الوسم: الثقه

ثقة الإنسان بنفسه هي واحدة من أهم العوامل التي تساعد على الوصول بالإنسان إلى أعلى درجات الرّقي و التقدم، حيث أن الثقة بالنفس تعطي الإنسان شعوراً بالكمال المطلوب لتحقيق جميع النتائج الايجابية، كما أن الثقة بالنفس تعطي الإنسان احساساً بعدم النقص، الأمر الذي يعطي الإنسان إحساساً بالراحة .يعاني البعض من قلة الثقة بالنفس، الأمر الذي يؤثر سلباً على علاقاته الخارجية، كما أن قلة الثقة بالنفس لها أسباب كثيرة، فمن الممكن أن يكون السبب وراء إنعدام الثقة بالنفس هو وجود عيب واضح في شخصية الإنسان، وعدم القدرة على التخلص من هذا العيب ؛ الأمر الذي يؤدي إلى إحساس الإنسان بأنّ جميع الأمور المعقدة في حياته سببها هو هذا العيب فينتج حالة من التكاسل والتقاعس في أداء الإنسان .

…………………………بعض الحلول البسيطه ونصائح ان شالله تكون مفيده……………………….

2- الإهتمام ببنية الجسد، فنلاحظ أن الإنسان الواثق بنفسه تكون خطواته متزنة، وسريعة فلا يمشي بثقل ولا تكون خطواته متعثرة، كما أن الإنسان الواثق بنفسه يكون منتصب القامة ومرفوع الرأس .[مرات مايخصه]

3- الإختلاط بالأشخاص المشجعون، والابتعاد عن الأشخاص المحبطون الذين يضعفون ثقة الإنسان بنفسه، فعندما يجالس الإنسان شخصا يمدحه كثيراً ويتحدث عن الخصال الجيدة فيه يزيد من شعوره بالثقة بالنفس، كما يشعر بالاستقرار النفسي .
[وليس القصد هنا المجامله]

4- التعامل مع الأشخاص بطريقة لبقة، حيث أن الإنسان بطبعه يبادل الشخص الذي أمامه نفس التصرفات.

5- محاولة التّخلص من مشاكل الخوق والقلق، وذلك من خلال المخالطة في الناس والمجازفة في إستخدام كل ما هو جديد، حيث أن الخوف والقلق من اعداء الشعور بالثقة بالنفس .[بس ماننسا حدود الادب]

6- الإبتعاد عن الأحاديث السخيفة والتافهة، والحديث بصورة واضحة وبلغة صحيحة،الأمر الذي يزيد من ثقة الإنسان بنفسه.

7- الإبتعاد عن الكذب و محاولة كسب الجانب الودي من الشخص الذي أمامك، حيث أن الإنسان الصدوق ذو الخلق السليم يكسب ثقة الناس، وكسب ثقة الناس يعني زيادة
الثقة بالنفس .

جرحني مب عارفه كيف اسامحه.. انا متزوجتنه من سنتين ونص وعدنا بنت

وكنت اشوفه هو الملاك الي مستحيل يغلط اي غلط لانه مدارني ومحطني في عيونه ومب منقص عليي في شي

كل الحب والحنان عاطني اياه واكيد ماكنت منقصه عليي في شي لدرجة اني دووووم اسأله ناقصنك شي ؟

مقصره عليك في شي تبا مني اغير في نفسي شي ؟ عشان مايشوف غيري

يعني باختصار كان دايما بينا حوار ومتفاهمين ومتصارحين في كل شي في حياتنا وعدودته على هالشي من ايام الملجه

ودايما اقوله يا فلان مابا في يوم من الايام اشوف شي عليك من خيانه والا فعل شين تسويه من وراي

لانه صدمتي فيك بتكون قويه ومستحيل ترجع مكانك في قلبي مثل ماهيه لاتخليني افقد ثقتي فالناس كلها

لاني ما اثق في هالدنيا بحد غيرك انته .. وكان دوم يطمني ويقولي انا مستحيل اشوف وحده غيرج

ودايما افهمه اني انسانه افهم الشخص الي جدامي وبسهوله اكشف جذبه من عيونه لاني مب ساذجه

