شحالكن خواتيهـ .. شخباركن … لكم وحشــــــــــــــة هالكثر ويعلم الله دعيت لبنات وحريم مدونة سيدات الإمارات يوم كنت فالحرم … لأنكن خواتيهـ وأنا ما أنسى خواتيهـ …
المهم بخبركن عن رحتلي الشاقة للعمره مثل ما سميتها بصراحه ، في 30 يونيو من الشهر المنصرم كان الساعة 1 الظهر موعد الإنطلاق للمملكة العربية السعودية … رحت المدرسة حضرت ورديت البيت من رديت البيت تميت طايحه مب قادرة ارتب أغراضي وجسمي يعورني وأصيح ….
اتصلت أميه تقول شوبلاج أقولها ضايقة تعبانه وأصيح من دون ماتسمعني … عبالها من الربو والسعال وأنا كنت بموت من الخوف ماعرف من شو …
المهم ياني ريلي وقال شو بلاج قلتله جي وجي قال توكلي على الله ( هم مايبونج تسيرين العمره ) ولو ماتبين خلاص بنهون قلتله لا بسير … شغلت سورة البقرة في تلفوني وتميت احس بلوعه ومدوخه واصيح ….
تعرفن لدرجة ما كنت أقدر أوقف على ريولي … بس كل شي في سبيل الله يهون ^^ … ركبنا السيارة انطلقنا وبديت اصيح ومب طايقة ريلي ولا عيالي مول الا اضرب البنات من العصبية واقول للخدامه خوزيهن عني مابا اشوفكم … ريلي يقول شو بلاج استهدي بالله …
والله اني كنت مخنوقة حطيت سورة البقرة في أذوني ودموعي تسبقني … المهم … كنت أتمنى يكون الموضوع بس يوقف عند الضيقة الخمول الزعل بس … فلرويس تعطلت سيارة ابويه ( سايرين 5 عوايل ) المهم شيكو عليها وقالوا عادي مب شي جايد من طلعنا من حدود البلاد تمت سيارة ابويه ادخن دخانه سودا … ولا يقدر يسوق اكثر من 120 تخيلو على خط السعودية والأيل يجب ويدخن … والمكيف اخترب … وحالتهم حالة مساكين وكل مانوقف عند شيشة مايسوون لنا شي غير يزيدون الايل …
الساعه 3 فليل قبل الخرج رقد اخويه وجدامه تريله وفي اللحظة الاخيرة حرمته نبهته … وتم ابويه ينود وريلي كنا ورى الوالد عسب لو صار شي نكون قراب منه قالي عمي بيرقد عن السيارة … قرروا ياخذون استراحه .. المهم الله لا يراويكن الجو زفتتتتتتتت تراب تراب يتطاير فالخرج وانا عندي الربو مثل ماتعرفون …ومارقدت كان اللحاف كله تراب وجبدي لايعه …
قمنا الصبح وانطلقنا نستكمل المسير وكل شيشة يوقفون وتأخرنا وايد وااااااااااايد المهم الظهر الساعه 2 كنا نحن آخر القافلة لأن ريلي مايحب يتجدم على عمه ورب العالمين ستر من عنده نقع تاير موترنا وسيطر ريلي ع الموضوع وطلعنا برى الشارع ع الرمل هنيه انا انفجرت اصيح عيالي وريلي وخداماتي كان ممكن شي يصيرلنا يارب وتذكرت رمسة المطوع قال لا تروحين مابيخلونج في حالج …
بدلو التاير وركب ريلي قل : شوهذي السيرة مب مترقعين وزادني عاد .. امبوني ما أقهر وعلادقة بصيح … بس تميت استغفر وقلتله قول الحمدالله كان ممكن يصير شي أسوأ …
المهم سرنا وصلنا وبختصر الموضوع للحدث المهم … يوم رحنا المدينة أم ريلي المصون سوتلي مشكلة وانا وايد كنت تعبانه وصار بيني وبين ريلي تتش فتميت اصيح من القهر رحت اصلي العصر ويوم أنا أصلي تميت أدعي وعيوني تدمع صدق كنت حاسه بالظلم وبالقهر وتيت احس جسمي يتحرك حركات لا ارادية تميت استغفر واستغفر وقمت وظهرت من الحرم وسايرة الفندق حسيت ايدي اليمين وايد تعورني موت احس العروق اللي فيها بيتفجروون …
ماكان عندي حد اقوله ونفسيتي ماتسمح ارمس مع حد … ثاني يوم رقدنا عن صلاة الفجر من التعب الله لا يراويكم المهم رحت مع الوالدة وعديلتها الروضة عشان نسلم على الرسول .. علية أفضل الصلاة والسلام … وهناك تمت امي تشربني زمزم وانا احس بزوع ما ابى اشربه اقولها مب حلو … وايدي كانت تعورني قلت لاميه قامت تغسل ايدي بزمزم الله يطول بعمرها … ورحنا وحطين اغراضنا وتوجهنا لدار بو خليفة الله يرحمه … العصر وقفنا عشان نتغدى كانت الوالده تعبانه وتقول مابى شي بس تعبانه ..
