السلام عليكم ورحمة الله وبركاته
حبوبات
حبيت نفيد بعض بطرق الإيحاء الي نحس فيها وقت التصميم
يعني الي تحس فيها شي من الإبداع في التصميم والإنتاج
تحط من خبرتها عشان المبتدآت يستفيدن
مثلا الألوان الي أستوحيها أشوف ألوان الطبيعه والإبداع الإلهي في الحيوان والنبات
يعني ألوان بعض الطيور والتناسق الرباني
وبعض الورود والأزهار
وصدقوني المبدع ما يشوف لون السنه شو لأ المبدع عنده كل الألوان يلعب فيها على كيفه
وما يلتزم بإبداعه بلون معين في السنه
يعني يقولون اللون الدارج هالسنه الذهبي والأسود والسنه الماضيه الأصفر والأسود
هذا خطا لأنه بهاذي الطريقه يوجه إبداعه لرأي الناس وما يثبت وجوده في ساحة التميز
يعني يستغل هالموهبه في التجاره وهذا خطأ
لأن هذي الطريقه تموت الإبداع فيه
عشان جيه المفروض ما نشوف شو الناس يحبون
لأ نحن نخليهم يحبون شغلنا
ومرات نحصل تصاميم تحتاج خامات غريبه وندور عليها في السوق وما نحصلها
نوقف
طبعا لأ
نحاول نصنع هالخامه بالموجود
وإذا كانت تحتاج قماش وما حصلناه نستبدله بخامه ثانيه يمكن تكون فكرتها يديده وحلوه
يعني مثلا كنت أصنع بكلات حق البنات الصغار بس حاولت بكذا طريقه أوصل لفكره تخيلو شو طلع معاي
أكيد تعرفون أزرار البدلات الي زمان كانو يخيطونها ويغلفونها يقماش
خذت بالجمله وهي تكون عباره عن قطعتين وحده فيها خرمه والثانيه مسكره
أخذت المخرومه ودخل فيها مطاط قوي وربطته
بس شو طلعت ولا أروع وعندي منهم من سبع سنين لو تغسلينها بالغساله ما تخترب
وطرق لصق الكريستال
جربت الكوايه وجهاز الكريستال بس من طبعي أحب أستخدم أشياء توفر الوقت والجهد
فدورت ودورت وجربت وجربت لين إكتشفت منتج روووووووووووعه
إستغنيت عن صمغ الشمع والسوبرقلو والأوهو
وهو ؟؟؟؟؟؟؟؟؟؟؟؟
أسرار مهنه
وصرت أستخدمه حتى في الأقمشه
زين نجي لمكان العمل
بالأول كنت أحط أغراضي في جيسه لأن شغلي كان شوي
وبعدين شنطه
والحين الحمدلله صار عندي مصينيع في بيتي
خلنا نرد لموضوعنا
كيف تييج فكرة تصميم بصراحه أسوي تصاميمي بدون ما أدور في السوق عالشياء اليديد النازله أو الخامات
ممكن تكون في خامات قديمه بس بتصميم مبدع تطلع رووووووعه
أهم شي ماتربشين عمرج بكذا شغله
يعني خصصي إبداعج لشي معين خصوصا لو كنتي باتستخدمينه بالتجاره
وباقي الأشياء سويها تسليه أو عند الطلب
بس لاتنسي عدم تكرار الأشياء عشان تتميزين بتصميمج وإنتاجج
هذا لعدم وجود محل يصرف المنتجات لكن في حال وجود محل ممكن التعدد في المنتجات
شو بعد
طبعا النت أخليه آخر شي ممكن أحصل فيه أفكار بس ممكن المبتدئات يدورون عن أشياء تخص إبداعهم مع إدخال بعض الحركات في التصميم ويطلع منتج مميز
غير جيه أحب أشوف شو اليديد في الدول يعني ما أقصر أفكاري بالموجود حواليني
أدور وأسأل أي أحد متواجد في أي بلد عن منتجاتهم شو اليديد فيها
أكثرهم يعطونج أفكار لأشياء إنتي فكرتي فيها وأنتجتيها
كيف تعرفون إن الإنسان هذا مبدع في أعماله
في شي يميز الشغل وتحسين فيه روح إبداع
لكن بعضهم ينقلون ويسرقون أفكار وينتجون عمياني
والدليل قليل منهم يغير في تصميمه
لكن المبدع تعرفينه في تميز قطعه الي صممها وأنتجها
ولما تقولينله سويلي مثل هالقطعه يقول أنا ما أكرر شغلي
لأن مستوي الإبداع عنده إرتقى فيحس إنه يريد يتجدم مو يرجع ورا
وصدقوني الأغلبيه ما يمارسونها للتجاره إنما هي ترويح وتفجير لطاقاتهم الكامنه
وأعمالهم هي المتنفس الوحيد
بصراحه أنا كثير عصبيه بشكل محد يقدر يتخيله بس شو الي يمتص غضبي وحزني
مشغولاتي
أحس لما أوصل لقمة الغضب أدخل مصنعي وأبدأ
طبعا في هذيك اللحظه ما في شي يكون في بالي لكن أطلع قطعه من تحت إيدي أستخسر مرات لإني أبيعها
لأنها تكون مميزه
أرجو من المبدعات وضع أفكار تجديد التصميم
وشو الي يهمكم في التصميم
طبعا نبي آراء بنات موهبتهم هالشي مب دارسينه
لأن صدقوني الي دارسه شي غير الي موهوبه فيه
المشاركة الأصلية كتبت بواسطة غلا الخور. 
