السلام عليكم ورحمة الله وبركاته
شحالكم خواتي ؟ عساكم بخير ؟
بغيت اخبركم عن وضعي ، أنا سويت سونار تفصيلي للبيبي من أسبوع تقريبا والحمد لله طمنوني ع البيبي ، بس الدكتورة قالت ان عنق الرحم طوله 2.9 سم ، ولازم ارتاح راحة تامة وما اجهد نفسي عسب ما يقصر أكثر ، وألحين قاعدة أحاتي لاني معلمة وأدرس اطفال اعمارهم 7-8 سنوات وشغلي متعب جدا ، وطول الوقت واقفة ما ينفع ايلس فترة شغلي .
قريت ف النت ان الربط يكون حده الشهر الرابع ، وانا ألحين بداية السادس ووايد تييني الام تحت الياهل حركته كلها تحت .
خايفة من الولادة المبكرة ، وموعدي بعد أسبوعين بعيد شنو أسوي ؟
منو مرت بنفس تجربتي وكملت الحمل للتاسع .
الحمل السابق مريت بتجربة ولادة مبكرة لاني كنت حامل بتوأم بس تعبت وايد وتعب الولد معاي شهر قعد في المستشفى وألحين صحته مب اوكي كل فترة يتعب علي . عشان جذي ما ابي اكرر نفس التجربة .
واطلب منكم تدعولي الله يتمم حملي ع خير وأكمل حملي للتاسع واشوف ضناي بين يدي بصحة وعافية .
آمين ،،،
لا تخافين انا مريت فهالحاله و ربيت اول التاسع الحمدلله اهم شي ترتاحين وما تعبين نفسج
ك وضعج اذا تقدرين تقدمين اجازه قدمي وشوفي ولو رفضو حاولي ماتجهدين نفسج معاهم
الله يتمم حملج على خير
افكر اقدم اجازة ، بشوف وضعي جدام ، لان الدوام مافيه مراعاه لوضعي وما يصير ارتاح فيه ، انا ولاداتي كلهن قيصريات ، الحمل الاول انفتح الرحم 7 سم وما ولدت طبيعي ، والحمل ثاني سويت العملية ما خلوني بسبب نبض الجنين لانه كان توأم معي ، وكنت اخذ مثبتات حبوب وابر ، ما فتح معي الرحم وكنت ببداية التاسع .
هالمرة الدكتورة لما قالت لي ان عنق الرحم قصير معاي كان ودي اقول لها ان ولاداتي قيصري ومحددين لي موعد العملية من ألحين . لان بالي راح ان اللي تولد طبيعي بس يتوسع عندها عنق الرحم وانا ما ولدت طبيعي ولا مرة .
عسى خير والله يتمم حملي ع خير الحمد لله عكل حال تعبانة وايد اخذ انسولين بسبب السكر ، وعندي التهابات فظيعة ، وكنت احاتي السكر والالتهابات لانهم قالولي سبب للولادة المبكرة طلعلي شي ثاني بعد يسبب الولادة المبكرة ، يعني شبح الولادة المبكرة يلاحقني من ألحين .
ويمكن هذا تفسير احلامي اني بأول ما حملت اشوف نفسي اروح اولد واقولهم في الاحلام ان موعدي بعده !
وما كنت اعرف ان عندي السكر والالتهابات كانت مجرد احلام . بس الظاهر اني كان لازم انتبه لانها تكررت معي أكثر من مرة وانا من النوع اللي اشوف الشي قبل حدوثه .
عسى حاستي السادسة تخذلني هالمرة وما اولد مبكر ، دعواتكم كل وحدة تمر ع موضوعي اني اتمم حملي للتاسع واشوف طفلي بأتم صحة وعافية .
ولكم بالمثل .
الحمد لله عكل حال نتعب ف الحمل عسى يكون تعبنا تكفير لذنوبنا ورفعة لقدرنا ، لان الصابر يحصل أجر الصايم والقايم ، والحمد لله عكل حال ، راضية بقضاء رب العالمين ، بس ابي اخذ بالاسباب بعد التوكل وتسليم الامر لرب العالمين .
والحمد لله حمدا كثيرا طيبا مباركا فيه …،
الله يسهل عليج وتربين بالسلامة ان شاء الله
حبيبتي الله يسهل عليج ان شاءالله وتقومين بالسلامه ،،
وتولدين طبيعي وتفرحين بضناج سليم معافى
الله يسهل عليج وتكملين تسع شهور وتشوفين ضناج
الله يسهل عليج ان شاءالله وتولدين طبيعي وتقومين بالسلامه وتفرحين بضناج سليم معافى يارب ياكريم