هلا خواتي انا قبل كم يوم كتبت عن امي اللي مريضه ومشكورين وايد لدعواتكم لها ، والله يا خواتي عندي هم ثاني يعني فوق هم الوالده وتعبها ، عندي ها الناس في حياتي منغصين عليه عيشتي انا واختي ،والله العظيم عايشين في عذاب والسبب ضعف شخصيتنا انا واختي.
انا كتبت قبل عن ها الموضوع من زمان بس برد اكتب عنه لان لين الحين اعاني منه،
القصه ان في بنتين وهم بنات يرانا يعني كيف اوصفهم في قمه الوقاحه والتكبر ومعتمدين علينا تقريبا في كل شي كانا خدام عندهم رغم ان والله ان نحنا ما نحتاج منهم شي وعايشين في خير الحمدالله بالعكس هم اللي في حاجتنا بس فوق كل هذا ما اقدر ارد عليهم مادري ليش
يعني والله شو ها العيشه نسوي بروجكتاتهم مال الجامعه ويبون البشكاره مالتنا تطبخ لهم ، ويقولون بكل وقاحه يوم بتسون اكل سولنا وياكم مب اتسون شوي نحنا وايد فالبيت ومب لازم تتريون ناخذ لكم اغراض الاكل انتوا سو من اغراضكم وانا للاسف ما عندي لسان ارد والله كارهه عمري لان ما عندي شخصيه ويجبرونا نطلع وياهم كل مكان حتى لو انا مالي خاطر اطلع وياخذون سيارتنا في معظم مشاويرهم ،ولازم غصبا عني لازم اطلع والله احسن اني عبده عندهم بس خلاص تعبت ، امي في صوب وهاذيلا اللي الله يفكني من شرهم ما اعرف شو اسوي والله
تخيلوا البارحه طلعت انا واختي ويا ربيعاتي من الجامعه اللي من شهور ما شفتهم والله استانسنا وياد وياهم ناس في قمة الادب والاخلاق والاحترام بس طبعا اتصلت بنت يرانا وخربت وناستي كاالعاده اونه اتقول متى بتردون وليش جي طولتوا وياهم يالله ردوا انا يالسه ملانه قلتاها لو سمحتي ممكن تعطينا اجازه اليوم منكم قالت شو انتوا بشاكير تبون اجازه قلت لها شكلنا جي عقب طرشتلي مسج قالت انا ترى كنت اتمصخر وياج لا تاخذين في خاطرج قلت لها لا عادي ما زعلت .
ادعولي الله يخليكم والله بموت من القهر والله يوم اتخيل حياتي من دونهم اقول يالله كيف حلوه الحياه من غيرهم بس للاسف ادري ان هذا كله مني واني انا الغلطانه بس انا مقهوره من نفسي والله افكر اسير عند دكتور نفسي يعالج ها الضعف اللي فيني
سامحوني طولت عليكم بس ابا اطلع القهر اللي فيني
اختي انتو مب مجبورين فيهم هذيلا مب اهلكم
عودي نفسج على كلمة ( لا ).. وعلى فكره اول مره بتقولينها بتكون اصعب مره
وخلاص بعدين مع الوقت بتتعودين ..كل شي فها الحياه يباله وقت
انتي شكلج تتلومين فيهم وتحسين بتانيب الضمير اذا قلتيلهم لا او حاولتي تتحججين
انا اقولج فهمي نفسج عسب ضميرج يرتاح ان كلمة لا مب حرام ولا عيب انه انقولها
اتمنى انج فعلا تتغيرين انتي واختج وحاولو كل وحده اتشجع الثانيه
وربي يحفظ امكم ويخليها لكم
اسمحيلي موضوعك غريب !!!!!!!!!!
شوفي حبيبتي انتو سمحتو لهم يتحكمون فيكم هايل مب من اهلكم وحتى لو كانو اهلكم مستحيل اخليهم يتحكمون فيني جي
لازم اتصيرين قوية واتردين عليهم .. ومب مجبورين اتسوون لهم شي
صح الله والرسول عليه الصلاة والسلام وصونا باليار بس اسمحيلي هايل تعدو حدود اليار
والله مب مجبورين تطبخون لهم لا وبعد من راشنكم شو وين عايشين !! ليش هم ما يطبخون روحهم!!
بعد يستخدمون سيارتكم !! بصراحه حبيبتي انتو الي سمحتو لهم يتحكمون فيكم
اتكلمي ردي عليهم قوي شخصيتج لا تسكتين والله عقب يستغلوكم في كل شي
احس روحي مقهوره والله
عزيزتي اعطي اليار حقه يعني زوروهم اسألو عنهم بين فتره و فتره اعطوهم شي من الاكل الي تسوه
عندكم مناسبه اعزميهم افرحي لهم واحزني لهم بس لا تسمحين لهم يتحكمون فيج وفي اختج
انتي و اختج شكلكم وايد طيبين وعلى نياتكم وايد وعلى بالكم الناس كلها مثلكم الطيب ما يعيش لازم اتقون شخصيتكم
هم ما يحترموكم و يكلموكم بوقاحه ومتحكمين فيكم ليش ساكتين لهم !!!!!!!! حبيبتي ردي عليهم لا تسكتين
انتي واختج الغلطانات .. انتو سمحتولهم يستقوون عليكم
يوم يتصلوون لا ترديين عليهم واذا قالولكم تعالو لا تروحين .. ما اظن يسحبوونكم بالغصب
وسالفه الاكل مصاخه صراحه .. لا تسون وقولو نحن ماطبخنا حق اعمارنااا
لاتعطونهم ويه
سلامتك من القهر ياحياتي العلاقات بين الناس لازم يكون فيها خطوط حمراء ومساحة خاصة
حتى بين الأهل والزوجين لازم تكون فيه مساحة خاصة وخطوط وان كانت اقل
الي انت وأختك تعانون منه هذا يعتبر دور سلبي جداً
سلمتوا نفسكم للغير يتصرفون مثل مايحبون وهذا الشي ترا مو مرض هو طريقه
واسلوب في التعامل يفقدك مع الوقت الثقة بالنفس والقدرة على اتخاذ قرارات
وبتلاقين في حياتك مصاعب بسبب هالشي والحل عندك وبيدك
غيري غيري من طريقتك وعبري عن رايك بكل ذوق واحترام
تعودي على كلمة لا باستمرار لكل شي ترفضينه
انت مو ضعيفة ولكن استضعفتي نفسك بالخضوع
تذكري ان جيرانكم مثلهم كثير في المجتمع وبتصادفينهم في الدراسة في العمل في الزواج
وافضل شي انك تحطين حدود وماتسمحين بتدخلات اكثر عن الازم معهم
الله المستعان