ها الشيء يبط الجبد شو رايكم؟؟

مساكم الله بالخير ..

خواتي ..

من كثر ما أحترت في السالفة ما عرفت وين أحطها وفي الآخر قررت أني بحطها هنيه ..

قبل سنة تقريبا تعرضت لموقف ..

كنت ظاهرة من المنطقة التعليمية في الخالدية وسايرة صوب موتري.. ياتني حرمة عيوز .. مواطنة ولابسة برقع وعباية وشيلة ..

المهم الحرمة قالت لي قصة غريبة: قالت يا بنتي أنا ياية من المرفأ يايبة بنتي عند مطوع هنيه .. لأن بنتي مستلبسة (عافانا وعافاكم الله) والمطوع خذ كل فلوسي.. وأنا ما عندي غير ولدي أتصل به ولا يرد .. وما عندي موبايل عسب هو يتصل بي,, والحينه ما أعرف شو أسوي .. يا ريت تعطيني فلوس عسب أرد المرفأ .. أي شيء يا بنتي ..

الصراحة .. تقطع قلبي عليها .. بس والله العظيم ما كان عندي فلوس إلا عشرين درهم .. لأني ما أستعمل الكاش وايد ولا أشيل فلوس كاش .. أستعمل الكريدت كارد دوم .. فما أخلي إلا 200 درهم خردة في ايدي .. وإذا احتجت أكثر أسحب من أي آي تي ماشين ..

عطيتها اللي عندي وقلت لها الوالدة اسمحيلي والله العظيم ما عندي غيرهن .. بس إذا تبيني أوديج المرفأ الحينه بوديج .. والا تعالي فيايه بناخذ بنتج وبوصلكم لأي تكسي وبسحب فلوس .

قالت لي بارتباك: أنا شو بتسويلي عشرين درهم .. خذيهم ما أباهم وأنا ما أروم أسير المرفأ الحينه وأنا ابا أتريا ولدي..

قلت لها عطيني رقم ولدج .. قالت موب حافظتنه ..

قلت لها: اسمحيلي عيل ما أورم أساعدج..

وروحت عنها وأنا أقول : معقولة هذي شحاته.. بس هي حرمة مواطنة !! مستحيل اللهجة والشكل وحتى ريحة الدخون الجديمة .. الحرمة مليون في ال 100 مواطنة .. بس ليش تشحت .. وليش تجذب؟؟؟ خاصة ان المنطقة اللي كانت فيها في الخالدية كلها عمارات ومافيه مطوع يسكن بشقة…!

مرت فترة طويييييلة ع السالفة ..

وفي يوم كان خطيبي يرمسني.. وكان وايد متضايج..
قلت له شو بلاك؟
رد: اليوم ساير البلدية وفي المواقف ياتني حرمة عيوز من أمهاتنا الأوليات .. وقالت لي إنها يايبة بنتها عند مطوع في بوظبي وانها …!!
جان اقطع سالفته وأقول له بسك بسك .. قالت لك إنها من الرفأ وإنها تبا فلوس تكسي وإن ولدها ما يرد..!!!

انصدم قال لي شو دراج؟؟!
قلت له اتلاقيت وياها في شهر 9 العام عند المنطقة التعليمية بس ماكان عندي كاش وحسيت بقهر منها ..

جان يقول : ليتج ما قلتيلي .. أنا عطيتها اللي في جيبي كله وقعدت أدعي على ولدها اللي خلا أمه تحوم في الشوارع..!
قال لي فوادي تم يعورني وتميت أقول ليش ها الناس يعقون أهلهم وليش ها المسكينة متبهدله وغيره وغيره .. ثرها تكذب الله يسامحها ..

تم خطيبي زعلان يومين بسبب ها الموضوع ..
قلت له احتسب الموضوع صدقة.. قال أنا والله موب هامتني الفلوس .. أنا حاز في خاطري انها تستغلني بها الطريقة .. لو قالت أبا فلوس بدون ها الكذب ما رديتها .. بس ليش الكذب ؟؟!!

تعرفون أنا أعرف زوجي عدل ومتأكدة إنه عطاها مبلغ وقدره بس والله العظيم هو ما طاع يخبرني كم عطاها ..

المشكلة في ها الحرمة ..

وفي غيرها ..

مرة تصادفت مع شيبة مواطن يشحت .. بس ما تضايجت منه .. عطيته اللي في ايدي (ها المرة كنت نازلة من الصالون وكان عندي كاش) ..اتضايجت من الزمن اللي يخليه يشحت .. واحترمت انه ما كذب علي.. هو قال: حالتي عسيرة يا بنتي وأي شيء يفرج عني ..
ما اخترع قصة وقالها ..

بس في النهاية ..

ليش المواطنين يشحتون .. ووين في بوظبي؟؟!
هل الشحاتة صارت آخر الحلول ؟
وليش ذيج الحرمة تكذب؟؟
أعتقد الريال محتاج بس الحرمة كذابة ..

شو رايكم ؟؟

اولا تسلمين عطرح هالموضوع

انا اعتقد انه هاييج الحرمه مب محتايه فلوس …………بس فيه ناس اتعودو عالشحاته وهي بنظرهم أسهل طريقه لكسب الفلوس وفنفس الوقت يكسبون عطف الناس.

