الوسم: ال

في البداية حبيت أقولكم إن هالموضوع مجهود شخصي.. حبيت أفيد بناتنا فيه..و حبيت أفيدكم بخبرتي في فن صقل الوجه أو تسليط الضوء على الوجه .. اللي يعتبر فن من فنون المكياج..

ليش نتعلم طريقة الصقل و تحديد ملامح البشرة أو الأنف أو الرقبة..؟؟؟؟

أولاً عسب نحصل على نظرة أقل في الحجم ، ثانياً نحصل على أنف و خد أكثر استقامه ، ثالثاً و اتكون عظام الخدود أكثر بروزاً ، و في النهاية لو كان عندج ذقن و حبيتي تخفينة ، مالج إلا هالطريقة اللي راح أعلمكم اياها..

Step by Step

في البداية لازم كل بنت تحبت تبرز بشرتها اتعرف إن أحيانا شي بنات بشرتها ماشاء الله امبونها محدده تقول للماكيرة تعالي و استلمي و بدعي بويهي بس هذا مو معناته إنها مش محتاجة لتحديد ، هي اتكون محتاجة بس بلمسات خفيفة يعني راح يكون أسهل على الماكيرة
يعني مش محتاج شغل وايد و راح يكون لمسة خفيفة مب لازم يكون عن طريق الفاونديشن
إنما ربما يكون عن طريق الإضاءة الخفيفة أو الغامجة أو الكونسيلر أو عن طريق شدو غامق و فاتح ع لون البشرة أو عن طريق توزيع ((البلشر)) على الوجه و اللي أغلب الماكيرات أو البنات يستخدمون هالطريقة تحيدووون ؟؟ يوم اتوزعون عاليبهه و الذقن و الخدود كلمسات أخيرة بالنسبة لي.

و شي بنات محتايات كل هالسوالف لبشرتهم بالاضافة للفاونديشن بدرجته الغامقه و الفاتحه .
و أحيانا الخبيرة إذا كان عندها عدد كبير من البنات ماراح تهتم لهل النقطة وايد عسب تحاول تركز على الإي شدو أكثر ..

المهم على كل بنت إنها تعرف الأماكن اللي تحب تخفيها أو تحددها في ويها قبل البدأ فالمكياج ، في وايد بنات ، يتضايقون من إن خشمهم يكون كبير أو طويل ، أو خدهم يكون مليان بطريقة يعطي دائرية للوجه زيادة عن اللزوم ، أو الفج يكون عريض و يخفي ملامح الجمال في وجه البنت ، أو حتى الذقن يكون مليان و مالها غير هالطريقة عسب تخفيه و راح يبرز في التصوير ..أو عيون الناس اللي يشوفونها من بعيد خاصة ^_^!! و هي داخلة شرات الأميرة..

و أنا بقولكم عن هاي الأماكن عسب كل وحده تيود منظرة بإيدها و اتشوف ويها عدل مدل عسب نلقي نظرة عن كثب على الأماكن اللي يحبذ إنج تخفينها عسب مثل ماقلت لج تعطيج نظرة طبيعية وحلوة و مرتبه للمكياج..!!

أولاً : الأماكن اللي محتاجة إنج تعرفينها أو تلقين نظرة عليها لإبرازها أو إخفائها..

1.الزوايا الداخلية للعيون و هذي المنطقة انحددها لما انحدد أطراف الأنف و على فوق..
2.جسر الأنف
3.تحت طرف الأنف.
4.أجوف الخدين ( تحت عظمة الخد) وطريقة تحديده اتكون برسمه إلى خارج العين على شكل حرف الـ C و اللي ماتعرف كيف تحدد ممكن إنها بشفايفها تشفطهم لداخل وبتقدر اتحدد العظمة اللي نقصدها.
5.الخطين في منطقة أعلى الشفه على شكل شبه مربع.
6.تحت الذقن.
7.حواف الجبهة المقصود فيه قرب جذور الشعر .
8.الرقبة.

الحين يالله ألقي نظرة سريعة على هالأماكن اللي محتاجه إنج تبرزينها أو تخفينها في ويهج.

هذي صورة تبين لج الأماكن اللي تبرزينها و تخفينها بالمكياج..
و إذا ماعرفتي ألقي ضوء خفيف على ويهج و راح يبين لج عدل الأماكن المضيئة و الغامقة و انتي ركزي فيها يوم بتبدين الإخفاء..

ثانياًُ : الأدوات اللي تساعدج على إخفاء و ابراز ملامح الوجه..

* ممكن تستخدمين للإضاءة بودرة أفتح من لون البشرة بدرجة أو درجتين و أنا أحب أستخدم اللوز بودر الفاتح من مكب فور ايفر اتيج بلمعه ..أو كرولاين..و يعطي لوك مبلول بنفس الوقت..