وغبيه وهو يعرف هالشي حتى مفاجآته كنت اكشفها واعرفه متى يكون خاش عني شي وأواجهه

السالفه هي انه قص عليي وقالي انه رايح بيت اهله يومين يغير جو مع خوانه ويطلعون فالاجازه ويستانس معاهم

انا فالبدايه استغربت لانه في عمره ماسواها ويوم اسأله كنت مول ما اقتنع باجابته وحسيت في قلبي انه جذاب

راح يومين والي مستغربه منه اني دوم يوم اتصل فيه واكلمه يكون الجو هادي يعني ولا كأنها يلست شباب

يوم اسأله وينهم عنك يقولي طلعت اكلمج برع ؟؟ اقوله الجو الي انته فيه يبين انك في بيت مب مكان مفتوح

يحلفلي انه معاهم وطبعا حتى لو حلف مستحيل اصدقه لاني فاهمتنه وعارفه انه يجذب عليي

راح يومين وع فكره هم في اماره وانا في اماره ثانيه وتميت مصره الا يقولي هو وين وكان يقولي ليش مب مصدقتني انا في بيت اهلي !!

وهو يعرف اني مستحيل اتصل فيهم واسأل عنه لانه مب من عوايدي اتصل حقهم اسأل عنه اكيد بيشكون فالسالفه والمشكله بتكبر

ياني عقب يومين في وقت متأخر وانا كنت زعلانه منه لانه ادري انه قاص عليي ورقدت عنه مع اني كنت اترياه بس من التعب رقدت

قمت قبله وشفت موبايله السجل ممسوح !! لاتقولون ليش فتشتي لانه لو وحده كانت شاكه في ريلها يخونها مستحيل تمسك نفسها

وبعدين هو تعود اني اي وقت ممكن اني افتح موبايل واخذ منه مسجات او رصيد اذا محتاجه من جه حاسب حسابه وماسح كل شي لييييييييييش!!!

قمت دورت اغراضه عشان اغسل ملابسه ماشفتهم !! قلت اكيد مانزلهم من السياره

رحت السياره عشان انزل اغراضه وهني الصدمه الي مستحيل انساها في حياتي

شفت في شنطته ظرف لفندق كان قاعد فيه فاليومين الي كان غايب فيهم عني قلت لا مستحيل وتأكدت انه نفس التاريخ

ونفس الاسم وحذال الظرف شي ما يستخدمونه الا المتزوجين في علاقتهم !! انا هني انهرت وماعرفت كيف اتصرف

رجعت كل اغراضه مكانهم ولا كأني شفتهم وقلت بسأله اذا صارحني بيكون بينا نقاش واذا

لا بقوله بييب اغراضه من السياره وبشوف ردت فعله

ييته قلتله يا فلان صارحني وقولي وين كنت هاليومين لاني مب غبيه علشان اتقص عليي وتقولي عند

اهلك انا عارفه انك مب عندهم اصلا هاذي اول مره يروح بدون لا ياخذني معاه !!

تم مصر انه عندهم ويقولي مايسوى عليي هاليومين الي طلعت استانس فيهم

قلتله بس انا اعرف انك كنت مطلع بطاقتك ومستخدمنها في مكان ثاني بايت فيه

تم ساكت ولزم انه بايت في بيتهم قلتله ان طلعت جذاب تراك انته الي بتجني على حياتك الي كنا عايشينها مرتاحين

لاني مستحيل اسامح واحد جذب عليي حتى عقب موتي مابكون راضيه عنك قالي انا ماجذبت عليج

قلته اوكي ليش مانزلت اغراضك قالي كنت تعبان قلتله خلاص امش خلينا نيبهم عشان اغسلك اياهم اكيد وصخات الحين

قالي لا انا بروح اييبهم بروحي وانتي خلج هنيه لزمت الا اطلع معاه وكان الخوف مبين من عيونه

ماخلاني افتح سيارته دخلها وقفلها وطلع من البيت انا هني اتأكدت انه كان مسوي شي غلط وغلط كبير

يوم رجع قالي ليش مفتشه اغراضي قلتله انا ماكنت اقصد افتشهم كانت نيتي ثانيه وتم انه زعلان لاني مفتشه اغراضه