الا شوي نشوف الوالد واقف برى الشارع والبنات يتصايحون وحالة وقف ريلي الا يقولوه عمتك طاحت مغمي عليها مانعرفها ميته ولا حيه … والله يا بنات تميت اصيح واصيح قلبي حسيته يتفطر ركبها اخويه عنده ومثل الميانين ندور مستشفى في مقطعه حشى السعودية بالبر تخوف … لقو سيارة شرطة ودلوهم على مستشفى في منطقة اسمها تمير … هذي المنطقة وسط يبال وبعييييييييييييييييييييييد طول الوقت انا متخيلة انها ماتت واتذكر صوتها فالحرم يوم صلينا الصبح تقول يارب تشفيني … كنت اصيح وريلي من صياحي شوي وبيصيح يقول ظني بالله خير اقوله مستحيل امايه تموت عني …
وصلت العيادة بكيت من شفتها كانت توصيني على خواتيه وعلى عيالي … قالت يا فلانه ماوصيج ع البيت من عقبي وسامحوني اقولكم انا خلاص الدموع هذيج الساعه تجمدت .. وشوي الا انفجرت وانا احضن اختيه بغيت اموت ماطاعو يخلوني عندها ظهروني عقب عزار حيله … …
والله الأم شي عظيــــــــــــــــــــــــــم ونعمه لا تعوض بثمن يوم خوزوا عنها ملابسها عشان تخطيط القلب شفت بطنها قمت ابوسه قلتلها اميه لا عدمتج تذكرت قلت يابتنا من هالبطن وتعبت وسهرت شفت صدرها قمت ابوسه … قلت مستحيل تروح فجأة .. لا خلاني الرب منج يميهــ …
اللي عور قلبي يوم كانت تعبانه قالت روحوا كلكم أبا حبيبتي نعلرفون منو تقصد ؟!!!
عديلتها
هنيه حسيت بأن العلاقات الانسانية أساسها الحب والوقفات … تمن يصيحن الله لا فرق بينهن ….
ووصلنــــــــــــــــــــــا للبلاد عقب تعب ومعاناة ولله الحمـــــــــــــــــــــــــــــد وأهم شي أنا اعتمرنا ووصلنا بخير …
السموحه على الإطالــــــــــــــــــــــــة
عمرة مقبولة ان شاء الله
والحمدلله ع سلامة الجميع
وطمنينا ع الوالدة وبوسيها
الوالدة شي رائع ووجودها نعمة عظيمة
الله يخلي امهاتنا ويرحم الامهات اللي توفن
الحمدلله على سلامتكم وعمره خير ان شاء الله يارب
عمرة مقبولة ان شاء الله
والحمدلله ع سلامة الجميع
الحمدالله على كل حال ،، شو حال الوالدة الحين ان شاء الله بخير
ربي ايخليكم لبعض يارب ولا يحرمكم من شوفتها
تقبل الله منكـم صالح الاعمااال ..,,
والحمـدالله ع السلاامه ..
وطمنيناآ على امج ..؟!
الله يشفيج الغاليه ويشفي اهلج كلهم
شكلكم كلكم محسودين والله اعلم اقرو كلكم سورة البقره يوميا
عمره مقبولة .. و الحمدلله انكم وصلتوا البلاد بالسلامة و طمنينا على الوالدة ..