السسلام عليكم ورحمه الله وبركاته
هلا خواتي – من فترة طرحة مشكلة ربيعتي – بس اليوم بحط مشكلتي
وأسمحولي اني بطول عليكم – بس والله اني صبرت وتعبت لدرجه ان الصبر مل مني – ندخل بصلب الموضوع.
انا انسانه كنت محيره (محجوزه) لولد عمي من ايام الثانويه وبعد ما خلصت ودخلت الكليه ملج على في ثاني سنه على اساس اني لما اخلص كلية نتزوج المهم اني قبل ما اخلص الكليه تقريبا ب6 شهور انفصلت عن ولد عمي بسبب انها ما يقدر يصبر ومن هذا الكلام الفاضي وراح وتزوج وحده ثانيه بعد ما خلصت انا كليه و سبحان الله ان بليلة عرس ولد عمي تعرفت على أم ريلي ( الحالي) وخطبتني لولدها بالاسبوع اللي بعده وملجنا ومشت الامور بما يرضي الله كنت طايره من الفرحه ان رب العالمين عوضني بأنسان مثله وربي يابنات اني انحسد عليه بنات العائله كلهم يقولوا لي ان امي داعيه لي لانج اخذت انسان مثله ( وأنتي تعتبرين مطلقة) ولد حسب ونسب ومنصب مرموق وما شاء الله عليه جميل ( بس انا أحلا منه أكيد) (الكل يقولي ان عيالنا بطلعوا حلوين)
ولله الحمد الحينه صار لي تقريبا بحدود 3 شهور من ملجة.
المشكلة ظهرت بعد ما سافر ريلي ( كان بعد ملجتنا بشهر) بحكم دوامة.
و ولد عمي طلق زوجته وهم حتى ما كملوا شهر ونص – بعدها صار ولد عمي يطرش ناس علشان يتوسطوا ويقنعون اهلي انه هو مستعد يدفع لريلي كل درهم صرفه على بس يطلقني علشان هو ياخذني وكل يوم يطلع لي بسالفه شكل.
طبعا ابوي واخواني رفضوا هالكلام وانا قبلهم اصلا رافضه (حتى لو ما كنت متزوجه) – المهم الكلام وصل لريلي والله يابنات تغير على 180 درجه ما اعرف كيف اتصرف معه مرات يقعد يجرحني برمسه اونه انتي الحينه مستانسه ان في مغرم ولهان يحارب كل شي علشانج شو تبين بحبي انا بعد – بعدها يرجع يعتذر ويقول كلامه كان حزت ضيق – انا من طبعي وايد وايد صبوره ( حتى هو يعترف بهذا الشي) بس والله تعبت من الصبر.
قبل كنت احس بحبه وشوقه ولهفته على من طريقة تنفسه اذا كلمني والحينه صرت احس انه يكلمني لانه هذا الواجب او المفروض عليه يسويه – اقعد اسولف وأحاول اضحك معه وهو وايد وايد جاف معي وبارد
قبل كان يتصل بي مرتين باليوم غير المسجات والحينه نكمل اسبوع ما أسمع صوته.
قبل كان لما يكلمني يتفداني وينادني ماماتي الحينه ابد وايد عليه اذا قال اسمي.
في مره سألته انت تثق بي قال لي أكيد بس ما أثق باللي حواليج.
صرت كل ما اتصل به يقولي مشغول و قبل والله لو يكون مشغول يفضي نفسه علشاني.
اقول بخاطري اوكي برايه ما بضغط عليه بس انا مالي ذنب اتحمل كل هذا.
أمس اتصلت به لان ضاق صدري ابا حل – قلت له وبكل هدوء فلان انت تحس اني انا احبك واباك ولا لأ؟ قال لي قال لي أكيد احس . قلت له وانا عارف انك تحبني بس ليش تعاملني جذيه؟ قال لي بكلمج بعدين لاني مشغول ولحد هذي الساعه ما سمعت منه شي. – يعني حاليا بكمل شهر وانا مستحمله وصابره على هالعذاب
مرات اقول بخاطري بقول لأهلي ومرات اقول اني بحلها بروحي
دخيلكم ساعدوني والله تعبت ما ادري شو اسوي.
الحمدلله اني يومي كله اقضيه استغفار ودعاء له بالهديه
المشاركة الأصلية كتبت بواسطة كوكب_الشرق 
