دردشة المتزوجات و المقبلات ع الزواج عطور دخون دهن عود مخمرية .الخ

بما ان الريحة الحلوة مهمة جدا للعرايس
فتحت هذا الموضوع عسب نرمس عن افضل انواع

الدخون+ العطور الفرنسية + العطور العربية + دهن العود+ المخمرية + اطقم اللوشنات ..الخ

بليز خواتي الموضوع ما يظهر عن مساره اي وحدة تحدر
ترمس شو الاشياء اللي جربتهم و عيبتها و تنصح فيها الثانيات ؟؟؟؟

أنا عن نفسي ريلي مول ما يحب العطور العربيه استخدم العطورات الفرنسيه و الكريمات وبس.
وحبيت اقول للعرايس لاتشترون وايد كريمات لانها بتخترب اذا تمت فتره طويله.

بحطلكم صور للعطور و الكريمات اللي حبيتها

اول شي حبيت وااااايد هالعطر ريحته حلوه. اسمه viva من اريج. سعره 600 درهم. في وياه لوشن بعد

مكياجي بعد عندهم أطقم عطور ريحتهم حلوه. أنا خذت طقم احمر ماعرف شو اسمه
فيه عطر صغير مركز. ومثل الريحه عطر كريم. ولوشن. و بودره فيها لمعه. كلهم بنفس الريحه. هذي صورته البكس اللي عاليمين. سعره تقريبا 300

حبيت هالمجموعه بعد ricci

دهن العود:
احب دهن العود الكمبودي الاصلي (قديم)
دهن العود الهندي الاصلي
دهن العود السيوفي

عطور
sacifice << من اجمل ويديد
اورم << من اجمل ويديد
المسك
العروسة
اقنور << يمدحونه ووحدة من اهلي قالتلي اهية حطت في فترة الملجة وريلها تخبل وقالت ان كل الرياييل يتخبلون على هالريحة وانا جربت صدق عيبني <<من اريج
جمرة << ماشي غير في محل المروج اللي فالعين
سلطان<< الريحة هادية حلوة
رغبة << مثل ريحة دهن العود بس اخف
جولدن << تقريبا نفس ريحة الرغبة

الدخون
دخون ملبس << من عند الحرمة
دخون لوتا << من اجمل
دخون سلطان << من عند الحرمة
دخون ملبس << روووعة من عند الحرمة
والبقية مااعرف الاسامي لاني اشتري من عند الحريم

و الدخون / آحب دخوون يآس .. و أنفاسك دخون

لكن لا تنسون ان الروايح القويه هب حلوه في الصيف ،،،،

بالنسبه للدخون أغلب دخوني محلي ( يعني من البيت )
العود شي لابد منه ( والتغيير حلو ) بين العود الناشف والعود المعطر

بالنسبه للعطور :

– دهن العود في الدرجه الأولى
– العطور الفرنسيه ( نقي وأختاري من كثرهم ما شاء الله )