من بريد المشكلات الإجتماعيه نعرض لكم هذه الرساله
وتذكروا اخواتي ان البنت تحتاج للنصيحة الطيبه .والكلمة الحلوة…
و لا تنسون قوانين القسم
5- عدم الاستهزاء بمشاكل العضوات ومن تستهزء تحذف مشاركتها
واذا كررت اسلوبها توقف عضويتها.
6- استخدام اسلوب لائق في التعبير والبعد عن الكلمات الغير لائقة.
7- التعامل بجدية ومصداقية للمشكلة ومحاولة طرح حلول مفيدة لتستفيد منها العضوات.
أما تفاصيل الرسالة تقول
قصتي بدت بعد ما يبت مولودي الأول صار ريلي يمل من اليلسة وياي وما يحب يتكلم وياي وبعدين اكتشفت انه يكلم وحده ,, واجهته بالموضوع ثار وعصب وصارت حالته حاله وتم على هالحال فترة وقال لي انتي تراقبيني وإنتي وإنتي وأونه زعل وقال ليش تسوين جذي قلت له أبي أحافظ على بيتي قالي محد بيمس بيتج
وسكت عن السالفة وتم زعلان واظطريت اني أروح أراضيه طبعا لأن مو حلوة انه ما يكلمني يدام أهله تعرفين شو قال لي قال أونه هاذا ربيعي متضارب ويا ربيعته وإن هو يراضيهم
تعالي شوفي المكالمات من متى لي متى وأنا مرته ما يفكر يتصل لي إلا إذا كان يبي يعرف شو الأكل أو عشان أفتح له الباب تخيلي…
وصار ما يرمسها…
وبعد ما يبت المولود الثاني أحس انه صار غريب عني ما يكلمني إذا بتقرب منه ينفر مني يدور علي الزلة
وبعدين اكتشفت انه يكلم وحده ثانيةغير اللي كان يكلمها قبل طبعا هذيك تكنسلت خلاص
بس ما فاتحته بالموضوع يعين بالمختصر ما يعرف إني أدري عن اللي يكلمها أوبالأحرى يكلمهم لأنهم صارو أكثر من وحده
يمكن يدور فبالج إني مقصرة فشي لا والله يشهد إني مو مقصرة وياه فشي بس ما دري شفيه
تعرفين شو يقول لي يقول المفروض كل ريال يكون عنده ربيعة وتخيلي يطلب مني إني أعرفه على وحده من ربيعاتي وإذا شاف وحده في الشارع أو التيلفزون يتفداها ويتغزل فيها وأنا حرمته حتى كلمة حلوة ما يقول لي ياها
والله آخر كلمة حلوة قالي ياها من 3 سنين أول ما عرسنا وهذي السنه الرابعة
ولم أواجهه يقول لي أنا ما رمس والمصيبة انه يحلف على هالشي عيل هالمسجات اللي يتفداها فيها شو والأردى من هذا انها مالجة
( في وحده يكلمها وايد )
بعد ما بيت مولودي الثالث اكتشفت شي ما بتتخلينه
وحده من اللي يكلمهم مطرشتله صورة ( المنطقة الحساسة) استغفر الله تخيلي لين وين وصلت به المواصيل
أنا صراحة انصعقت ومسحت المسج ما تجرأ حتى يسأل عن المسج..
