الوسم: التليف

والاثنين سوو عملية الليزر وماشاء الله احملن عقب على طول

كان يمنع الحمل قبل بس لما اتعالجو صار الحمل على طول

لا اتكبرون الموضوع هلشي صار بسيط الحين مب مثل قبل

الله يرزقكن الذرية الصالحة ويبعد عنكن كل شر ياااااااارب

انا عندي 5 عيال ماشاء الله لا قوة الا بالله ،،ومن خمس سنوات ماحملت،،،، لان من 4 سنين

قالوا عندي تليف بسيط في الرحم ،وكنت خايفة احمل بس قالوا وايد يحملون

وفيهم تليف بس حسب الحجم ،،،، والحين في خاطري احمل وسويت فحوصات

وقالوا حجمة 3 سم ،،، ويوم تقررين تحملين لازم نرجع انشوف اذا كبر ويحتاج

التليف ينشل ولا لا ،،،،،،، لان اذا حملت وكبر مع الحمل ممكن يسقط الجنين

والله انا خايقة لان ماعرف اي مكان موجود عندنا وفيه ثقة انهم يسوون

العملية ،، وقالوا انها تسوا بالمنظار لانه صغير ،،،

ممكن اساعدوني في هالموضوع اذا سمعتوا حد صار معاها نفس الشي

وين العيادات الثقة للموضوع هذا

والله يبعد عنكن الامراض والاسقام

اتريا ردكم

مرحبا أخوتي عسى الله ينول كل وحدة فينا مرادها الآنسة تعرس و المدام تعيل بإذن الله قولوا آمين

انا يا طويلات العمر كنت اعاني من الم فالجانب الايسر صوب المثانه من سنين وكل ما اروح المستشفى يقولون لي التهاب ف البول لدرجة اني تعودت ع الالم + وجع الظهر وصار كرتون البندول ما يفارق شنطتي
بعد انتظار سنين اشتغلت وكانت ظروف الشغل وضغوطاته تمنعني من الحركة وحتى روحة الحمام فما كنت اشرب و لا اكل خلال فترة الدوام و زاد علي الوجع واضطريت استقيل من الشغل
وبديت بزيارة مركز صحي حكومي بعد الفحص قررت الدكتورة تسوي سونار تبين لها وجود ورم وبدت تزقر كل الدكاترة عشان يتفرجون و يتعلمون تقول حاله نادرة ويت مديرة المركز وقالت انتي عندج ورم و يمكن يكون خبيث و بنحولج التوام حسبي الله عليهم ما عندهم اسلوب لتوصيل المعلومة صبوا عظامي والله لو وحدة غيري كانت انجلطت وعطوني موعد في مستشفى البراحة بعد شهر ونص هذا وهي تقول حالتج مستعجله و مرت الايام و وصل موعد السونار يوم رحت لقيت فني الاشعة ريال ويبا يأجل لي الموعد رفضت وصممت انه يصور عشان اخلص الله يسامحني
شاف الورم قال هذا تليف وحجمه كبير مستحيل يشلونه بالمنظارو لازم بالجراحة وخوفني زيادة هذا كان يوم الخميس
ورديت بيتنا بحاله نفسية ما تنوصف و اتصلت امي ببنت عمي تسولف لها عني قامت خبرتها ان شي دكتور نسائي زائر يتواجد في الامارات 3 ايام بس من كل شهر كان يداوم في الوصل والحين عنده مستشفى في دبي غير المستشفيات اللي برع ما شاء الله .
و اتصلت ع المستشفى و خذت لي موعد اليوم اللي عقبه الجمعة رحت المستشفى
من النظرة الأولى قال هذا تليف ولو تبون بسوي العملية باجر و عطاني مهلة للتفكير كم ساعة عشان يأجل سفره فكرت وقررت اسوي العملية (ارتحت للدكتور خصوصاً يوم عرفت ان اسمه في موسوعة جينس صاحب الرقم القياسي ف العالم لازاله اكبر تليف في الرحم وزنه 5 كيلو سبحان الله ) و راح ابوي المستشفى و كلم الدكتور و اطمن
يوم السبت الصبح وصلت المستشفى الساعة 8 عالموعد عشان فحوصات الدم و ظهرت النتيجة في الظهر و دخلت غرفه العمليات الساعة 3 الظهر و طلعت ف المغرب لان التليف حجمه كان وايد كبير 10×7 سم و وزنه كيلو ونص بالإضافة للتليف لقوا تجمعات دمويه سادة المبيض( حجم الرحم كان مثل حمل 22 اسبوع وانا مب حاسه ع بالي متنت) ماشاء الله امي صاحت يوم شافت اللي طلعوه مني انا ما خلوني اشوف ودوه المختبر
المفروض اطلع في نفس اليوم بس تميت يومين زيادة
علاجي عبارة عن
ابرةlupron لمدة 6 اشهر
حبوب منع حمل نوعين عشان الهرمونات لمدة 6 شهور
الحين مستمرة ع العلاج واعاني من الآثار الجانبيه للحبوب والابرة بعد الله يشفيني و يشفي مرضى المسلمين

**عندي سؤال للي سوت عملية منظار لإزالة تليف فالرحم كم المدة الي خذتيها حتى خاز عنج وجع العملية تماماً؟

**متى بتخوز العلامات؟
**وللي خذت ابرة lupron شو آثارها الجانبية?
** بالنسبة للتجمع الدموي في الرحم يرجع ولا لا?

نصيحتي لكل البنات الفحص النسائي ضروري جداً لا تقولين استحي والحمدلله المراكز الصحية توفر الفحص الشامل مجاناً*