رولات السندويش بالصلصة

اليوم يايبتلكم اكلة ما اعرف شو اسمها الوصفة نصها من كتاب عندي و النص الثاني من تاليفي
اصلا ما ارتاح اذا ما حطيت شي من لمساتي في الاكل

الطبق ممكن يكون اسمه رولات السندويش بالصلصة

و ممكن انه يتسوى باللحم المفروم او حتى بالدجاج المفتت ( طبعا كل واحد يسويه على حسب اهل البيت شو يفضلون و انا جربت الاثنين و كل واحد احلى من الثاني )

اللي نحتاجه :-
*لحم مفروم او دجاج مفتت او مفروم مسواي مع البصل و صلصة الطماطم و البزار و البهارات و الماجي (ممكن يكون مسواي بنفس الطريقة اللي تسوي فيها الدجاج لمعكرونة البشاميل و يفضل ان الحشوة تكون مسواية بصلصة حمراء)

* الخبز اللي بنحشيه بالخلطة (هاي هي مقادير الخبز (1 كوب دقيق, 2 ملعقة طعام سكر, 2 ملعقة طعام بايكنج باودر,2/1 ملعقة صغيرة ملح,2 بيضة مخفوقة قليل,1 كوب حليب سائل,3 ملعقة طعام زيت))

* صلصه حمرا (و ممكن تسوينها ب ٤ ملاعق من الصلصة الحمراء الجاهزة اللي نستخجها حق كل انواع الاكلات مع كاسين ماء دافي و فلفل اسود على حسب الرغبة و حبة ماجي نحطهم كلهم مع بعض على النار لين ما تغلي و تستوي غليظة و ممكن نضيف القليل من النشا بس ما تكون وايد غليظة )

*جبن موزاريلا مبشور

* صينية بايركس

الطريقة :

نبدا انسوي الحشوة مثل ما ذكرت و يفضل انها تكون حمرة و من نخلص نخليها على صوب

و نسوي صلصة البشاميل و نخليها على صوب و نفس الشي الخلطة الحمرة اللي كتبت طريقتها فوق نسويها و نحطها على صوب …..

بقى عدنا الخبز ,نسوي الخبز اللي يكون نفس الكريب او المحلا نقدر نسويه على التاوة و لا على مكينة الكريب مع استخدام زيت خفيف لدهن التاوة بس يعني ما يبالها وايد زيت

و تاكدي انها تكون بشكل الدايرة عشان يوم نحطها في الصينيه تكون مرتبة

قبل ما نصف السندويشات في الصينية ندهن الصينية من تحت بالصلصة الحمرة دهن خفيف فقط (ما نسوي البحر الاحمر) LOL

من يجهز خبز نبدا نحشيه

ناخذ خبزة وحدة و نحط حشوة الدجاج في النصو و نبدا انلفها بشكل اسطواني نفس الساندويش و نصفها في صينية البايركس و ناخذ خبزة ثانية و نسوي نفس الطريقة

و بعد ما نخلص و الصينية تكون كلها FULL نبدا انرش نص كمية الموزيريلا على السندويشات و بعدين نحط الصلصة الحمرة و هي حارة , و نصب النصف الثاني من الموزيريلا على الصلصة الحمرة

و اخر شي صلصة البشاميل و هي حارة و ناخذ شوكة و نحرك الصلصة في الصينية عشان توصل تحت
و ندخلها في الفرن من ١٠ لين ١٥دقيقة عشان تحمر من فوق و يذوب الجبن

طبعا هالصور قبل ما ادخلها في الفرن لان من دخلتها انشفطت و ما قدرت اصورها بس بصرااحة لذيذة وايد و خفيفة