على كثر الخطاب بس مب رايمه اتزوج

ماعرف ليش خاطري اخبركم سالفتي مع اني اعرف انه مافي حل

بنات انا عمري 28 سنه وايد اخطبوني بس كله او انا ما ارضى او امي

عني انا ما ارضى لانه امي ما تخليني اشوفهم وانا ما اقدر اتزوج واحد ما شفته ولا حتى كلمته لو كلمه وحده عالاقل اسلم عليه اشوف كيف بتقبله

وعن امي مرات احس انها معتمده عليه وما تبيني اعرس مع انها دوم تقول عرسي وانتي كله ما ترضين وكل ما حد يقولها ليش ما تعرسين بنتج تقول هي ما ترضى وانا اقول لا هي ما تخليني اشوفهم والسالفه مالها نهايه ربيعاتها وخالاتي ينصحونها بس مافي فايده

من اسبوعين تقريبا كنت في الجمعيه ويا امي انا رحت عنها قسم الشاي ادور لي شاي اخضر وطولت في هالقسم لاني كنت اقرا شو مكتوب على كل نوع وحسيت بواحد يدور مثلي المكان ما كان فيه غيري انا وهو تميت يمكن 10 دقايق وهو بعد تم ياني قالي لو سمحتي ممكن اسألج شي بس مستحي منج قلت اكيد يتحراني خبيره شاي ويبا ياخذ حق بيته نفس النوع الي انا باخذه

قلت له امر قالي انتي معرسه او مرتبطه؟ قفطت ماعرفت شو اسوي تمنيت لو ما قلت له امر قلت له لا قالي انا بصراحه ادور بنت الحلال وانتي من دخلتي حسيت ما شاء الله عليج ملفته وحاب ارتبط فيج وانا منحرج واسف اني رمستج
جرئ بصراحه وايد واحرجني قلت له انا مابا اعرس قال ليش قلت له بس الحين مابا اعرس قالي بس انا بترياج ليما تقبلين قلت له لا قال ليش انا فيني شي مب زين قلت له انا ماعرفك والله يوفقك مع بنت الحلال حسييت به تحطم وتم يلح قال لو سمحتي فكري قلت له الله يوفقك وصديت

وبعدها بكم يوم شافتني ربيعتي وقالت لي اباج حق اخوي وطرشت لي صورته وربيعتي الثانيه قد مرمستني عن 2 ربع ريلها يبون يعرسون وهي مرشحتني انا وربيعتي وحده غير بعد مرشحتني حق واحد من اهل ريلها يعني في وايد خطاب بس قلبي ما يبا ولا حد منهم يعني ماعرف كيف بتزوج بهاي الطريقه !! فهموني كيف الوحده تقدر تاخذ واحد ما تعرفه بالمره؟؟؟؟؟؟؟؟؟

مرات احس قلبي مقبوض من حد يرشحني لحد او حد يقولي اباج احس اكره الزواج ماعرف ليش ايني هالشعور مع انه يوم اكون بروحي او اشوف ربيعاتي مع عيالهن اقول انا خلاص هالمره بوافق بس من ايني حد اتغير احس بضيقه واقول لا ماعرف ليش؟؟؟