الوسم: الأركان

هاي صورته: لونه أصفررر و ريحته قويه بس ريحة زيت يعني مب ريحة غريبه، من ينحط عالبشره تختفي ريحته لا تحاتون، ياما استخدمنا اشيا ريحتها خايسه و تلصق عالشعر والبشره ولا استفدنا صح؟ هههه

طلبته من تاجره من المنتدى لا تسألوني منو لنه وايدات يبيعنه و ماذكر خذته من عند منو ، دوروا عادي ماياخذ 5 دقايق، ويوصلكم في يومين، سعره يختلف طبعاً حسب الحجم بين 60 و 250 درهم ومادري اذا ينباع عند العطارين.
*أي رسائل خاصة توصلني عن الزيت اسمحولي ما برد عليها لني بكتب كل اللي اعرفه هني
وبما انها اول تجربه فما عندي خلفية عن الزيت الاصلي واللي مب اصلي ، كيف في مب اصلي وهو من نفس الشجره !!!الكواليتي يمكن

خصائص الزيت:
الزيت خفيف مب نفس باقي الزيوت، تتشربه البشرة بسرعه وما تكون في آثار عالجلد مثل اللمعان بالعكس، و يعطي الشعر لمعان صحي

طريقتي :

– يوم بتدهنين ويهج او جسمج او حتى شعرج ،، بس مسحه تمسحين الزيت يعني مب تغرقين ويهج كله زيت
وهذا الكلام مع كل الزيوت عشان ما تنسد المسامات
من 4 إلى 6 قطرات تكفي حق الويه كامل و تحت العيون وعالحواجب ،، كل مكان احطه عادي هذا زيت طبيعي بس طبعا ما يلامس العيون (بالنسبة للشعر اللي عالويه ما حسيت انه زاد نفس يوم كنت احط زيت الزيتون ، لا عادي)
– حق الشعر احط كمية بسيطه جدا ومساج خفيف وامسح مسحه خفيفه عالشعر كله و اتريا من 10 دقايق الى 30 دقيقه و اغسل بالشامبو عادي وما يحتاي احط بلسم (ما أطول فيه لنه بعض الزيوت يوم تحطينها عالشعر وتطولين فيها يطيح شعرج اكثر لنه الزيت يكون قوي او حار على فروة الراس وبصيلات الشعر)
– احط مرتين في اليوم عشان تبين النتايج وطبعاً التقشير و التنظيف وهالسوالف ضرورية قبل الاستخدام عشان تحسين بنتيجته بشكل أسرع. (مب كل يوم تقشير ولكن مره في الأسبوع اوكيه خاصة لو عندج نمش وكلف وسواد) وقبل كل استخدام غسلي ويهج بماي بس او صابون طبيعي، ترا كثرة استخدام غسول الويه يضر البشرة.
-أهم شي في أي منتج طبيعي هو الاستمرااااااااااااااااار ، لا تتوقعين نتيجه من اول استخدام

نيي عند المهم: شو استفدت وشو لاحظت في فترة (أول 10 أيام فقط)

1: في النعومه :

ما شاء الله لا كريم ولا أي زيت ثاني لاحظت فيه هالنعوووووومه ، جد جد جد ينعّم البشرة والايدين والشعر وحتى الركب ههههه ، في النعومه رقم 1

وحاولي تستخدمين صوابين طبيعيه وما تنشف عشان تبين النتيجه اكثر، والتقشير والصابون المغربي اكيد وايد بينفعون بعد، حتى يوم اشمخ ريلي ما شاء الله ما شوف علامات الجفاف البيضا اللي تلاحظينها دوم خاصة عقب الشاور.
ينعم الايدين ماشاء الله وما قمت اشوف اليلد الميت اللي يطلعلي حول الاظافر اللي كان ملوع جبدي وكل يومين لازم انظف، هو اكيد يطلع وينمو لنه لكن بصورة طبيعيه.

2: في ترطيب و توازن البشرة:

بشرتي دهنية على جافه على مكس كل يوم شي مادري شو سالفتها ، والزيوت اللي كنت استخدمها ماكنت ارتاحلها لنها تزييت البشرة بزيادة
الا زيت اللوز "المر" وبتكلم عنه في موضوع ثاني ان شاء الله
زيت الأركان وازن البشرة لنه في نقطة مهمه جداً وكل الناس فاهمينها غلط انه البشرة الدهنية لازم تجففينها وماتحطين وايد مرطبات وكريمات وزيوت عشان ما تزيت اكثر ،، وهالشي غلط
أخصائية بشرة مرة قالتلي : البشرة تفرز دهون أكثر لنها من داخل جافه وايد فتحاول توازن نفسها بإفراز هالدهون . ولنه هالزيت يرطب بعمق الحمدلله قلّت مشاكلي مع الافرازات الدهنيه.

3: في السواد والكلف والعلامات:

قبل ما تبدين الروتين لازم تقشير ، استخدمي اي مقشر او ماسك مقشر او ليمونه ، انا مسحت ويهي بليمونه صغيره معصوره وغسلته وعقب حطيت الزيت ، لنه العيد ياي وهاي طريقة اسرع في التخلص من الكلف والسواد اللي في بعض المناطق .. اللي بشرتها ماتتحمل الليمون لاتحط ليمون
خفف من الكلف والسواد واحس انه هو اكثر شي لتجنب هالاشيا (الحمدلله ما طلعلي حبوب ولا شي وبالتالي ماشي علامات يديده) ما يبيض ولكن يساعد على توحيد لون البشرة، يعني اللي ايدها او ريلها مسوده من العباه والشمس إلخ ،، بيردهم للونهم الطبيعي مع الاستعمال المتكرر.
– قلل الكلف بنسبة 35% وقلل السواد بنسبة 25% و المسامات بنسبة 15% طبعا لنه الترطيب المستمر هو الحل لمعظم مشاكل البشرة (وانا متأكده لو كان رقادي منتظم كان شفت نتايج توصل ل 50% ، بس الحين رمضان وكله سهر وجي والسهر ابدا مب زين للبشره والصحة بشكل عام)
– ولا تنسون انه ها كله تقريباً في 10 ايام إلى اسبوعين ما شاء الله

