السلام عليكم والرحمه
هلا بالغاليه ام بيات
أنا معرسه من شهر ونص وكانت أوضاعي مثل أوضاع ربيعتج
كنت أحس بريلي لاهي واتصالاته تقل من وقت للثاني
ولكني صبرت ع الموضوع "لأني مستخيــــــــــــــره فيه" والله قدّر لي إني أرتبط به
وتناقشنا في موضوع الاتصال وبعد التلميحات طرحت الموضوع بصراحه
وعقب مرور شهور ع الملجه طفح الكيل ^_^ ودارت بيننا مناقشه طويله انتهت بالاعتراف اللي صدمني
طلــع مـــا يـــــدانــــي شــــي إسمه موبيــــــــل
بدايةً مارمت اقتنع بإنه فعلاً مايداني استخدام الموبيل لكني استخرت ربي والحمدلله هديت وماقمت افكر ف الموضوع لأني شغلت نفسي بعبادتي وتجهيزاتي للعرس
وفعلاً عقب ماعرست اكتشفت هالشي ف ريلي إنه مايداني الموبيل ومب متعود يتصل بحد ويتم يسولف بالساعات.. حتى إنه أوقات وايده ينسى موبيله عندي وأرد أذكره به
فنصيحتي للأخت الغاليه عليج بالاستخاره ثم الاستخاره ثم الاستخاره
ولاتقولين مر الوقت وفات ع الاستخاره
والله يالغاليه أنا كل مايستوي سوء فهم أيام الملجه بيني وبينه استخير
والحكمه مب فالاستخاره بس الحكمه في يلستج بين ايدين ربج اللي يعلم الغيب وماتخفي الصدور.. الله سبحانه يضمن لج حقج مب إنتي ولاأهلج
عودي عمرج تلجئين لله سبحانه .. وطولي بالج عليه .. نحن وايد حساسات وعاطفيات ونبا الرياييل يسئلون عنا طول الوقت
لكن الحقيقة إنهم مب متعودين والأسباب وايده:
1-الريال أوقات يتحاشى خطيبته كل ماقرب موعد العرس.. وهالشي طبيعي حتى البنت تتوتر وايد كل ماقرب موعد العرس.. هوأوقات يهملها لأن ابليس خزاه الله مابيخليه ف حاله وبيوسوسله إن العرس مب حلو .. أو العرس تقيد و و و و….. ولاتنسين شياطين الأنس شرهم أعظم
-فإن كان غالي عليج اعذريه ولاتخلين ابليس يأثر عليج وكثري من الاستغفار-
واسئلي مجرب.. يوم نختلف اسجد لربي واترجاه سبحانه ينصفني وفعلاً تيني البشاره.. ويرد يتعذر عن موقفه بدون ماأكون تعبت نفسي بالشكوى للناس اللي يضرون وماينفعون فعليج باللجوء لله سبحانه وهوبرحمته بيسخره لج يالحبيبه
2-إن كنتي تشكين إنه ندمان على الارتباط لاتسئلينه ابد عن الموضوع
-خلي شخص قريب منه يسأله .. شخص هو يحبه ويثق فيه.. خلي هالشخص يسأله إن كان لاسمح الله ندمان ع الارتباط- بس اتحذري ابد لايحسسه هالشخص إنج إنتي اللي مطرشتنه لأجل يستفسر-
3-إن كان متعود ع الكل إلا إنتي.. فهذا طبيعي .. الريال يتعود ع أهله لأنه عاش وياهم سنين
ويتعود على ربعه لأنه عاشرهم مده طويله
أما الخطيبه فتبقى شخص مجهول بالنسبه له مابيعرفج إلا عقب العرس
فدخيلج لاتتسرعين وتهدمين حياتج بالخلافات وتذكري قول الله سبحانه وتعالى"والكاظمين الغيظ والعافين عن الناس وبشر الصابرين"
4-استمتعي باللي قسمه الله لج يالحبيبه وارضي واحتسبي الأجر فلك الجنة بإذن الله
شوتبين الصبر والجنة
وإلا راحة الحياة الدنيا
الجنة باقيه برحمةٍ من الله
والدنيا فانيه ونحن ف آخر الزمان
..ممكن أسألج ياغلا..!
إذا صابه شي لاسمح الله .. مرض.. حادث.. وفاه … هل بترتاحين وبتفكرين باتصاله اللي كان مقصر فيه!!
عيل استخيري الله ولوكان شر لج الله بيعوضج باللي يقربج من الجنه من قول وعمل
وإن كان خير لج الله بيصلحه لج ولوبعد حين..
..آخر حقيقة..
لوالشخص غلط.. هل بينقص تصرفه منج شي!!
لوسار في درب العصيان..لولاسمح فعل مايكره الله هل هالشي بينقص قدرج عند ربج..
لا
إذاً فاعملي لآخرتك احسني إليه بالقول والفعل لأنك لاترضين لنفسك مكاناً إلا الجنة.. اعملي لنفسج .. كوني الزوجه الطاهره العفيفه التي تحسن لزوجها وتدفع بالسيئة الحسنة فيحبها ربها والتي تسعى للنجاة من أهواء الدنيا لرحمة الرحمن..الله.. جل في علاه
إختي الحبيبه دخيلج لاتتسرعين واعلمي أن لك اعداء هم الشيطان والنفس والهوى فحاربيهم وكوني طوق نجاة لزوجك وحبيبك لتكونا على سرر متقابلين في عليين
لاتخلين ريلج يشوف منج إلا الطيبه والهدوء لأنج راقيه ماترضين لنفسج إلا أعلى المنازل عند العلي القدير
الله يوفقكن يابنات
دايماً ادعن "اللهم اجعلني قرة عين لزوجي واجعله قرة عينٍ لي"
غالياتي وخواتي الحبيبات
إني أحب لكٌّـن ماأحب لنفسي
وأحبكن ف الله
دلال