تجربتي الشخصية

السلام عليكم ورحمة الله وبركاته

أحترت كيف أمسي وأصبح عليكم
مساء / صباح الورد الابيض مثل قلوبكم
مساء / صباح العود و البخور وهذا طيبكم

مساءكم وصباحكم قشطة وسكر وعسل >>> منزوع الدسم تماشياً مع الاجواء السائدة في أتباع الحمية

أهلاً بخواتي الغاليات أهلاً لكل البنوتات الحلوات

أشحااااالكم خواتي الغاليات؟

شو الرجيم معاكم؟

كم وزنكم أول ما بديتوا الرجيم؟ وكم نقصتوا؟

>>> خلصينا شو عندج هع

حبيت أبشكركم بتجربتي الشخصية بـ الأسبوع الأول من أتباع رجيم الدكتور إسامة حمدي (الرجيم الكيميائي)

أول مرة بحياتي أتبع حمية صح من غير تخبيص الحمد الله لين اللحين ملتزمة ماخربت كل شي تمام التماااااام الله يثبتي وإياكم يـــــارب

قولوا آمين /o

أول مرة بحياتي أكون جادة وأتبع الرجيم بحذافيره من غير إضافات السرط الزايدة

قبل يوم أسوي الرجيم كنت أضيف جدول الحمية بالإضافة إلى الأكل الطبيعي >>> مستانسة ويا راسج هع

بس هالمرة الحمـــــــــــــــد الله الحمد الله

نقصت خلال أسبوع

(( 5 ))

خمس كيلو

>>> مبسوطة أوي أوي أووووووي

ومن خلال صفحتي المتواضعة هذي أحب أشكر خواتي الغاليات :

أشكرج الحبوبة للأمل بريق على تواصلج معاي وعلى تشجيعج المتواصل الله لا يحرمني منج ومن تشجيعج لي ^_^

&

واللي زاد حماسي بإتباع الرجيم الكيميائي :

المشاركة الأصلية كتبت بواسطة دمعة حزن 1979

هلا خوااااتي انا بخبركم بصرااااااااااااحه في شي يمكن يزعلكم مني بس والله غصبن عني بقولكم شو هو!!! بس اول بخبركم كم نزل وزني في السبوعين ويومين من الاسبوع الثالث …

ابصراحه انا كان وزني قبل ما ابدء هذا الرجيم ( 98 ) و يوم وزنت عقب مابديت ( 90 ) و هاذا للأمانه
يعني انا نزلت في هاذي المده 8 كيلو فقط …. والحمدالله انا راضيه على النتيجه

[/]

أشكرج الحبوبة دمعة حزن 1979 على موضوعج وتجربتج الناجحة اللي حمستني ع أتباع الرجيم الله يبعد عنج الأحزان ويبدلها أفراح وسرور ياااارب واصلي وأنا معاج ^_^

وهذي بداية الأنطلاقة نحو مرحلة يديدة من مراحل عمري وهي مرحلة الوصول إلى الرشاقة بإذن الله

تمنياتي لكم بالصحة والسلامة والرشاقة الثابتة والسعادة الدايمة >>> شو تبون أكثر من هـ الدعوة

تابعوني أسبوعياً بموضوع يديد

دمتم بسعادة مــا تفارقكم

ربي يحفظكم

مراعاة

لهذا الحدث

الهام ليقف

العالم

بهدوء

وصمت

وخشوع

فقد حان

موعد نومي ^_^

أشوفكم باجر على خير

تصبحون على طاعة الرحمن