و أحب أستخدم الفاونديشن الكريمي السوبرا أو المائي الأكوا من كرولاين الدرجتين غامجة و فاتحه حسب كل بشرة و نوعها أو تستغنين عنه بفاونديشن سائل بكلا الدرجتين و لازم اتكون الدرجة اللي حابة تخفينها أغمق بدرجتين عن ويهج مب أكثر عسب مايكون في فارق كبير و يبين انه مش طبيعي أو ملعوب فيه خاصة يوم بتين تدمجينه مع الفاتح راح اتحسين انج كل ما حاولتي تدمجين في فرق شاسع .
أحيانا ماراح تلاحظين هالفرق وايد ..بس فالتصوير راح يبين الفرق والتحديد بكون رائع..

ومن ضمنهم أيضاً العجلة الخاصة من كرولاين لتحديد ملامح الوجه..

أو ممكن تستخدمين علبة فاونديشن بودرة مثل هالدرجات اللي تكون خاصة لصقل الوجه من أي براند كانت و اتكون جودتها عالية و ممكن تندمج..
مثل هالصورة..

أو ممكن اييج جذي..

أو عن طريق بلشر أو كونسيلر من أي ماركة كانت و أنا احب استخدم كونسيلر البالته من مكب فور ايفر شرات هذا أستخدمة كأساس و عقب احط فوقه بودرة أو فاونديشن سائل..

1.اسفنجة مثلثة.

2. أو بفرشاة خاصة للفاونديشن.

3.أو الإصبع ، و أنا أحيانا أفضل الإسفنجة أو الإصبع و الإصبع كما هو معروف عند خبراء التجميل يعطي حرارة و تفاعل مع البرودكت و هالحرارة ممكن تسهل لج فرد الفاونديشن و اتخليه يندمج مع واحد ثاني بلمسات سريعه خاصة الحواف اللي نبا ندمجها بين لونين ويندمج بطريقة جداً حلوة و Natural .

طريقــــــــــــة البـــــــــدء :

1.قبل البدء في المكياج طبعا أنصحج بتنظيف البشرة بأي تونك اتحبينه من أي براند عسب تتخلصين من الزيوت السطحية أو أي اوساخ على البشرة عسب ماتلطخ لج المكياج عقب.

2. وضع كريم مرطب راح يساعدج على توزيع الفاونديشن و يحافظلج على بشرتج من كثر إستخدام المكياج ، و أنا انصح بإستخدام مرطب لانكوم ينفع للبشرة المختلطة و أنصح بناتنا فيه، وهو حلو و ناعم على البشرة و فيه فيتامينات راح تلاحظين ان البشرة راح تتشربه بسرعه..
و هالصورة اتوضح لج المرطب على ايدج اليمين و الباقي عبارة عن التونك و المنظف و غيره,,

4.مش مهم بأي أساس راح تبدين حبيت أترك هالشي لإختيارج ، بس هناك بعض الطرق اللي حبيت أفيدج فيها بطريقة توزيع الإضاءة ( تسليط الضوء ) أو الإخفاء :

* توزعين الفاونديشن الفاتح على الأماكن اللي تبين تبرزينها و تتركين الأماكن اللي تبين تخفينها و بالفاونديشن الغامق تبدين تحددينها.
*طريقة ثانية توزعين الفاونديشن الفاتح على كامل الوجهه و بالاسفنجة المثلثة تاخذين الفاونديشن الغامق و عقب تحطين لمساتج على الأماكن اللي تبين تخفينها أو تبرزينها..

صورة أوضح لطريقة التوزيع ..

4. و نفس الشي لتحديد ملامح الوجه.. اتيبين الفاونديشن الغامق و تملين الأماكن اللي تركتيها فاضية أو العكس أو تحطينه على الفاونديشن الفاتح و تبدين تدمجين ..
و اتوزعينه يا باسفنجة للفاونديشن المائي أو بصبعج اذا كان سائل أو بفرشا اذا كانت علبة كونسيلر تحديد الوجه أو البلشر بنفس طريقة هالصورة,,

5. راح اتكون النتيجة جذي..

وفي النهاية راح تبدين تدمجين الأطراف بالأداة اللي ترتاحين لاستخدامها و يفضل الإصبع و اتكون الحركة بشكل دائري أو مموهه للخارج أو الداخل بالطريقة التي تحبين
حاولي تبتسمين ابتسامة صغيرة حتى يساعدج على الدمج أكثر ..

و اللوك أخيراً راح يطلع جذي ..
الملامح محددة وطبيعية و إطلالة رائعة و جذابة..

أتمنى الموضوع ينال على إعجابكم..
بصراحة وايد تعبت و أنا أدور صور و استعنت بمواقع أجنبية و ترجمتها للتوضيح أكثر
فياليت كل وحده تدخل الموضوع تدعيلي بالخير ..
و ترفع الموضوع ولو بكلمة يزاج الله خير ^_^!!