السلام عليكم ورحمة الله وبركاته
اليوم عندي مشكلة وحابه استشيركم في الحل
مااقدر اقول مشكلة بس هالشيء مسببلي ضغط
مشكلتي هي عايلتنا
عايلتنا عايله متمسكة بالعادات والتقاليد بشكل مبالغ فيه
يعني البنات عيب يدرسون عيب يسوقون.. ولا وحده من خواتي دارسه والبنت مالها حق تختار زوجها حتى كل شي في ايد الوالد الله يهديه ..
بس أنا الحمدلله أمي شخصيتها قويه وفرضت على أبوي أني أكمل وأخذ الليسن بعد ومب بس جي حذرت أبوي من أنه يفكر يزوجني على كيفه لانه كمن مره استقبل ناس واتفق معاهم بدون علمنا ..
والحمدلله هالفترة أبوي اتغير أشوي واقتنع وأصلن أبوي جدام أمي ماله شور لأنه دوم تهدده اذا رفض أني ادرس او جبرني على أي شي بتروح بتشتكي عليه ..
للعلم أمي مطلقة عن أبوي من يوم عمري تقريبا 4 سنوات أو أقل
بس المشكلة وين ؟؟
ع الطالعه والنازلة خواتي يعقن علي نغزات مثل : واذا درستي شو بتصيرين يعني دكتورة ؟
اذا كنا في عزيمة يقولون وصلت الدكتورة وصلت المديرة وطبعا كله بمصخره واستهزاء …
الشيء الثاني : لما تصير مشكلة بينهم وبين أبوي يقولون اشمعنى فلانه خليتها تدرس وخليتها تاخذ ليسن واذا حد خطبها تشاورها وتسمع رايها ونحن حرمتنا من ابسط حقوقنا والي يصير أنه أبوي يجلب علي ويتم فترة يسوي مشاكل وهالمشاكل اتعبني نفسياً بس الحمدلله أني اطنش واترد الأمور طبيعي وأحسن عن قبل …
للعلم امهم غير عن أمي وأمهم عكس شخصية أمي تماما مادافعت عن بناتها ولا وقفت وياهن ابد
ولما أبوي جبرهن يعرسن محد قدر ينطق
المشكلة الثالثه الأهم والي صارت من كم يوم
الله يسلمكم أنا مرابعة أجنبيات تبون الصدق أنا أغلب ربعي اجنبيات في منهن قدي وفي منهن أكبر عني
وأغلب الأوقات أطلع معاهن
المشكلة ياطويلات العمر أنهن مش محجبات
الي صارر أنه بالصدفه وأنا كنت في تشيليز مع وحده من ربيعاتي هي أجنبية بس ترمس عربي أحسن عني ههههههههههههه
أختي كانت ماره وشافتني وعرفتها ع البنت وقلتلها أيلسي معانا بس هي اشرت ع ربيعاتها هم بعد كانو في تشيليز هاك الوقت قالت يتريوني طبعا هالاخت الله يهديها معرسه وعندها عيال ..
وراحت عقبها وماخلت حد وماخبرته وقالتله فلانه ترابع أجنبيات والبنت بتصيع وتيلس مع بنات عريانات
هن صح مش محبجات بس لبسهم محترم مب قصير ولا فاضح أغلب لبسهن أكمام طويلة وبناطلين وهي الي شافتها بس وحده سوتهن قروب وبنات وكلام الله يهديها ماله معنى وياريت بس جي يلست تشيش ابوي وتقوله الجامعة تخرب البنات وكل بنات الجامعة يشردن ويسون بلاوي
طبعا أبويه يالنا البيت وقام يفاتن ويقول لأمي بتخربين البنت وبتصيعينها ومب لازم تدرس وتم يفاتن وعقب روح
المهم عقبها أخوي الكبير دقلي وقالي أنتبهي لتصرفاتج ولاتيلسين تصيعين ترى وراج ريايل
طبعا أنا راددت قلتله شوف بناتك وعيالك وعقب انصح وبندت في ويهه وتم يدق مارديت ودق لأمي وقال أدبي بنتج طبعا أمي قالت له مالك شي عدنا وقالتله اذا تعرضت الها بشتكي عليك بمركز الشرطة وتمت تفاتن عليه وبندت اخر شي في ويهه … ( أحسن يستاهل )
المهم هالشيء قاهرني ومضاايقني ومب عارفة اتصرف
تبون الصدق أفكاري متلخبطة ومااعرف شو اسوي مع هالأهل ..