تصدقين إنه مره كان طالع مع المالجة ومودي ولدي الكبير وياه وولدي هو اللي قالي انه طالع مع وحده ولم يبته له عن طريق الغشمرة تعرفين شو قال لي تطرشين جواسيس وياي مره ثانية ما بوديه
لا ويطرش صور عيالي للمالجة وتتفداهم ويرد يقول لها الله يخليج لي أنا فعمرة ما قالي ياها
والله اتخيلي استحي أقول هالشي بس حتى المعاشرة ما تكون إلا بعد كل 2 أو 4 شهور
وإذا اتقرب منه يتملل ويتأفف أقول له ليش تسوي جذي أنا مرتك يقول لي من كثر ما تسوين هالحركات اتمللت منج مع اني ما سويها إلا بين فتر وفتره عيل كيف يمل مني
تعرفين شو يسوي بعد لم أروح وياه مكان مثل موعد أو شي يخليني أنزل بروحي وهو يتم يالس فالسيارة
قمت أشك انه ماخذني غصب عنه أحيانا أكره أشوفه مع اني أعشقه والله تدرين مره شو قال لي قال( استغفر الله لو ما كان الله موجود جان عبدتيني )وين بيحصل حرمة تحبه جذي…
مره قلت له بتحلف عالمصحف إنك ما ترمس بنات تعرفين شو قال لي قال بحلف
ليش يسوي جذي مابي أدخل حد في هالمشكلة لا من أهلي ولا من أهله
..
في إنتظار مشاركاتكم و آرائكم ونصائحكم
والله الغلا تبين الصدق … من وجهة نظري وخبرتي في الحياه … الريال يوم تطنشينه وماتسويله سالفه يركض ورااج … طبعا بعض الرياييل .. والظاهر هو من هالنوع يحب البنت اللي تتغلى عليه وماتسويله سالفه … وتلبسه ولا تكلمه … والسالفه هذي نفس سالفة ربيعتي .. تحب ريلها مووت وشوي بتعبده .. وريلها يتصرف شرات هالريال اللي تقولين عنه … ويوم خبرتني بمشكلتها … قلتلها طنشيه ولا تسويله سالفه … وخذت بكلامي وطبقته .. وقالتلي والله العظيم عقب فتره انه هو تغير وصار أحسن ويحاول يتقرب منها وهيه تبتعد وتتغلى ولا مسويتله سالفه … والحمدلله فادت نصيحتي …
لاحول ولا قوة الا بالله
قلبي معاها مع انها ماتحتاج لقلوبنا كثر حاجتها لـ قلب زوجها…
في شي مقتنعه فيه…
الزوج اللي يشوف زوجته تركض وراه وتحبه موت ومستعده تسامح عـ الزله مره و2 و3
يتمادى…
خاصه لما يكتشف ان زوجته عارفه بسوايـاه وساكته..
هذي نقطه وايد مهمه…
الغـلا…
اكبر غلطه وقعتي فيها انج من اكتشفتي انه يخون صارحتيه وبالتالي هو قلب الطاوله عليج
وصار هالشي عنده عادي حتى لو تم ينكر مايهمه تعرفين او لا بس يحاول يحتفظ لو بجزء بسيط من صورته جدامج وجدام اهله والعيال..
الزوجه قبل ماتفكر تواجه زوجها حيال اي خيانه لازم تكون قد المواجهة لان الامر يطلب تنازل من احد الطرفين اما
انتي
او
هو
اذا هو تنازل هذا بفعل قوة شخصيتج وقدرتج عـ المواجهة
اما اذا انتي تنازلتي مع ان الحق وياج… هذا يدل على ضعف شخصيه وبالتالي الزوج يستقوى اكثر واكثر
عـ العمـوم حبيبتي…
تقولين انج زوجه محبه لزوجها وتراعينه وغير مقصره ابـد لا في المظهر ولا في الشكل ولا في جرعات الرومانسيه
ومع هذا مافاد معاه ولا يـاب نتيجه…
هالمره جربي تاخذين الاتجاه المعـاكس
اهتمي بشكلج ومظهرج وكل بعد فتره ظهري بلوك يديد
لكن
بدون ماتلتفتين لـ ريلج…لاتمين يالسه ف البيت اظهري مع هلك خواتج اربيعاتج اشغلي نفسج بأي شي خاري او داخل البيت
يعني عطي نفسج اجازه واركني جزئية انج معرسه وعندج ريل تسألين عليه وتهتمين فيه
هي فتره معينه بس ترتاحين فيها من ريلج وسوالفه
وبنفس الوقت تشغلين باله وتخلينه يفكر بسبب التغيير اللي طرا عليج فجأة
لاتيأسين لأن اهمال الزوجه لزوجها بصورة مفاجئة يشغل الزوج والف علامة استفام وتعجب يدورن في راسه
هالشي بيخليه هو اللي يسأل وهو اللي يحاول يتقرب
وفي كل الاحوال مابقولج اهمليه لا.. قومي بواجبج كـ زوجه اذا تطلب الامر…
لكن خلي المبادره منه.. وانتي مثلي عليه دور الزوجه اللي ماهمها في الحياه شي غير سعادتها وسعادة اعيالها
وهو ماعادت له اهميه سواء بقى والا ظهر
حتى الاتصالات لاتردين عليه من اول مره
هالتغييرات بتحيير الزوج وممكن يفكر باشياء مالها وجود
وبالتالي يحاول يسترجع العلاقه القديمه مع زوجته او يجددها..