انهديت عليه وقلتله لا تجلب السالفه على راسي انته الغلطان وتبا اطلعني انا الغلطانه قالي ليش انا مب رياله

قلتله لا الريال مايسوي الي انته سويته انته هدمت كل شي كان بينا بهالجذبه تعبت وانا احاول انك تصارحني وماتجذب عليي

وانته ملزم وتحلف انك ماسويت شي غلط وانته بكبرك غلط ماكنت اتوقع ياناس يطلع هالشي منه

قالي كان خاطري اغير جو بروحي انا حجزت في فندق وتميت قاعد فالغرفه واروح المسبح وبس

انزين الاشياء الثانيه الي شفتها ليييييييش قالي كنت مشترنها حقج !! حقي وماشاورتني تبينها والا لا

شي مايدخل العقل ياناس قلته انته اخر واحد كنت اتوقع منك هالسوايا الشينه كنت اشوفك دايما ملاك

ويوم اسمع واقرا مشاكل البنات ويا رياييلهم اقول الحمدالله انه الله عطاني ريال عاقل وماعنده هالسوالف

كلمته بعدها بكل هدوء وسألته اذا انا قصرت في حقه او في شي فيني مب عايبنه وخلاه يسوي جه قالي بالعكس

انتي مول مب مقصره عليي في شي وانا مامسيت وحده غيرج والي شفتيه انا ما استخدمته لحد طيب ليش ماخذنه قالي ماخذنه وخلاص وغلط اني شريته

يعني اكيد مليون بلميه كنت ناوي تسوي فيه شي مع وحده غيري قالي لا ولو كنت ابا جان سويتها والفرص وايده

بس انا خواف وما اقدر اكون مع حد غيرج!!

لاتقولولي مب موفتنه حقه وما تسويله سوالف وليالي رومانسيه اصلا اهلي وربيعاتي يتصلولي ياخذون الافكار مني

ياناس دخيلكم انا انسانه اذا حد خان الثقه الي عاطتنها اياه مستحيل اردها مره ثانيه

احس اني مب قادره ارد احبه مثل قبل احس بكرامتي انجرحت وايد انا لا في حياتي مسكته ولا تحكمت فيه

ولا قلتله لا تروح ولاتطلع مخلتنه على راحته لاني واثقه فيه( بس جدامه لكن في قلبي اعرف انه كل الرياييل نفس الشي خوانين ويدورون وناستهم)

في حياتي ما بينت له اني اشك فيه حتى يوم يكون مع رباعته ما اتصل فيه

عشان مايقول اذتنا وحشرتنا .. دلوني على طريقه اترد ثقتي فيه وارد كرامتي محلها

مب قادره اعامله بالزين صرت جافه وياه اقول يمكن يحس بغلطه ومايعيده مع انه يقولي انه غلطه الوحيد

انه جذب عليي في مكانه غير جيه ما خاني في شي بس خلاص احس اني مب قادره اصدقه احس كل كلامه جذب في جذب مع انه حلفلي ع المصحف

اييني اليوم يقولي ليش ما اتصلتيلي فالدوام والا طرشتيلي مسج اقوله هاك قبل يوم كنت تستاهل الحين اتأقلم على حياتك اليديده

غير عن حياتك الي دمريتها لا ويقولي يمكن هالسالفه صارت وكشفتيني عشان حياتنا تكون احسن عن قبل!!

اصلا حياتنا قبل الكل يحسدنا عليها اقوله ماكان شي ناقصنك انته الي خربت على عمرك وانته تحمل النتايج

لاني مب قادره انسى الي سويته فيني وما اقدر اثق فيه مره ثانيه

انا بس اباه يحس بغلطه ويندم وتردلي كرامتي ابغي اعرف البنات كيف يتصرفون اذا كشفوا خيانت رياييلهم

مب عارفه كيف افكر احس كل من اذكر السالفه عيوني تدمع روحها واقول مستحيل ريلي يسوي هالشي

عطوني طريقه وتصرف عاقل الله يخليكم

ادري طولت وايد بس ودي افضفض لحد واشوف ردودكم ابا ارتاح قلبي محرووووووق