غير هالجمعيات الي صارفين مبالغنا عليهم وين ارخص مكان لمشتريات حاجاتنا
تدخلين الجمعيه بالشهر تقريبا 7000 وكارفور نفس الحاله يعني ما شي فايده
سوينا طريقه نكتب بالورقه الي محتاجتنه وماشي فايده بعد غالي تعبنا الصراحه
شوفي اللولو والسفير
حبيبتي
المبلغ اللي ذكرتيه ما ذكرتي حق كم شخص بالبيت
يعني اكيد البيت اللي فيه 3 اشخاص غير عن البيت اللي فيه 7 اشخاص
الاسعار نار في كل مكان والمشكله كل شغلات الجمعيه من الاشيا الاساسيه ….
راجعي الكميات اللي تشترينها
انصحج تسيرين الجمعيه كل اسبوع مره وحده بهالطريقه تعرفين احتياجج اول بأول وتاخذين كميات تخلص عنج باسبوع وما تتكدس وتخترب عليج مثل الخضار والحليب وهالاشيا
ما قصرتوا نحن 5 اشخاص وتصدقين كل اسبوع اروح الجمعيه ومسويه لسته معينه مب كل شي اشتري الا المحتاجتنه وعلى اخر الشهر 7000 ابا اعرف انا اصرف او ما اعرف اشتري لانه سمعت في عايله تتكون 8 اشخاص يصرفون 5000 بالشهر فهل هذا مني انا الغلط او الغير يقصر بعمره بالمشتريات عسب جي اتخبر ابا اسير مكان رخيص وبشوف مني انا الخطأ او من الجمعيات
ام خالد حبيبتي ان شاءالله بشوف بس انتي جربتي عندهم وشفتي رخيص
جربي اللولو
وصح اسبوعيا احسن
ويمكن ادوات التنظيف وجي في انواع اللي تييج من شركة اللولو اقل اسعارها
وحتى الخضرة في انواع اغلى من الثانية
جيكي على هالاشيا هالمرة وجوفي اذا في فرق
اذا كان هالمبلغ يشمل اللحم والدياي والخضره والفواكه والطحين وكل شي انت تحتاجينه بالبيت يبقى هذا مصروفكم اللي يكفيكم بالشهر
تعرفين في عايله غداها نص ذبيحه ….وفي عايله غداها بس كيلو ونص او كيلوين
في عايله كل عيالها ايلسون ع السفره وياكلون …وفي عايله نصهم بس يتغدون والباقين يا اما بيقولون ما نبغي يا اما يتصلون بالكافتيريات
في ناس يطبخون للوجبه نوعين من الاكل وفي عايله تكتفي بنوع واحد للكل
نفس العدد بس العادات الغذائيه لكل عايله تختلف بالتالي الميزانيه تتأثر