الغلا…
عسب تظهرين من تجربتج بأقل الخسائر…
لاتجعلين زوجج كل اهتماماتج وانما جزء من هالاهتمامات
الحب عسب يعيش يحتاج لتغذيه .. وبالتالي لـ عوامل
شرا النبته عسب تعيش تحتاي للري والشمس والغذاء والتربه الصالحه
اتمنى تسير حياتج بالطريج اللي تتمنينه وعساها مرحله مؤقته مصيرها للزوال
يمكن نصيب هالأخت إن رد هيا وردي ايون ورا بعض ,,
أنا والغالية هيا نتفق بأفكار وحتى بمفردات .. كلام هيا واللي بكتبه مفتاح الخطوة الاولى لها ..
ممكن أكون قاسية .. بس اكيد بدون تجريح
ما دام زوجها هذي اخلاقه ,, لازم تحط شيء في بالها
من شب على شيء .. شاب عليه ..
قولي لها انسي انسي يغير موضوع البنات هذا .. هو مدمن وجود صوت نسائي .. والعالم الله مدمن الحرام .. لأن السبب الوحيد اللي ما يخلي ريال يقرب زوجته هو هالشيء
موضوع الزوج بحطه على جنب
الحين موضوعي في الزوجة نفسها ,,
اول نقطة .. امنعيه ياخذ العيال ,,
باجر يتخزن هالشيء في اللا وعي عندهم ويكبرون عليه …
العيال في عمر حساس ما ينفع يشوفون حرمة غريبة مع ابوهم .. لأنه جيه يعلمهم عدم احترام الام ويقول لهم بطريقة مبطنه ( اطلعوا مثلي .. واعتبروا الحريم جواري وبس ) ..
الحين هي ..
فيه بيت شعر يقول:
" من يهن يسهل الهوان عليه ,,, مالجرح بميت ايلام "
وهي للأسف يوم صفعها ع الخد اليمين .. عطته الخد اليسار ..
أي محاولة الحين للغضب واختلاق المشاكل معاه هو تحديدا ممكن تقلب الامور عليها بشكل سلبي .. لأنها تمنعه من شيء كانت تسمح له به ( حتى لو مغصوبة على هذا السماح )
الحين الخطوة الافضل هي انها تلتفت شوي لذاتها ..
تحاول تحب نفسها لأن الواضح ان ثقتها بنفسها مهتزة جدا وهي قاعدة تكرر انها ما تنقص شيء عن الباقين اللي في حياته ..
بالرجوع للخيانة الاولى .. لاحظت انها تزامنت مع الولادة
اسفة على التعبير يمكن موب من المناسب احملها المسؤولية لكن اعتقد هي كان لها دور
عادة الحرمة بعد الولادة تنشغل بالبيبي ويكون الزوج عندها تحصيل حاصل .. او تهمل جسمها وما تتخلص من زوائد ما بعد الولادة وبالتالي يخترب الجسم ..
وممكن ما تكون بادرت لعلاج التشققات اللي عندها .. او اهملت طريقة لبسها وكشختها .. او يمكن خلته يعاني من صياح البيبي واضطراب نومها هي ..
