قصة ولادتيي باغلى البشر ‘ميثا’ ~

اشحالكن .. ؟؟

اليوم حبيت اخبركن بقصة ولادتي وان شاء الله افيد البجريات فيها .. 
طبعا هذه اول ولاده لي .. اول بنوته ربي يحفظها لي ويحفظ احباب الكل
قبل لا اربي بكمن يوم كنت واايد خايفة واحاتي .. اني اعدي موعدي وما اربي .. عقب يعطوني طلق صناعي .. كانو محددين لي موعد الطلق خلاص .. والحمدلله وبفضل منه .. ربيت قبل موعدي بيومين ..
المهم .. يوم شفت روحي طولت .. قلت لازم اشد حيلي فالمشي .. امبوني كنت امشي من بداية التاسع .. مرة ع البحر ومرة فحوي البيت .. بس كنت امشي اشوي اشوي .. اخذ راحتي .. ويوم شفت روحي طولت وما باجيلي شي من التاسع .. قمت اشد فالمشي من الخاطر واصعد الدري واحدر .. تقريبا كنت امشي ساعه كامله متواصله .. عقبها اريح كمن ساعه .، وارد اصعد الدري تقريبا خمس مرات وفوق .. واريح وارد امشيلي نص ساعه .. وجي .. فيوم الولادة .. اول ما نشيت قرب الضهر ،، رحت كليت لي سندويج جبن وانطلقت ع الدري .. عقبها ريلي وصل من الدوام .. قلت خلاص باخذ لي استراحة .. ريحت لين العصر .. عقب ما نشيت حسيت انه نزلت عليه ماده جي مخاطية .. بس بيظا وبدوون خيوط دم او دم بني .. طنشتها .. من ضهر ريلي من البيت سيده اتويهت صوب الحوي وتميت امشي بسرعه اشويه .. تقريبا خذت ساعه ونص .. وتميت ع هالحال لين بالليل .. امشي واريح .. 
بالليل يوم رقد ريلي رحت ومشيت قرب الثلث ساعه .. كانت الساعه حزتها هنتين وشي تقريبا .، كنت امشي واستغفر .. وادعي ربي انه يعيّل بولادتي ،، عقب رديت وسبحت بماي حااار ،، اتيلست تحت الماي.. خذت وضعية يلسة الحمام العربي تكرمن .. وعقب ما خلصت رحت اتسدح عشان ارقد .. 
وانا متسدحة .. حسيت جي مثل الماي نزل عليه .. بس اشوية مب واايد يعني بلل البانتي ع الخفيف وبس .. رحت جيكت فالحمام تكرمن .. وطنشت .. رديت اتسدحت .. دقايق .. حسيت مرة ثانيه انه نزل عليه شي .. قلت افخاطري لايكون الا هذا جيس الماي وانبط .. رحت اجيك لقيت البانتي خايس كله دم ،، دم لونه احمر مش بني .. زغت .. قلت فخاطري انا اللي سمعته يكون دم بني مش احمر .. سيده اتصلت فاماية .. قالت لي خلاص هذه ولاده سيري وعي عمتج وخبريها .. لين ما اييج انا ( اهلي فعيمان واهل ريلي من دبي ) المهم وعيت عموه وخبرتها شو شفت ،، قالت لي البسي عباتج وبنسير المستشفى وبنجيك .، اذا بعدج مطوله بنرد البيت عشان ما يبهدلونج .. رحت المستشفى .. وصلت تقريبا 4 الا ربع جي.. يتني الدكتورة وقاست لي النفس .، قالت خلاص ولاده وما يصير تطلعين .. والحمدلله اني سمعت الرمسه وما طلعت .. فهذيج الساعه ما كنت حاسه بويع .. يدوب جي خفييييف .. شرات ويع الدورة .. بس خفيف واايد .. حولوني ع القسم اللي قبل الولاده .. سوولي تحليل بول عزكن الله .. قالولي مستوى السكر واااااااااايد نااازل وعندج جفاف فالبول .. وسيده حطوولي مغذي وفنفس الوقت جهاز تخطيط القلب .. غلطتي اللي قلت لكم اني غلطتها .. هي هذه .. من دشيت التاسع وبالذات اخر الاياام كنت ما اكل عدل .. كله سندويج جبن غدا وعشا وريوق .. واشوية فاكهة .. قلت افخاطري من يقبضني الويع بتم اكل تمر عشان اخذ لي طاقة حق الزفار ( البوش ع قوولتهم هع ) والمصيبة يوم اترقدت وبدا يزيد عليه الويع من خفيف لثجيل اشوية ييت ابا اكل .. ما قدرت .. جبدي لاااعت وما قدرت اسرط شي .. كله احس اني برجع .. مع اني كنت يوعاااااانه .. كنت اقوولهم انا يووعاااااانه ويوم اييبوولي الاكل ما اكل .. احس اني برجع .. وهبوط السكر فالدم زاد الطين بله .. ما نفعني الا الجلوكوز .. صح انه ما عطاني طاقة كافيه .. بس اهو احسن من لا شي .. وبدا الويع الصح من الساعه جي تقريبا 11 الضحى .. يزيييد اشويه اشويه .. بس كنت اقدر اتحمله .. وتمييت لييين الساعه 1 .. بدا الويع الثجييل .. كنت كل ما احس اني خلاص ما اقدر اتحمل اقول يااارب يسر .. حسبي الله لا اله الا هو عليه توكلت وهو رب العرش العظيم .. قالت لي السستر اذا ما اتحملتي الويع بنعطيج ابرة مخدر .. وانتي اختاري اذا تبين ابرة الضهر او العضل .. قلت لها خلاص زاد الويع عطيني ابرة العضل .. عطتني اياها .. حسيت انها خففت اشويه .. صح اني كنت بعدني احس بالالم .. بس اهون من قبل لا اخذها .. تميت لين الساعه 3 الضهر وخلاص فتح عندي 9 ونص وحولوني ع غرفة الولاده .. ومن فتح 10 خلاص بدت المعاناة .. لانه ماشي طااقة ما قدرت ازفر .. كل ما اسوي بوش اوقف فنصه خلاص اتعب ما اقدر اكمله .. اتقولي السستر حاولي تعطيني بوش طويييل راسها امبين .. واحاول واحاول .. تمييت ساعتين الا ربع جي تقريبا وانا الا ازفر .. انهد حيلي .. وتعبت ع الاخر .. زاغت اماية قالت للسستر اذا ما قدرت تدفع شو بتسوولها ؟
قالت لها بالعادة نحن نعطي البجرية ساعتين عقب يحولوونها ع العمليات.. واذا اثر ع نبض الام او الجنين قبل لا اتعدي هالساعتين انحولها سيدة .. ساعتها زغت .. صديت ع الساعه ما باجي الا ربع ساعه .. عن الساعتين .. انفتحت النفس لين ال 10 واخرتها انشخط بعملية !! جنك يازيد ما غزيت ع قولتهم .. حزتها سميت بالله ومن ياني الويع سويت بوش من الخااااااطر لين ما طلع الراس .. قالت لي السستر شاااااطرة يلا بوش ثاني ويطلع جسمها .. قلت لها اسحبيها ما اروم .. قالت لي لا اتروميين يلااا .. وسويت بوش ثاني وطلعت الحلوة ع الساعه 6 الا عشر المغرب .. من طلعت وشفتهاا وسمعت صووتهااا نسيت كلللللللل شيي .. حطوها ع صدري وتمييت اصيح واطالعهااا .. حياتي والله بس شوفتها نستني كل اللي صاار .. الله لا يحرم اي بنت من هالشعور وهالتجربه ..

