوذبالله من شر نفسي وسؤ عملي..

منقول مع التعديل الشخصي. .

جزاااااااااااااكي الله خيررر

ما شا الله

الله يسهل علينا ياررب

كلامك صحيح وانا جربت القران مع النزيف عندي نزيف استمر اكثر من عشر سنوات والله الدوره تجلس معاي اسبوعين ونزيف شي مش طبيعي وجبت وحده تقرا قران وقرات علي القران اكثر من ثلاث ايام وعطتني المسك الاسود اعطر ملابسي قبل النون وباذن الله وقف النزيف والحمد لله ارتحت اول كان دايما دمي نازل وتعبت والحمد والشكر لله تعالى

يزاج الله خير

سبحان الله

ذبحنى النزيف

خواتى أرجوكم ساعدونى دلونى على دكتورة زينة آنة كانت عندى مشكلة فشل مبايض ومنقطعة عنى الدورة وقال لى الدكتور انج مستحيل تحملين وكنت محط تجارب عند الدكاترة كل واحد يجرب فينى ولما يكتفى يقول خلاص ما فى فايدة وفى الأخير حصلت على عطار جزاه الله ألف خير وما قصر عطانى بحول 18 نوع من الأعشاب والحمدالله صرت أوكى وسويت فحص وقالو هرموناتج الحين صارت أوكى وكل من مستغرب بس الى صار أن الحين قامت الدورة تجى كل 15 يوم ومب عارفين السبب ورحت الى دكتورة فقلت لها أن نزل على دم ولما أفحصت من سوء حظى وقتها ما فى شئ وبعد ما رجعت البيت رجع نزول الدم مره ثانية وأتصلت عليها أقول لها فقالت أعتبريها دورة وتعالى لما تخلص آنة أبى أعرف السبب وشنو الغلط الى صار والله صار لى على هذى الموضوع 4 سنوات وكل دكتور يطلع أختراعاته على ما أدرى خاطرى أحد يريحنى خاطرى ربى يرزقنى بالطفل أسعد فى زوجى والله تره كاسر خاطرى صج أهو ما يتكلم بس والله أنى حاسة فيه أدعو لى يا خوات وربى لا يحرمنى منكم

الله يشفيج و يرزقج من نعيمه
عليج بدعاء اختي
وان شاء الله ما بيضيع تعبج
اجر و عافية

المشاركة الأصلية كتبت بواسطة الجوهرة المصونة
الله يشفيج و يرزقج من نعيمه
عليج بدعاء اختي
وان شاء الله ما بيضيع تعبج
اجر و عافية

عندا في بوظبي ادل كمن دكتوره بس دبي والله ما اعرف

أختي بقولج على نصيحة أنا دخلت على مدونة كثيرة للعلاج بالرقية وأنا مشتركة فيهن من فترة طويلة وقريت كثير من الحالات اللي أنت مثلها واللي ما عنده عيال ومافيه شي تعرفين يكون هذا الشخص محتاج لعلاج بالقران أكثر من الاطباء وبعد الله رزقهم عيال نتيجة العلاج مع أن الاطباء قالولهم أنتوا ما بتيبون عيال فانت أشتركي أو حاولي تستخدمين العلاج بنفسج وأذا بين أن له تأثير معانته أنت محتاجة للرقية وإذا تبين تعرفين الطريقة خبريني وأنا بطرشلج على الخاص

عندج الدكتورة منى تهلك مواطنة في مستشفى الوصل واييد زينة "استشارية"

ماعرف والله .. بس بغيت ادعيلج انه الله يعافيج و يشفيج يا رب ..

الله يعافيج ويرزقج بالذريه الصالحه

بعد الاجهاض متى حملتي ؟؟ وكم استمر النزيف ؟؟

السلام عليكم ورحمه الله وبركاته

أخواتي عزيزاتي . ..
شخبار الصيام وياكم .. عساكم بخير وسهاله يا رب ..
بدش في الموضوع على طول ..
أنا أجهضت في أول رمضان وكنت في أول الشهر الثالث ..
المهم النزيف مستمر معاي كان لين قبل أمس وأمس واليوم لاحظت انه مب دم اللي ينزل بس افرازات بس لونها بني غامج !!! ما ادري شو تطلع ؟ المشكله ريلي محد وما عندي حد يوديني العياده حاليا فمحتاره ؟؟ للعلم تراهم ما سوولي تنظيف بعد الاجهاض قالولي ما تحتاجين !!
المهم أبا أعرف المفروض الدم كم يستمر بعد الاجهاض ؟؟؟
ومتى أقدر أصووووم .. أنا ناويه أصوم بصراحه من باجر .. لأني أحس اللي ينزل شي بسيييط وبعدين شكله التهاب لانه مب دم بس لونه غريب بني غامج ؟؟
و بعدين متى المفروض الوحده تحمل بعد الاجهاض .. دكتوره في عياده راجعت عندها قالت لي بعد ثلاث شهور و في المستشفى قالولي بنخبرج بعد ما تيين المراجعه بعد ست اسابيع ؟؟