اتمنى الاخت ترجع بالذاكرة شوي ورا .. وتشوف نفسها في ذيج الفترة هل سوت هالشيء ؟؟
فيه شيء ممكن يكون حساس ,, المنطقة الحساسة .. هل اهتمت فيها او نست تمارين استعادة الرحم .. وهالشيء ينفر الزوج ..
الحين بتكلم عن الوقت الحالي ..
زوجها الظاهر ايي منه الخير .. بس يحتاج لطولة بااااال وصبر .. وطبعا لخطة محكمة فيها مزيج من طيبة + تسامح+ صبر+ ثقة بالنفس+ مكر الحريم بالتأكيد
تقدر اتطنش زوجها .. ما تسأله ابدا عن وين رايح وين راد .. تخليه على راحته .. وبالعكس يوم يرجع البيت تسير له هي وتوقف على طلباته ؟
هذي اول نقطة ..
بعدين تهتم شوي بنفسها ..
من كم ناحية ..
الرياضة وتخفيف الوزن+ حمامات زيت للشعر واقنعة للبشرة + ميك اب خفيف دايم بالبيت ومنسق ثقيل حبتين للطلعة + تغيير استايل البيت من جلابيات إلى تنانير وقمصان او ملابس سبووور مرتبة + اهتمام بتغير تسريحة الشعر ونعومة اليد والرجل
اتراويه انها ممكن تشغل نفسها عنه بشكل جيد .. تقرى مجلات وكتب .. تتابع النت والكمبيوتر .. او حتى تطلب تتعلم السواقة ..
تخليه في مرحلة التطنيش سهر او اثنين .. في هالفترة هي تكون مهتمة بذاتها واستعادة انوثتها ولو تراجع طبيبة نسائية بتفيدها أكثر ..
خلال نفس الفترة لازم يعاني حرمان عاطفي من الكلام الحلو ومن توددها له .. نوع من الهجر حتى بالفراش .. تتحمل شوي علشان تكسبه .. والمفروض في هالفترة ما تحاول تغريه بعد ..
تعتبر هالريال زميلها في البيت .. تعامله بأدب واحترام وما تعق الميانة بينها وبينه وايد ..
بعد الشهرين ,, الخطوة الثانية هي تدمير علاقته الخاصة .. بطريقة مجهولة .. نحتاج هنيه لرجل ثقة ممكن يكون اخوها او زوج اختها بس لازم ما يكون يرمس ريلها وايد يعني واحد علاقته مع زوجها سطحية وما بينهم تيلفونات ابد ..
ونحتاج لرقم البنت المالجة ,, وياليت اسم اللي مالج عليها بعد يكون احسن
ونحتاج لتيلفون شارع .. يفضل من نفس امارة الزوج
نخلي الريال يتصل بالزوج ويقول له معاك مركز شرطة ( المنطقة القريبة منهم ) يا اخوي فيه شخص عندنا مشتكي عليك انك مزعج أهله .. وأنا كضابط امن واجبي اتصل بك وأحاول احل القضية وديا .. الريال احنا هدينا اعصابه الحين بس يا اخوي انت شو بينك وبين زوجته .. يقول انك مزعج حرمته وهو شايف مكالمات ومسجات من تيلفونك في تيلفونها ..
يعني بمثل هالطريقة ..
او يتصل بالبنت نفسها في حالة تعذر الحصول على اسم زوجها .. ويقول لها يا فلانة أنا اعرفج واعرف اهلج عيب عليج اترمسين فلان .. انا اعرف زوجج وانصحج لوجه الله لأن ريحة فضيحتج فاحت واهلج ممكن يدرون بين لحظة والثانية ..
او أي خدعة تيلفونية ممكن تحل الامر
في الحالتين الحرمة والريال بيخافون من الموقف ..
وبتلاقينه هو يرجع بقلب خايف ما يعرف كيف يتصرف ..
