السلام عليكم …
كل عام وإنت بخير بمناسبة السنة الدراسية الجديدة .. وإنشاءالله يكون عام دراسي متميز لأولادنا وبناتنا .. وللمدرسات خواتنا بعد …
شو رايكم ..
نتبادل وصفات السندويتشات من أجل lunch Box صحي وشهي وخالي من الحلويات والشيبس المضر …
أتمنى من كل وحده عندها وصفة حلوة تشاركنا فيها ويزاها الله خير …
توست مقلي بالبيض والحليب …
شهي ومغذي … ويحبونه الأطفال.. سريعة جداً مناسبة للفطور .. وتقدرين تحطينها في شنطة أكل الطفل بعد …
وهذي المقادير والوصفة ..
خبز توست .. حليب طازج أو رينبو. بيض .. سكر للتغطية إذا حبيتي
1. سخني المقلاة على نار هادئة وبها القليل من الزيت أو سمن الدار لنطهة أطيب
2. غطسي التوست في البيض أولا ..
3. ثم في الحليب
4. قلي التوست في الزيت حتى يحمر ثم اقلبيه على الوجه الثاني.
5. حطيه في الصحن ورشي عليه القليل من السكر إذا حبيتي
وبالهناء والشفاء
وفي أنتظار وصفاتكن الشهية لسندويشات الأطفال ..
ولا رد !!!
غريبة .. !
يمكن محد منكم يسوي لعياله Lunch box !!!
والإعتماد على المقاصف .. !
على العموم .. شكرا.. وكنت حابه نحط وصفات نفيد فيها عيالنا …
بصراحه الغلا
انا يناتي يتريقن كورن فليكس وبيض وحليب يعني مافي اسوي بعد سندويجات بيض
انا اللي يطلبونه اسويه يعني عصير وسندويجات نقانق او شكولاته واحيانا الاكل الموجود في البيت حتى لو جباب او خمير
سمحيلنا الغاليه .. بس العيال الحين ما يتريقوون ..
نحن موفرين الريوووق خخخ .. نتريا الغدا بس
لا تسوين سندويشااات بيض حق اليهاال وتحطينه في lunch box
بيضرهم البيض يخترب … واصلن مدرسه ولدي مانعه البيض في الشنط
انا عني اسويله سندويتش جبن واحط معاه عصير وماي الحين افكر احطله كورن فليكس اريد اغيرله وحليب
احطله احيانا فواكه بس ساعات ما يكلهن
سندويج زعتر وسندويج جبن… سندويج موتريلا… ( كافي )
تفاحه ..
سنطره ^_^
حليب كاكاو او فراوله
وجبس عمان .. او اي جبس يحبونه…
وماي ..
هذا الاكل الي ياخذونه وياهم…
الرويق .. جاهي أو حليب .. وسندويج جبن…