أفيدوني بتجربتكم بارك الله فيكم …

والله يسهل على كل حامل حملها ويقومها بالسلامه يا رب
واللي مب حامل ربي يرزقها ياااا رب ..

تحياتي لكم ..
بثــينه

حبيبتي الله يعوضج إن شاء الله وان كان عن الحمل عادي تحملين على طول او تأجلين الحمل شهر أو شهرين أو ثلاث شهور ونصيحة لج خليها بعد ثلاث شهور وخلال هاذي الثلاث الشهور أحرصي على أكل حبوب الفوليك اسد وياحبيبتي أنتي ليش ما تصومين وتصلين ترى هذا الاجهاض ما يمنع الصيام ولا الصلاة لان يوم انتي أجهضتي كان الجنين ما فيه روح وانتي اللحين ما تعتبرين في فترة نفاس رجعي يا حبيبتي صلي وصومي حتى لو كان ينزل عليج دم وهذا الكلام عن تجربه

الله يعوضج خير ياااارب ويرزقنا معاج بالذريه عاجل غير اجل ياارب العالمين

بس عن اللي ينزل لج حاولي تروحين اقرب عياده وتشوفين هل هو دم او التهاب لاسمح الله
وبعدها تقدرين تعرفين اذا بتصومين ولا لا

لانه مايصير صيام وبدون طهاره

ربي يجزيج الجنه

هلا حبيبتي

الله يعوض علي وعليج
الدم إلي ينزلج هذا مب بقايا ما النفاس
وهذا عادي ما يدل على إتهاب صبري وتطهري وأبدي صومي
لا تستعلين عشان تكونين مرتاحه لما تصومين إن صيامج ينقبل

حاولي تعاملين نفسج كانه في نفاس
يعني اشربي حبه الحمراء اوحلبه..الاشياء حاره الي تشربها الي مربيه

انا يوم عقيت ..امي سوتلي نفسي شيء كاني مربيه والحمدالله..ماطولت..

عادي ارتاحي ثلاث شهور..بعدين حملي افضل لج

الله يعوضج خير

أختي انتي اجهضت ف بداية الشهر الثالث اعتقد انج عادي تصومي وتصلي

لانه الجنين مب مكتمل الخلق (سألي ف هالشي لاني انا مثلج عقيت من بداية الشهر الثالث

ومااحتجت تنظيف وكنت اصلي لاني سالت ف هالشي وسويت بحث ف النت بعد وطلع لازم اصلي

وكيف تعرفين اذا مكتمل الخلق ولا لا ؟

شوفي اللي عقييتي عباره عن لحمه وانسجه ولا شكل جنين ؟

اذا شكل انسجه يعني المفروض عادي تصومي وتصلي

واذا شكل الجنين يكون اللي نازل دم نفاس وماعليج صلاة وصوم

بالنسبة لأسألتج
انا الدم لس اسبوع تقريبا

وماشاء الله ماكملت شهر من عقيت انا حملت مرة ثانيه واكثر اللي يعقون يحملون بنفس الشهر

بس بعضهم الرحم مالهم يحتاج راحه 6 اشهر خاصه اللي وايد تجهض او تتعب بسرعه

والله يعوضج

لازم اصلين وصومين..وسألي اذا حبيتي تتأكدي

الله يعوضج

دم اسود ————بعد النزيف ؟؟؟؟؟؟

هذا موضوعي الاولي :
http://forum.uaewomen.net/showthread.php?t=836161

من بعد النزيف الاول اللي كان لونه احمر خذت فوليك اسيد وحبوب تثبيت

بس للحين ينزل مني دم اسود ع شكل قطرات خفيفة

بس احيانا تكون ع شكل سائل..(

يعني لما اتغسل واتنشف بالكلينكس اشوف سائل بني غامج ع اسود

حرمة اخوي قالت هذا معناه بقايا الدم اللي نزل وان نهاية الافراز

قلت لها بس هذا طول معاي وايد

الحينه بكمل 3 اسابيع من النزيف

وللحين مستمر معاي

والله تعبت

دعوااتكن لي بالحمل الثابت والطفل السليم المعافى الصالح المصلح وان يكون قرة عين لي ولوالده وان ينفع الله به الامة

الله يثبت لج حملج يااارب …. ويتمم لج على خير ….