استخدمت مبدء التطنيش بس تعبت وايد يعني لين متى بطنش كل كمن اسبوع لازم تستوي مشكلة يديده ولازم ابوي ايي ويفاتن وامي حليلها ادافع عني قد ماتقدر بس بعد لين متى بنتم جي ؟
طبعا غلط ان ابوج يمنع البنات من الدراسه لو الشغل بنمشيها لكن الدراسه جدا مهمه وعادة ان الاهل يمنعون بنتهم من الدراسه هاي انقرضت من زمان من البلاد انا استغربت يوم شفت مشكلتج قلت في خاطري معقوله في اهل لين الحين يفكرون بهالطريقه؟ الناس تفكيرها تغير والدراسه مب بس علشان تحصلين على وظيفة وتشتغلين بس لازم يكون عندج شهادة ومستوى تعليم جيد تفتخرين فيه وبالنسبه لكلام خواتج هن ينغزنج بهالكلام علشان تنحبطين ولانه هن ما قدرن يدرسن فيشوفونج الحين انتي اعلى منهن فاكيد بيكون في غيرة لا تهتمين لكلامهن ولا تخلين كلامهن يأثر عليج علشان نفسيتج ما تتأثر وفي نفس الوقت انتي الحين فجأه طلعتي من حياة متشددة الى حياة فيها حريه اكثر فتبين تسوين كل شي في خاطرج بس هذا مش معناته انج تبالغين في الحريه وكل شي يكون فري عندج حاولي تسوين كل شي بما يرضي الله قللي من الطلعات ترا الروحات والطلعات الزايد للبنت مش مقبوله حطي حدود لكل شي يعني اثبتليهم انج انتي قد هالشي وبترفعين راسهم لا تخلين الحريه تنسيج المباديء والاخلاق
اوصيج بقراءة القرأن فيه تهدأه للنفس !!
هذا اولا وعقب المشاكل بتنحل شوي شوي
الله يعينج ما اعرف شو اقلج
الله يفتحها عليج
لاحول ولاقوه إلا بالله العلي العظيم
ماعليج من احد ولاتسوين حق احد سالفه
برأيهم عيشي حياتج شرات ماتبين دامج ماتمشين بالغلط
والإنسان الناجح دووم مهاجم
ربي أيسر أمورج ويسعدج ان شاء الله
الله ايصبرك اختي العزيزة عليكي بكثرة الاستغفار والدعاء لكي تتغير الاحوال عندك والله يبعثلك ابن الحلال الي ايريحك من كل هاي المشاكل ويكون هو المسؤول الاول والاخير عنك
على هالموضوع كله ما اقولج غير ياحظج بامج
الله يخليلج اياها ويطول بعمرها يارب
انا امي الله يهديها توقف ويا الغريب ضدي
الله كريم ياختي
بس الواضح انه خواتج يقطعن عمارهم مقهورين منج
وهذا اصلا مب ذنبج
من حقج تدرسين ووتعلمين
اذا بيلومن اولا يلومن ابوهم وثانيا امهم الي مالها كلمه ولا راي
كيف مخليه بناتها جي بلا تعليم
عاد ما لقو حد يضاربونه غيرج !!
وكانج انتي الي حرمتيهم
يمكن كلامي يعصب شوي بس والله مقهوره شو يبونج تسوين يعني
الله يهديهم وويسر امورج ويهدي ابوج يارب