اما حالت الريال…………..اعتقد انه محتاي بس للأسف ماعرف الطريق الصح عشان يسد عمره وهو مب طلب الناس لا هو طلب رب الناس اللي مابيرده…………….الله يهديه انشالله ويهدي كل اللي شراته

مره فيه وحده دقت لخوي وهو كان فالمباره قالتله انا من الاردن واريد ارد الامارات بس محتايه فلوس عشان ارد وقالتله انته حولي الفلوس وبردلك اياهن يوم بوصل الأمارات……….طبعا هو لايعرفها ولا يعرف هيه من وين يابت الرقم

قالها سمحيلي ماقدر اثق فيج وسكر عنها ( لأنه ماكان فاضي )

عقب سبحااااااااااااان الله يالقدر …………دقت حق ربيعه اللي يالس عداله ( طبعا اخوي خبره بالسالفه )
وقاااااااااااااااالتله نفس القصه قالها لا سمحيلي………….عاد عقبها طاحت فيه سبببببببببببب
قالتله انا قااصه على كم واااااااااااااحد مواطن وانتو الا جيه اطرشون الفلوس وتمت عااد حاطه علينا المواطنين

هذي طبعا غيض من فيض من اللي يشحتون…….فيه غيرهم واايد

الله يهديهم ويودرون هالجذب اللي يقولونه ويدورولهم شغله أبركلهم

هذا اللي عندي والسموحه عالقصور

لو قلتلج صارتلي نفس السالفة
بس جدام اسواق الامارات ما بتصدقين
قالتلي ان بنتها ودتها عند المطوع اظني
وهي من راس الخيمة

ولما عطيتها المقسوم في كلينكس فتحته جدامي بسرعه وقالتلي ما ايكفي

سكرت الدريشة عنها

وانا قلبي يغلي
بس انا من النوع الساكت

تمت اغلي لين ما هديييييييييييييت
ههههههههههههههههههههههههههههههه

وعند البطين مول في شيبة الله ايعينه
تعجبني حركته
يعطيج اذكار وانتي عطيه المقسوم

ولله كريم

ولله ان قلبي يتقطع عليهم

المشاركة الأصلية كتبت بواسطة vipalain

اولا تسلمين عطرح هالموضوع

انا اعتقد انه هاييج الحرمه مب محتايه فلوس …………بس فيه ناس اتعودو عالشحاته وهي بنظرهم أسهل طريقه لكسب الفلوس وفنفس الوقت يكسبون عطف الناس.

اما حالت الريال…………..اعتقد انه محتاي بس للأسف ماعرف الطريق الصح عشان يسد عمره وهو مب طلب الناس لا هو طلب رب الناس اللي مابيرده…………….الله يهديه انشالله ويهدي كل اللي شراته

مره فيه وحده دقت لخوي وهو كان فالمباره قالتله انا من الاردن واريد ارد الامارات بس محتايه فلوس عشان ارد وقالتله انته حولي الفلوس وبردلك اياهن يوم بوصل الأمارات……….طبعا هو لايعرفها ولا يعرف هيه من وين يابت الرقم

قالها سمحيلي ماقدر اثق فيج وسكر عنها ( لأنه ماكان فاضي )

عقب سبحااااااااااااان الله يالقدر …………دقت حق ربيعه اللي يالس عداله ( طبعا اخوي خبره بالسالفه )
وقاااااااااااااااالتله نفس القصه قالها لا سمحيلي………….عاد عقبها طاحت فيه سبببببببببببب
قالتله انا قااصه على كم واااااااااااااحد مواطن وانتو الا جيه اطرشون الفلوس وتمت عااد حاطه علينا المواطنين

هذي طبعا غيض من فيض من اللي يشحتون…….فيه غيرهم واايد

الله يهديهم ويودرون هالجذب اللي يقولونه ويدورولهم شغله أبركلهم

هذا اللي عندي والسموحه عالقصور

حسبي الله ونعم الوكيل فيها ؟؟؟؟؟؟؟؟؟؟؟؟؟؟؟؟؟؟؟؟؟؟؟

ترا ها الشحادة استوت هواية او تمضية وقت فراغ
انتي شلون تعرفين انه صادق ولا لا
اي شحاد يقابلكم قولي له انا اشتغل في الهلال الاحمر مر علي هناك بساعدك
اذا شفتيه انحاش يعني جذاب واذا شفتيه جاد وقال كم رقمك و و و يعني صدق محتاج

وبعدين المواطنين المحتاجين اعتقد لو ساروا مال الوزارة شو اسمها نسيت اعتقد القصر وينظرون حالتهم بيساعدوهم وما بحتاجون الطرارة
يعني اعتقد اللي يدورون هاذيل ملانين ويبون يتسلون

السلام عليكم …. هذه السالفه ووووايد منتشره .. في وحده حرمه دخلت البيت علينا سلمت ويلست وهي مواطنه .. عاد امي الله يرحمها فاولتها وقهوتها وبعد عطرتها وعقب قالت اعطوني المقسوم بسير امي انصدمت ماعرفت شو ترد عليها .. لا والقهر بنتها في سياره تكسي تتريها … من هاالنوعيه وااايد وكل قصه اغرب عن الثانيه … لازم انبلغ عليهم ما نخليهم ولا تاخذنا رئفه بهم لانهم يشوهون صورة المواطن وهم مب مواطنين .

حسبي الله ونعم الوكيل

اترك تعليقاً إلغاء الرد