اللهم ارزق كل وحدة تتمنى الحمل بالذرية الصالحة عاجلا غير آجل اللهم آمييييييين

اللهم عاملنا برحمتك

وبشر الصابريييين

اللهم إني أحمدك على كل المحامد ما علمت منها وما لم أعلم وأشكرك على كل النعم ما علمت منها وما لم أعلم.

ربي لا تذرني فردا وأنت خير الوارثييييييين

الله يثبت حملج يا رب

الله يحفظ جنينج ويكمل حملج ع خير وروحي لدكتورتج افضل اهي ادرى فحالتج لا تهملي الموضوع

الله يثبت حملج الغلا

الله يثبت حملج يارب
سيري لدكتورتج و اطمني احسن لج

الله يثبت حملج يارب
تتاكدين من الدكتوره احسن شي

الخدامة والنزيف المستمر

السلام عليكم بنات وحريم
انا عند اختي الله يسلمكن خدامة اندونيسية من اربع شهور ما صلت الا اول خمسة ايام وبعدين يتها الدورة وماوقفت عنها لين اليوم وايد يا بنات ضعفت الخدامة وهي المشكلة ما تفهم عربي ويوم يبنالها وحدة اندونيسية تفهم عربي قالت هاي كانت تاخد ابره في ابلادها ومب عارفين شو اسوي وياها

حرام قولي حق اختج توديها المستشفى على طول

4 اشهر حرام

نحن اذا شفنا الخدامة في حمى والا زكام نوديها المستشفى,, واختج صابرة 4 شهور
والله حرام ,,, مب زين ترا هاي انسانة بعد

استغفر الله

ممم نفس حالته شغاله كانت عند ناا بس سيده وديناها المستشفى وقال لها الدكتور انيتي ماخذه ابر لمنع الحمل وقالت هيه لانها ما كانت تبا تحمل ومفعول ها الابر اضن يتم اربع سنوات

عطاها الدكتور حبوب وقال دوم ها الندونسيات يسوون جيه وبعد الابر تحسنت واايد

رحموها عالجوها فقيره

عالجووووووووووووووها حرام 4 شهور وايد

هاي انسانة بعد لا تتاخرون عن تزيد حالتها سوء

المشاركة الأصلية كتبت بواسطة عواااشه
ممم نفس حالته شغاله كانت عند ناا بس سيده وديناها المستشفى وقال لها الدكتور انيتي ماخذه ابر لمنع الحمل وقالت هيه لانها ما كانت تبا تحمل ومفعول ها الابر اضن يتم اربع سنوات

عطاها الدكتور حبوب وقال دوم ها الندونسيات يسوون جيه وبعد الابر تحسنت واايد

بس ليش تاخذ ابرة منع الحمل في بلادها وقبل لاتيي تشتغل .؟؟

في بلادها يمكن انها تحمل من ريلها اذا كانت معرسه بس دامنها يايه تشتغل تضرب ابرة منع الحمل ليش ..؟؟

والله هالخدامات ينخاف منهم خاصه الاندونيسيات

ليش النزيف

شو أخباركم أنا أول لما كنت حامل حوالي أربع مرات ضاري نزيف بس ولدي حمدالله سليم وربيت جبت أحلا ولد الله يخلية لي بس صدمة كبيرة حملت بعد أربع شهور ضاري نزيف أنا كنت بهند رحت. عيادة دكتورة ما سوت سونار قلت عندي نزيف غطتني أبرتين لأسف. سقط جنين بعد أبرتين بس أريد أعرف ليس يصير لي كل مرة نزيف حرام ليش

للرفع … ما أعرف

ماعندي اي فكرة عن الموضوع..بس حبيت ارد واسئلى الدكتورة افضل لج

راجعي الغالية اخصائية نسا وولادة أحسن

أن شالله ا

الله يرزقج بالحمل السليم المعافى يااااارب ….

للرفع

اللهم ارزق كل وحدة تتمنى الحمل بالذرية الصالحة عاجلا غير آجل اللهم آمييييييين

اللهم عاملنا برحمتك

وبشر الصابريييين

اللهم إني أحمدك على كل المحامد ما علمت منها وما لم أعلم وأشكرك على كل النعم ما علمت منها وما لم أعلم.

ربي لا تذرني فردا وأنت خير الوارثييييييين

شكورة