4: في تساقط الشعر

امممممم ما قدر احكم لين الحين لني حطيته 3 مرات بس ، هو انا واثقه انه مفيد جدا للشعر بس اعتقد الشامبو كان قوي ، بس خفف شوي من التساقط

5. في نعومة الشعر

احط منه مسحه و عقب اغسل شعري بالشامبو عادي مره او مرتين مب ستين مره لنه الزيت خفيف (ما احط بلسم)
ويوم طلعت من الشاور شعري بسرعه نشف مب نفس يوم احط بلسم يتم الماي فيه نص يوم و أتلعوز بالتنشيف والسشوار
ما نكّش شعري (بالعاده ينكش لو ما احط بلسم) ولا خلاه دهني (نفس يوم احط بلسم يتم الشعر ذبلان ومافيه حيويه)، عطاه كثافه و ملمس ناعم و بسهوله نشفته وسحيته الحمدلله و يعطي لمعان طبيعي للشعر.
ترا نفس ما البشرة لازم تتنفس ، الشعر بعد لازم يتنفس
مب كله بلسم وحمام زيت و زيوت وكريمات وحاله ، مره هي ومره لا …
وبعد ماتنشفين وتسحين شعرج ما يضر تحطين مسحه من الزيت على الشعر مب الفروه.

ملاحظات ونصائح مهمه بشكل عام:

1. شرب الكثير من الماء يساعد على اعادة توازن ونضارة البشرة بجميع انواعها
2. تقشير الويه والجسم بشكل خفيف ويكون شي روتيني عندج عشان تتخلصين من معظم مشاكل البشرة
3. اللي تعاني من حب الشباب واللي بشرتها حساسة وماتتحمل شي تروح عند دكتور جلدي وتتعالج بشكل تام بدل ما تجرب وتخبص وتزيد الطين بله.
4. اسرع الناس اللي بيشوفون فرق مع أي منتج هم اللي عندهم مشاكل سطحية ومن فترة قريبه وجفاف مؤقت وجي … اما اللي يعانون من مشاكل قديمه و وراثية يبالهم فترة أطول ، مثل اسمرار الركب والاكواع و المناطق المختلفة في الجسم والوجه ،، يبالهم تقشير مستمر و عنايه خاصة و ترطيب مستمر. واذا تركت العنايه كل شي ممكن يرجع نفس قبل وهاي المشكله.
5. اي منتج تستخدمينه استخدميه لفتره وبدون تمكيس عشان تعرفين صدق يفيد ولا لا.
6. الأكل الصحي و عدم السهر ، و ممارسة الرياضة حتى لو شي بسيط يفيدون بشكل عام لنه السموم تطلع مع العرق.
7. لاحظت وايدات يبالغون في غسل وتنظيف الوجه ماعرف ليش!! ياريت ينظفون اماكن ثانيه كثر ما ينظفون ويوههم هههه. كثرة استخدام الغسول والصابون يضر الويه لنه يسوي خلل في توازن البشرة الطبيعي وبالتالي جفاف و الجفاف يؤدي لظهور القشور او زيادة الافرازات الدهنيه ، وبالتالي بتحطين كريمات زياده وبالتالي بشرتج بتضرر اكثر لنه ما بتتنفس وبالتالي حبوب وكلف وسواد و رؤوس سوداء وبالتالي خساير بالآلاف لنج بتحطين مستحضرات اكثر لاخفاء العيوب و حق العلاج و غير الحالة النفسيه اللي ما بتفيدج بشي بالعكس، فأنا اقول استريحي و عاملي الويه بكل رقه و نعومه وكثري من المنتجات الطبيعيه، بدل التونك امسحي الويه بقطنه فيها حليب شو المشكله؟ ترا اللي ناخذه بـ 100 و 200 بعد من الحليب!! وفي بالخيار وفي بالليمون !! ليش هذا كله مب موجود في الثلاجه بدرهم ودرهمين؟! وطبيعي ومافيه مواد مضره ولا كحول ولا عطر ؟ انا عن نفسي يوم ودرت الغسول ارتحت وما استخدم الغسول الا اذا كنت حاطه مكياج، باقي الايام بس ماي او ماي ورد وهالسوالف اللي طريتها وتقشير مرات وماسكات ويشلون كل شي وكان الله غفورا رحيما.
8. بشرتي طبعا عاديه ومب بيرفكت بالعكس فيها مشاكل حالي حال كل بنت، لكن بالنسبة لقبل الحمدلله وايد خفت. في اوقات اجباري بشرتج بتتعب وبتطلعلج حبوب مثل وقت الدوره وعقب الحف وغيره هالشي لابد منه.
9. لا تنسون انه معظم المشاكل من داخل الجسم الى الخارج، فعالجوها من الأساس وبعدين عناية من الخارج بس.
10. اللي الله أنعم عليها ببشرة حلوه لا تروح تخربها وتجرب خلطات وتخبص.
11. طبعا مثل ما قلتلكم لا تتوقعون نتائج مبهرة من اول استخدام لأي منتج كان ، ولا تنسون انه النتايج تختلف من بشرة لأخرى.