حياتي بعد الإنجاب والطلاق

خواتي أنا بعرض عليكم مشكلتي بشكل عام
قبل لا اتزوج وانفصل ويصير عندي طفل
كانت حياتي مفعمة بالنشاط ، انا انسانة متعددة الهوايات ولله الحمد
وصارت لي انجازات كبيرة ، فوق ما اني اشتغل واكمل دراستي كنت اتطوع واجابل هواياتي
وطبعي هادية وخجولة جداً

لكن للاسف ما مداني اعرس الا عقب كم شهر انفصلت وعرفت اني حامل
ووقع علي الطلاق (للضرر) بدون ذكر الاسباب والدخول فالتفاصيل ،، انا اللي كنت طالبه عن طريق المحكمه .. والطلاق وقع بعد ما ربيت

انكسرت فيني وايد أشياء
اول شي شخصيتي الهادية اللي استغلوها
صرت اقوى عن قبل وما اسكت ، مب يعني لساني طول .. لا
اقصد صرت اطالب بحقي وحق طفلي واي حد يتعرض لنا لو منو ما كان ما اسكت
مب قبل كله هادية وارضى بالواقع
طلعت من دوامي لأسباب ، اي وحده غيري كانت بتسوي نفسي
وفضيت لطفلي .. اهملت هواياتي
انا كنت جدا انسانه سعيده بعد ما انفصلت، لكن الوردة لما تذبل ما ترجع مثل قبل !
قويت علاقتي بربي ولله الحمد ،
بعد كم سنه رديت تدريجياً لهواياتي ، بدون ما يأثر على طفلي او يحس اني اهملته
لكن تييني فترة برود وضيج وكآبه ما اقدر اطلع منها

الكل يقول لي لو نحن عندنا نص مواهبج جان نحن عندنا خير .. بس والله في شي يمنعني
في وساوس وكآبة دوامه كبيره داخله فيها مب عارفة اطلع منها
الحمدلله اصلي واذكر ربي دوم واقرا القرآن ، وهذا شي مخفف عني وايد

ابسط حقوقي ك مطلقة اني اخذ من الشؤون واطلب لي بيت ما سويته للحين
والسبب الطلبات التعجيزية والاوراق اللي لازم اراكض عشانها
ادري اللي يبي يسوي شي لازم يسعى والله بيكون وياه
كنت شعله من النشاط وانقلبت الى شعله من البروود !

يا كثر اللي يكلموني ردي لنا فلانة اللي نعرفها
من انسانه انيقة ومهتمه بنفسها إلى انسانه زاهدة واجوف الدنيا بأنها فانية وما يسوى ان نعيشها
تييني مرات اتخيل نفسي اني بموت وما بجوف ولدي يكبر
صرت اخاف اتم ف غرفتي بروحي فالليل
ما ييني نوم للصبح
حاليا صار لي فترة اشتغل ، يوم اداوم وعشرة متكاسله
وقبل كان ينظرب لي المثل في الشغل والجهود والاشيا اللي كنت انجزها بدون ما يطلبون مني
غير هذا اني اداوم عالوقت
من انسانه نظامية تحولت لانسانه فاشله ..

فكرت الف مره افتح لي بزنس يتعلق بهواياتي
تييني فرص ع طبق من ذهب
اتحمس اتحمس ووقت الجد ثللللج وكأن شيئاً لم يكن

تييني شهور ما عندي انا وولدي درهم ، اقول ياليت ويا ليت سويت
مرات اتم اصيح ان غيري مب لاقي وظيفه وانا عندي وظيفه ومب حامده النعمة

لله الحمد مكتفيه بمصروف طفلي من المحكمه واللي ما يتعدى مبلغ .. جداً جداً بسيط
لكن يسده احتياجاته ،،

اجوف غيري عنده حسابات توفير لمستقبل عيالهم وانا مب قادرة اوفر لولدي قبل نفسي
اقصر عن نفسي وااايد المهم ولدي ما ينقصه شي

الحمدلله مش اتكاليه وما اخذ من الناس ، حتى والديني، انا استحي اطلب
اكفتي باللي عندي واحمد ربي واشكره لو يتني فترة احتاااج ابيع اي شي عندي لو بسعر زهيد المهم ان ما اطلب من حد

قلت بكمل دراستي ، متكاسله اروح اقرب كلية حكومية اقدم فيها
في شي ف داخلي غرقانه فيه ومب قادرة اطلع منه

ما اعرف شو اسوي عشان ما تييني نوبة البرود ، ابي ارجع مثل قبل مب لازم شعله من النشاط المهم ارجع لو شوي مثل قبل

انتي لو ما ساعدتي روحج محد بيساعدج

اثبتي و جودج بالدوام و عن دخل ولدج لو ما يكفي لازم يزيد يا عن المحكمه او انتي تكلمين ابوه

قوي شخصيتج بدون ما تتعدين عحد 2

قعدي شوي مع نفسج عرفي انتي شو تبي بالضبط
الحزن والتراجع والاهمال وتراجع العزيمه منج انتي ليش مب عارفه شو تبي بالضبط
خلج شو كنتي قبل ووين صرتي لا تحطي المقارنه لان المقارنه هي اللي تكسرج
طبيعي بيتغير كل شي فيج لانج اللحين مسووله عن روح بين ايدينج ،،، وكل اهتمامج انه ما ينقصه شي واهتمامج كيف احميه لا ينإذي
ربما احباطاتج في العمل بسبب تفكيرج انج بتقللي اهتمامج للطفل تخافين تنشغلي عنه او الشغل ياخذ وقت وجهد ويبعدج عنه
انا احط احتمالات باللي انتي تمرين فيه لو انتي فويهي يمكن نفهم السبب بسرعه
صعب المشاعر والاماني تنفهم بالكتابه وصعب ندرس حالتج وانتي مب عارفه شو فيج

تعرفي انتي بالضبط مب عارفه شو فييج ولا شو هي المشكله اللي انتي فيها واللي وصلج لهالمرحله

اذا انتي مستغربه من كيف كنت ووين صرت انا اقول هالشي طبيعي لين سنتين
تجربه الطلاق يمكن حزنانه لانها كانت شهور ومحد يعلم غير رب العالمين اللي كنتي تعانيه فطبيعي الصدمه تمر سنه خلاف ترجع قوتج واقوى مما تتخيلي
عطي نفسج وقت للراحه
صدقيني باجر بتبدي شغل او مشروع بدون برود الثلج او اللامبالاه لانج عطيتي جسمج حقه

عزيزتي حطي فبالج ان الناجح معرض دائما للحسد

حاولي ما تمكنين الحساد من تحقيق اهدافهم ان يشوفونج فاشله

عش لدنياك كأنك تعيش ابدا و عش لاخرتك كأنك تموت غدا

انظري دائما لنصف الكوب الممتلئ لا تفكري في النصف الفارغ و فقط

تفاءلو بالخير تجدوه

لا تقولين ما بفشل قولي سأنجح
لا تقولين ما بكون كسوله قولي سأصبح نشيطه

شوفي الاشياء اللي تحبينها و افعليها
اشغال يدويه ارسمي اقري اشتركي في نادي

شيكي فيتامين د وفيتامين B12