السلام عليكم ورحمة الله وبركاته
شحااالكم 
؟؟
ان شاء الله عقب اسبوع بسافر لبنان
وعندي بنوته عمرها شهرين ونص !!
صاحبات الخبره .. شو اشل ويايه
وكيف ارقدها في الطياره .. ؟؟ وهل بتصيييييح يوم الضغط الجوي 
انا وايد احااااتي
هاي سالفه صعبه بصراحه … انا بعد افكر كيف بشل ولدي ويايه يوم بسافر و بيكون 5 شهور تقريبا ..
ان شاء الله اصحاب الخبره يفيدونا
شوفي اختي اول شي تروحين عند طبيب الاطفال خبريه بموعد السفر
وخليه يعطيج الاحتياطات من ادوية تخفف الضغط على الأذون و
الادوية الثانية
دوا للحمه "بسم الله عليها"
ودوا للاسهال والترجيع والغازات الله يحفظها ..
بس احسلج تاخذينهم من البلاد عشان ما تبتلشين هناك
وبخصوص السفر بالطيارة عادة يسبب الضغط الام لليهال فيصيحون
بس نصيحة وأنا مجربتنها مع بنتي فديتها لما كان عمرها 4 شهور وايد اوكيه …
وهي انج ترضعينها بالمرضعة عصير او شاي اطفال او حليب اهم شي انها تبلع ريجها وقت
اقلاع وهبوط الطايرة عشان يخف الضغط
على اذونها … اتمنى اني افدتج وسفرة موفقة ان شاء الله
هاي كانت معاناتي مع بنتي يوم سافرنا
كان عمرها هذاك الوقت 5 شهور
بس الحمد الله ما تعبت وياها كثر ماكنت احاتيها…
اختي اول شي توكلي على الله …
ثاني شي خلي رضعة الحليب في الطيارة بحيث يوم تقلع الطيارة ما تحس بشي …
بس تعرفين اختي انا شو سويت عطيتها يوم كنا يالسين في اللونج ( ماي غريب) هدأ اعصابها و خلاها ترقد طول الرحلة ما شاء الله …..
لا تحاتين يا اختي
بالتوفيق
خذي وياج اكياس المراضع عشان ماتيلسين تغسلين المرضعة
يعني بس عليج تعقين الكيس وتحطين غيرة وتسوين الحليب
وتسيرون وتردون بالسلامة
أنا كنت اسافر وعيالي عمرهم شهرين,أهم شي .. يوم تطير الطياره أو تحل تعطينها شي تمصه.. المصاصه ولا المرضعه او حتى صدرج اذا كنت ترضعينها<<<بس احسها صعبه شوي .. بس لازم تخلينها تمص شي هذي نصيحه دكتورتي علشان اذنها ما تنسد وماتعورها ..
بالنسبه للأشياء الثانيه .. خذي ترمس الاستيل وحطي فيه ماي مغلي طبعا ..
والمراضع من البيت يكونن مغسولات ومعقمات ونظاف حطي في اللي بتستخدمينهم ماي مغلي نص الكميه اللي تستهلكها البنت سواء في شرب الحليب ولا شاي الاطفال.. يعني اذا كل مره تسوين لها 200مل,صبي في المراضع 100 مل, قولي ليش؟ ليششش << انا قلت بدالج
علشان يوم بتسوين لها حليب ولا شاي في الطياره يكون هذا الماي اللي صبيتيه في المرضعه برد ويوم تصبين عليه الماي المغلي من الترمس بيكون دافي وحرارته زينه ما تحتاجين تبردين الماي الحار وتتلعوزين.. فهمتي؟
عموما لبنان جريبه وإن شاء الله البنت ما بتلعوزج وممكن أنها ترقد طول الرحله اذا كانت واعيه قبلها بفتره طويله, وطبعا شلي وياج خمس او ست حبات بامبرز وكم كيس بلاستك عسب تعقين البامبرز فيهن,وكم قطع غيار للبنت بس لاتكثرين علشان ما تستوي زحمه في الشنطه اللي بتشلينها..وشلي بعد كلينكس للجيب لانه الطياره فيها نقص في الكلينكس اذا بتمشين بوزها ولا تنظفينها.. وشلي كلينكس معطر للأطفال طبعا.. وبالنسبه لرقادها في الطياره بيحطون لها سرير خاص بس لازم تكون كراسيكم في اول الكراسي..واي سؤال آخر أنا حااضره
انا يوم حجزت طلبت السرير يعني اول كرسي و جدامنا السرير ^_^
وحق الطياره بشل لها بدله و افرول كامل مال النوم عشان ساعات تكون الطياره بارده و قبل ما ننزل بلبسها بدله خخخ
وعن الحليب شلي 4 مراضع 2 للمطارات و 2 للطياره عشان ما اقدر اغسلهن يوم بوصل الفندق بغسلهن
عن تعقيم المراضع يبيعون في بيبي شوب سائل تعقيم .. اول شي تغسلين المغسله و تترسينها ماي شوي و تصبين السائل المعقم و تخلينه 5 دقايق و تردين تغسلينهم شوي
ها بديل للغلي
وتعرفين الباجي البنات ما قصرو بعد ^_^