وهذه هي قصة ولادتي
عشان ما تغلطون شراتي .. من اتدشن التاسع اكلن اكل كله طااقه .. لا اتقولن يوم بيقبضني الويع باكل .. ذيج الساعه الوحده ما اتعرف شو نفسيتها ..
وصح ،، لا تزفرن الا يوم بتقوولكن الدكتورة .. ازفرن حزة الويع بس .. تاخذن نفس عمييق وتزفرن مرة وحده .. انا صار لي تمزق خفيف لاني زفرت وانا ما فيني ويع ..
وانتفخت عندي المنطقه وااايد لاني خذت ساعتين تقريبا وانا ازفر .. 

الاشيا اللي سويتها وفادتني صدق
المشي وصعود الدري
وما كنت احط ريل ع ريل طول فترة الحمل
ويوم ايلس ع الارض كله اربع ريولي .. شرات ما ييلسن حريم اول يوم يرضعن عيالهن .. هالاشيا اتخلي النفس تفتح بوقت اسرع بالنسبة لبجرية .. 

وفالنهاية
ومن عقب تجربة 
صكن اذوونكن للي يتشكن من الولاده
ترا جد الله ييسر.. وكل اللي بتمرن فيه هو بقدر طاقتكن ( لا يكلف الله نفسا الا وسعها ) ويمر الوقت بسررعه مع انها تاخذ ساعات .. بس جد ما حسيت بالوقت موول ،، ومن اتحسن بالويع خذن نفس عميق وبتحسن انه الالم بدا يخف اشوية اشوية .. وبترتاحن ،،  
واخذن فكرة عن طريقة الدفع .. عشان يوم غايته ما تدفعن غلط واتعبن عماركن ع الفاضي ..

والله ييسر على كل حامل ..
ويبلغها بشوفة ضناها .. ويكرم كل من خاطره بالذرية الصالحة ولا يحرم حد من هالنعمه ..~

اي استفسار انا حاضره
^^

المشاركة الأصلية كتبت بواسطة < لارين >

بتصدقي انك خليتيني ابكي و الله الله يجعلها من الصالحات و قرة عين .. انا ولادتي برمضان باذن الله بغيت استفسر منك كيف طريقة البوش الصحيحة ؟

حبيبتي والله
الله يسمع منج ويميع ان شاء الله
والله يسهل عليج ولادتج ويبلغج بشوفة نونوج بصحة وعافية يارب

بخصوص سؤالج حبيبتي
السستر كله كانت اتقولي سوي بوش شرات يوم اتسيرين
الحمام عزج الله .. كيف يوم تستفرغين .. تدفعين (…..) نفس
الشي دفع الولاده بالضبط
ان شاء الله اتكون وصلت لج المعلومة
^^

راعية الدار
عين الدماني
مندوبة جده
يو اس اي اونلاين