بدون مقدمات من كثر مايلست ف البيت ومليت من انتظار الوظيفه يخرب بيتهم معاي ماستر ومقدمه ف اكثر من مجال ورضيت باقل الوظايف وكله على فشوش السالفه يابنات سالفه واسطه وبس ..
المهم وحده من ربيعاتي قالت لي شو رايج تقدمين ع الشرطه النسائيه ف البدايه ما اخفيكم ضحكت لان ماشوف نفسي بالوظيفه هاي بس بعد مده يلست افكر وافكر .. قلت شو بلاها الشرطه النسائيه وايد هيبه ويكفي اي حد يغثني بزخه <<< اضحك معاكم
بس جد شو بلاها هالوظيفه .. ادري البعض عنده تحفظات عليها بس ابيكم تشاركوني رايكم
في حد قدم عليها ناس قريبه منكم مشتغلين بالوظيفه شوو انطباعهم
وكيف التقديم ،، ماحب تقولون اون لاين لان سالفه الوظايف كلها اون لاين مب داشه راسي احس بس يخرطون علينا ابا اقابل ناس واعطيهم اوراقي بيدي واعرف اراجع منو .
تكفون تفاعلوا معاي ابا نصايحكم ..
التوفيق لج
والله يااختي العمل كله زين وطيب اختي… والشرطه عمل راقي على الأقل اسمه تخدمين البلاد ويحتاج شجاعة وله وقع على النفس … يعني كلمة شرطيه بتخلي بنات المنتدى يقولن
انضباط سر .. هههههههه
والشرطه اختي تحتاج تعليم كثير منهم يشتغلون داخل الشرطه بوظايف مكتبيه واقسام تكنولوجيا واداره ومستشريات وغيره …
انتي قدمي وشوفي شو الموجود .. وتدربي على الأقل تجربه .. اذا تحبين كمليها او تقاعدي وخلاص …..
بس تاكدي من شروطهم .. وانتي دارسه وعندك ماستر … الحمدلله … يعني عندك مزايا …
المهم اختي العمل رزق ماله خص بشي ثاني … في ناس عندهم اكثر من خمس شهادات بس مايحصلون عمل .. وفي انسان ماعنده الا ابتدائي ورجل اعمال ناجح!
عقليات …
وللعلم الاطلاع الحين الناس تضحك على حامل الشهاده .. ويقولون مامنه فايده … حتى بعض الجامعات في بلاد برع تطلب خبره
للطالب حتى في البكالوريوس ! عشان مايقضي اربع سنين من حياته وبعدين يطلع فرد غير منتج!
سوال..انتي كويتية؟
اذا لا..عيل ليش هاي اللهجة؟ "تكفون تفاعلوا معاي ابا نصايحكم" "ابيكم تشاركوني رايكم"
سوري طلعت عن الموظوع بس لفتتني لهجتج.
نرجع للموظوع. الشرطة النسائية مافيها شي بالعكس..شي جميل والحين وايد بنات قامن يدشن هالمجال خاصة بعد فتح المجال للبنات بدخول الخدمة الوطنية اللي هي اختيارية للبنات بس ماشا الله اجوف وايد بنات مقبلين عليها. بالتوفيق.
توكلي ع الله
ع الاقل عندج ماستر و رتبة عسكرية و الكل بيضرب لج سلام و بيحترمج
موفقة حبيبتي
بالعكس خدمة للوطن و حفظ الامن والامان من اسمى الوظايف ف نظري