المرض النفسي والظن بالمرض وانتي ما فيج شي

حبيت اطرح هالموضوع لاني كنت بهالموقف مع اختي وشفته مره ثانيه عند وحده ثانيه وقريته بعد بنفس الحاله
طبعا المتزوجات يكونن هن الضحايا مثال على اختي عشان توضح الصوره
انا ختيه خذت واحد مغازلجي رقم واحد ما تدريبه بالصدفه قامت تزخ عليه حبه حبه تقول حتى مرات احلم انه خاش شي ويوم اسير ادور مكان الحلم القا هالشي لي خاشنه مره حلمت بتيلفون خاشنه عند التاير تقول نشيت وسرت جنه الا حد يقولي يافلانه نشي وحطي ايدج عند التاير وبتلقين شي تقول حصلت تيلفون وياليتني ما حصلت تقول شو بنات شو مفاصيخ ولا مواطنات بعد ومسجات اتقول انا يودت راسي ونشبت لعنت خيره الريال انكر طبعا الريال ما يعترف وخذت عيالها ويت عندنا عادة اجتيليه ولا تشلين عياله والله هههههههه انه طول الليل عند باب البيت يترياها ويعتذر لين ما امايه قالت ردي عشان عيالج بعد اقتناع ردت اختي انا شخصيتها قويه قالت برد بس لا تحرا نفس قبل المهم الريال طخ ومرتا الايام ويت بعد شاله شلايلها قلنا شفيج تقول حطيتله جهاز تحت السيت وسمعته هو ربيعه يطرون الايام الخوالي واتصلبه فنفس الحزه واقوله حط ايدك وبتلقى الجهاز تقول اسمع ربيعه يقوله حرمتك تعرف حرمتي لاتتصل فيني ولا اعرفك ههههههه ومواقف وايد المهم هالانسانه لي شخصيتها قويه يتها فتره قامت اتيني وتقولي وديني المستشفى اوديها مره مرتين مافيها شي بس تنتفض يمبها ياكلها اخر شي قالتله الدكتوره فيج حاله نفسيه وبحولج طب نفسي انا هني قلتلها استريحي ما فيها شي وطلعتها الاخت مقتنعه تبا تروح الطب النفسي رديت البيت وخبرت امايه وقلتلها بنتج من خيانات ريلها ظعفت وحالتها النفسيه تعبت قامت تحس بالتعب بجيمها وهي ما فيها شي من التفكير والتوتر قالت اميه هاي اذا راحجت الطب النفسي بيخبلوبها بادويه وانا ابخص رمسناها قلنالها ترا البيت بيتج تبينه قعدي ما تبنيه قولي انتي ما فيج شي بس عيالج ابدا عنه هو يموت وعيالج يتمون وطبعا امايه عطتها نصايح انها ماودرتنا يوم صغار وكم ضحت وتعبت ليش نحن ما نتعب على عيالنا ومن هالكلام لين ما ردت قوتها واشتغلت وتوكلت على الله لانها حصلت الدعم من اسرتها واقنعناها انه ما تفكر بالريال تفكر بنفسها والريال بداله عشر هاي من ناحيه اختي

وحده ثانيه تقوله ملجت وقبل العرس باسبوع طلقها لانه اونه مب مستعد البنت استخفت ويت ربيعتي قالت قومي بنوديها الطب النفسي قلت ياماما اي طب نفسي مب اي وحده تتعب راحت الطب النفسي وخاصه عم طريق المستشفى التحويل يكون مصيبه مريصه رسمي قلتلها قعدي وياها ورمسيها وخلكم وياها والريال ملج ما دخل وهي بعدها اشحلاتها ما فيها عيب بس هو مب كفو وزين يت من عنده ومحد يلومها اذا تبين تودينها وديها استشاره فعياده خاصه تاخذ جلسه تفضفض فيها جلستين اما مستشفى وتعبانه وحولوني بعد ما حصلو فيها مرض لا مصيبه ووايد نفس هالحالات
اللي ابا اقوله واوصله الريال صح مهم في حياتنا بس هل حياته اهم عن حياتج لا طبعا هو يستانس وانتي تمرضين بالعكس بستانس صح بقلبي حزن بس ما بظهره للناس بكون قويه والدعم الاسري والاصدقاء ترا شي مهم في حيات الانسان هالايام ماشي صديقات بس عالواتس اب جوفو امهاتنا للحين ميالسنا عامره بهالعييز والنفسيه عندهم متقلبه هههه الصبح عزا فليل عرس والحياه حلوه لانه عندهم اقتناع انه الحياه فانيه ومحد دايم وهن مع بعض اذا وحده طاحت حصلت ربيعتها وناسها وياها بس نحن نعزل عمارنا عن الدنيا اللحين الوحده لي عرست ودرت ربيعاتها انزين ليش تخافين تصرق ريلج ويوم تودريناها تصيحين تبين ربيعات تفكسرنا صار سطحي فكرو عدل يا حريم محد دايم لحد

المشكله مرات الريال ما يعرف شو اللي تباه منه حرمته

كله تحافظ ع بيتها وريلها وعيالها وتحاول تتمسك باللي باقي من حياتها الزوجيه

بس الريال في وادي اخر

انا اعرف وحدة مرضت نفسيا عقب خيانة زوجها
والله والله اقولها ان حياتج تعتبر جنة بس هي مب حاسة ؟؟؟
الحمد الله عندج نعمة الصحة و الاهل و الابناء و حتى الزوج تاب توبة نصوحة و تغير
عندج بيت كبير يلمكم و ماديا مب مقصر عليج
و هو يحاول يراضيج طول السنين و الله تاب عليه
خلاص انسي يا حرمة انسي

و عندي زميلة ثانية مثل البلسم
زوجها تزوج عليها ……………. من اللي خبري خبركم و عيوز مكسرة بعد و يغازلها سنين طبعا قبل الزواج
و فراها بكل سهولة و هي سارت طلبت الطلاق و اطلقت
و عادي عنده جنه العيد الهرم لا رضاها ولا شي ولا اتصل ولا سأل
و هذا بينهم قصة حب كبيرة
لو انا مكانها كنت ميته الصراحة؟؟؟ ع ها الريل اللي حبيته طول عمري و اترييته و ساعدته طول ال 15 سنة من زواجي يعني فلوسها طارت و قلبها طار و كل شي طار
بس ما شاء الله مثل العسل تشتغل و تروح و ترجع
و بالعكس من اطلقت زادت جمالا و لا قبل يوم متزوجة من التعب و النفسية الخايسة الواحد يحسها تعبانة

اهم شي الوحده تكون قويه عشان نفسها وعيالها
صح الخيانه صعبه ومره بس خلاص لازم اكمل حياتي ،
اعوذ بالله من الخيانه صارت سهله وفكل مكان