خليه كمن يوم .. وفي هالفترة راقبيه .. بس من بعيد .. اذا صار يغلق تيلفونه أو استعمل رقم ثاني او بدا ما يرد على أي رقم غريب .. اعرفي ان الخطة بدت تنجح وان لخوف بدا يدخل العلاقة
((( الخوف والفلوس هم الشيء الوحيد اللي اذا دخل أي علاقة .. افسدها )))
ابدي بالمكر هنيه ..
في عز خوفه ..
وانتي اصلا مبعدة عنه قومي في الليل وهو راقد ( اختاري ليلة الجمعه)
فاجئيه انج تحضنينه وكأنج خايفة ولو تعقين دمعتين احسن .. بيستغرب .. قولي له .. حلمت بك حلم يخوف .. بعيد الشر بعيد الشر
بيحاول يعرف الحلم ..
اخترعي له شيء يخوف .. مثلا اشوفك متعلق بطرف حفرة فيها نار واحاول اسحبك ايدك بالغصب مسكت ايدي وبصعوبة قدرت اشدك ونشيت وانا اسحبك واحس النار واصلة عندي
او أي شيء يخليه يحتاس ويتم يفكر ..
في هالليلة ارقدي بحضنه ( بس ارقدي موب أي شيء ثاني )
قومي الصبح جهزي له ريوق وبرزي ثيابه للصلاة .. ولبسي العيال للصلاة وعقب هاتي مدخن وحطي عود ودخنيه وهو واقف ..
ورمسيه وانتي اتدخنينه .. هالمرة قولي له : حبيبي شو فيك ؟؟ انت متغير من كم يوم وأنا موب مطمنة من الحلم ..
قيسي رد الفعل لو حسيتيه يعيش احساس الذنب والخوف فتأكدي ان لاموضوع قريب ينحل ..
اذا موب مهتم .. فهذا يباله تعب وتعب وتعب …
اكتفي بها الرد الحين ..
أي تطور جديد بالقصة اتمنى اعرفه .. علشان اقدر اساعد ..
والله يهدي سرج ويحفظ بيتج يا اختي صاحبة المشكلة …
والله يجزيج الخير اختي يا ورد
وبالفعل إستطعن تحليل مشكلتك وتقديم بعض الحلول المقنعه
وكذلك فعلت التاجره المتآلقه ولن ازيد على كلامهن سوى
نصحك وحرصك على الاهتمام به من الناحيه الدينيه فان صلح
حاله مع ربه سيصلح معك ومن خلال كتابتك واضح ان وازعه
الديني صفر ربما يحتاج الى صحبة الصالحه ومن ينتشله من
البيئه العفنه المحيطه,,
اختي العذوب لا اظن ان اختلاق حلم قد يفيدها بشي نعم
قد يزرع الخوف في قلب زوجها لكن الكذب في الحلم غير جائز
. لان الرؤيا هي رساله يرسلها الله سبحانه وتعالى
الى العبد ليبشره او ليحذره فان قال انني رايت
ورايت وهو لم يرى فقد كذب على الله قال تعالى( ومن اظلم من افترى على الله كذبا).
والرسول عليه السلام ايضا حذرنا ( من كذب في الرؤيا كلف يوم القيامه عقد شعيرتين )
بما ان الكذب المباح بين الزوجين متى ماارادا الا صلاح
فلتستغل هذه المساحه ولتخلقه له كذبة اخرى تخيفه
ربما تكون اقل ضررا من الافتراء على الله عزوجل
اتمنى لك مستقبل مشرق وحياة سعيده
انا انصحها تبتعد عنه هالفترة ولا تعطيه اي اهميه وتعيش حياتها
وتنسى انها متزوجه وتخليه يسوي الي يسوي لانه هو الي بيتحاسب
بالاخره على خياناته والزاني المحصن هذا عقوبتة عظيمة فخليه يتهنى يومين 3
بعدين هو الي بيتعذب وانتي مب مقصره عليه يعني مسويه واجبج والخطأ منه هو
وانتي طنشيه وخليه ولا شيء بحياتج عشان يعرف ويستاق لاهتمامج فيه
وبعدين يمكن يرد ويتوب وادعي له بالهدايه
؟؟؟؟؟؟؟؟؟