قولولي شو رايكم هل الموضوع يستاهل اضيع سنة كاملة من عمري .!!!

شحاكن ؟

مبروك عليكم الشهر ولو انها متأخرة

بغيت اخبركم مشكلتي ويا كلية التقنية وابغي رايكم بكل صراحة

من اول سنة دخلت فيها الكلية وانا الحمدلله متفوقة وشادة حيلي فكل المواد . طبعا انا طالبة دبلوم عالي .. فالفاونديشن كان معدلي 3.36 والحمدلله .. والسنة اللي بعدها اللي هي سنة اولى دخلت Business/IT وكانت المواد جداً سهلة وعلى نهاية السنة كان معدلي 3.33 والحمدلله .. ف سنة ثانية اللي هي السنة اللي طافت دخلت بزنس وهني بدا الجد .. على نهاية السمستر مرضت وزادت غياباتي وكل يوم اقول حالتي بتتحسن بس الله راد اني اترقد فالمستشفى لمدة 5 ايام قبل بيومين من امتحانات الفاينال فالسمستر الاول .. الكلية ما قصروا وحاولوا يساعدوني وخلوني اداوم قبل البنات بأسبوع فالسمستر الثاني عسب امتحن الامتحانات اللي طافتني .. واتخيلوا امتحنت 7 امتحانات في اربعة ايام .. وبعد نقول الحمدلله . عديت كل المواد الا مادة وحدة اللي الـ Accounting .. قلت مب مشكلة .. كملت السمستر الثاني عادي بس سجلوني فمادة الـ Accounting اللي فالسمستر الثاني على اساس اني مستمعه .. بحيث اني احظر كل الكلاسات وامتحن مع البنات بس الدرجات ما بتكون داخلة فالمعدل .. لين ما يرمسون الادارة على نهاية السمستر ويحاولون يمتحنوني Challenge للمادة اللي رسبت فيها .. لكن .. الله كتب اني امرض مرة ثانية اطيح فالمستشفى قبل امتحانات الفاينال بأسبوعين .. وتأجلت على البروجكتات وكنت اسويهم فنفس فترة امتحانات الفاينال .. امتحنت كل الامتحانات .. بس في امتحان ما قدرت اني امتحنه لأنه يا على آخر الجدول ووقتها انا كنت جد منهارة من الضغط اللي كنت فيه .. يعني تخيلوا وحدة طالعه من المستشفى ومسوية عملية .. تجابل 3 بروجكتات وبرزنتيشنين غير 5 امتحانات فاينال .. هذا كله خلال اسبوعين .. بعد قلنا الحمدلله .. بس المادة اللي ما قدرت امتحن فيها للفاينال رسبت فيها .. الحين المفروض تكون هذي آخر سنة لي وعندي انذار ومعدلي نزل بشكل فضيع ووصل 2.6 .. لكن اليوم لما كلمت السوبرفايزر قالتلي بنأخرج سنه لين ما تخلصين من المواد اللي باجية لج وعقب بندخلج التخصص اللي انتي مختارتنه … حاولت اقنعهم على اساس انهم يمتحنوني Challenge للمواد اللي لازم اعيدهم واللي هم 3 مواد بس ما طاعوا .. وانا اعرف اني قادرة امتحنهم وان شاالله بقدر انجح فيهم لو ضغطت عمري هالفترة خاصة اني صحتي تحسنت بشكل كبير والحمدلله

الحين بعد ما عرفتوا سالفتي … شو رايكم .. ؟ هالشي يستاهل اني اضيع سنة من عمري وانا متأكدة اني قادرة اخلص من هالمواد في هالفترة .. والا اتوكل على الله وارضى بالامر الواقع .. خاصة ان هالموضوع وااااااااااااايد مضايجني .. ومخلني كارهه الكلية بكبرها

انتظر رايكم .. ويا ريت لو تعرف حد مر بنفس اللي صار لي تقولي كيف تصرفت

والسموحة اذا طولت عليكم