الســلام عليـكم ورحمه الله وبــركاته ..
اشحالكم خــواتي الغاليات …
واشحال عيالكم .. عساهم دوووم بخير وصحه وعاافيه يا رب …
أٌقولكم خلوني أبدا بالســالفه وبــليز لا تبخلون علي بحل يريحني …؟
عندي ولد الله يحفظه عمره سنه و 10 شهور .. يعني قريب السنتين ..
المهم ولدي الله يحفظه أوديه الحضانه لاني أروح الدوام الصبح ….
وطبعا أوديه قبل لا أروح الساعه 7 وأرجع له الساعه 3 بعد دوامي ..
علشان جذه لازم أسوله ثلاث وجبات .. وجبه الفطور و وجبه الغداء و وجبه خفيفه ( سناك ) ..
وجبه الفطور : دااااااايما نفس الشي ( معلبات الفواكه الخاصه بالاطفال + شريحه جبن + لبن )
وجبه السناك : بسكويت + دانيت أو كاسترد + فاكهه وداايما ما ياكلها …!
وجبه الغداء : يا معكرونه بالجبن أو نودلز بالجبن أو نقانق أو كباب …. مع عصــير … فقط لااا غير
أسويله رز ما ياكله .. خبز وجبن ما ياكله … معكرونه بلحم مفروم ما ياكلها .. فطاير ما ياكلها .. الصمون ما ياكله …
خضروات ما ياكلها ….
يحب الشوربات بس صعبه طبعا اني أسويله شوربه ,,, أخاف تنسكب في الشنطه ماله .. وبعدين أصلا بتبرد لين يشربها وما بيرضي يشربها ( أعرفه ما يحب الشي البارد ) …!!
بليز شو تنصحوني أسويله ؟؟؟ بس أبا شي سريع وأقدر أطبخه له الصبح قبل لا أروح للدوام .. لاني أجهز شنطته بالليل لكن الاكل طبعا اجهزه الصبح …
أبا أجدد وأغير له اشوي علشان ما يمل من الاكل لانه صاير ما يخلص أكله .. بس ياكل اشوي منه وبس ..
لا تبخلون علي بوصفاتكم الشهيه والمغــذيـه …
للعلم البيض و البطاطا ممنوعين في الحضانه ..
وربي لا يحرمني منكم …
المشاركة الأصلية كتبت بواسطة ثمرة حبنا 