السلام عليكم شخباركم خوااتي منتدى سيدات الامارات الصراحه انا احب هالمنتدى وخاصة هالقسم
احسه نفس الدفتر تكتبين وتقولين ايلي فخااطرج واقرا ردووود الغاااويه والصريحه وايلي مافيها
مجااامله .
بقول مشكلتي اول موقف صارلي اليوم واريد تتناقشون معاااي
السالفه ياطويلات العمر انه اليوم زارتني اختي هي وريلها
وعطت امي فلوس مبلغ 8000درهم
وامي حطته بايدي المهم اختي قعدت شوي وطلعت هي وريلها وانا ماعديت الفلوس كم
كنا نبغي نودي الفلوس عند حرمه تقربلنا
المهم امي اتصلت على الحرمه ايلي بنوديلها الفلوس الحرمه قالت انا موموجوده في البيت
تعالي عقب المهم امي قالت ان شاءالله
وعقب اجت عندي بنت جيرانه بين فتره وفتره تزووورني
هي نفس عمري 22سنه تقريبا
المهم وانا حطيت البيزات في الشنطه نفس ماعطتني اختي وكنا انا والابنيه نسولف
عادي فجاه سبحان الله قلتها الله يعزكم بروح الحمام
وعقب امي كانت قاعده معاها في الغرفه وهالبنيه يوم كانت عندي اول مادخلت علي الغرفه بنت جيرانه
اتصلت علي بنت خالي وقالت لي انها تبغا مصحف لانها تجمع مصاااحف عشان يودونه دوله
يتعلمون القران المهم عقب ماطلعت بنت جيرانه انا روحت دورت مصحف عندي
وحطيته فوق السرير وكنت البس عبايتي عشان انا وامي نسير عند الحرمه
المهم امي قالت لي عدي الفلوس كم انا عديتهم طلعوو 5000الاف درهم
انصدمت عديت مره مرتين اتصلت على اختي يابنت تاكدي
شو السالفه شوصار خبرت اختي المهم اختي قالت انا متاكده عطيييتج8000درهم
المهم امي قالت لي محد كان في الغرفه غيري انا وبنت جيراانه بس
امي قالت لي اتصلي على بنت جيرانه يمكن راح معاها بالغلط يمكن سبحان الله
المهم اتصلت على البنت قلتلها تعاالي دخلت عندي الغرفه
قالت لي شو السالفه قلتها ضاعت 3000منا الخ من هالكلام قالت شاكين فيني ومااعرف شو
وشافت المصحف فوق السرير اتحسب انه قصدي احلفها
وانا ماكان قصدي وفوق كل هذا انا ماكان قصدي انه عشان احلفها
بس هي حطت ايدها وحلفت
انا قلتها لاتحلفين انا واثقه بس بليز تعالي ساعديني بندور في الغرفه يمكن طاح مني ولامني
بس انا متاكده انه ماطاح مني ابد خير شر انا متاكده 100%
وعقب قلبنا الغرفه وانا خليت عمري اطالع الكبت وادور عند الثياب وكنت احس
انها طلعته من عندها بس ماحبيت اظن ظن السوء والله يشهد على كلامي اني ماشكيت فيها
ابد خير شر المهم وكنا ندور تحت السرير فجاه قالت لي هذا هو هني تحت السرير
شوبيدخله تحت السرير بيطير يعني
انا واايد ت ضاايقت وانحرجت من امي ماعرفت شواقولها طلعت عذر قلت حق امي انا الحين تذكرت
طاح عني تحت السرير
ادري طولت عليكم بس كنت مضااايقه وحبيت اقولكم واشكييلكم حالي عشان اخذ راايكم
طاحت من عيني هالبنت هالفلوس وسخ الدنيا كيف انا باخذ شي مو لي اليوم خذت فلوس
بكره شو بتااخذ كيف امنها السموووحه طولت عليكم خبرووني كيف اتعااامل مع هالبنت
ومطرشتلي مسج انا تضايقت منكم الله يسااامحكم ماتوقعتها منكم
كل وحده تحط نفسها مكاااني شو بتكون ردة فعلها وكيف بتتعامل مع هالبنت جاوبوني بكل صراااحه
والسموووووحه طولت عليكم
ما شاء الله عليج أحسج كنتي رزينه … بس موقفج محرج الصراحة
يمكن سبحان الله هي شلته و يمكن لااه …
يمكن شنطتج كانت متبطله و سبحان الله طاحت بالغلط !!
احتسبي الأجر خيتو و الله يوفقج و ييسر أمورج
ليش ما تيلس بنت جيرانكم في الميلس ؟؟؟ ترا والله احسن
حتى لو مب غريبه بس احسن لكم
انتي في قرارت نفسج عارفه انج ما بتخبين الفلوس ولا بيطيحن جزء تحت السرير
المهم في تجوري صغير بالارقام اشتريه وحطي فلوسج فيه
هو تقريبا نفس اللي يشترونه في الفنادق
يمكن خذته ويمكن صدق طاح
بس حالة الفلوس تحت السرير بتبين
يعني لو كانوا ملمومين يعني انحطن
ولو كانوا متناثرين شوي مب وايد يعني طاحن ونتي المفروض تعرفين كيف حطيتيهم فالشنطة باهتمام ولاعقيتيهم بسرعة
والله العالم
بس بعد لا تنسين ان المال السايب يشجع عالسرقة والحاجة وابليس دوافع قوية
والنفس ياحبيبتي امارة بالسوء
تغاظي عنها واتنبهي مرة ثانية
محد يامن حد
ربي يوفقج وتخطى عن سيئاتج
الله يهديها
اتخيلت عمري في الموقف
عيب عليها اطرش المسج
بس اعذريها ترى في فئات من الناااس في المرض نفسي
السرقه حتى لو عندها مليون درهم….
اذكر وحده معانا ايام المدرسه كانت تسرق بيزاات البنااات…
وعقب طلع فيها مرض نفسي ….
اعذريها …وادعيلها يالهدايه مهما كاان هاي اربيعتج…
اذا هي اخذت الفلوس ويلها من عقاب ربي هذي حلفت بالمصحف الشريف يابنات الحلف مو شي هين
يمكن ربي بعدين ايازيها ع هالحلفه اذ ما استغفرت وتابت او صامت
المهم الفلوس حصلتيهن وموقفج صحيح بس بعدج كلميها البنت وشرحيلها موقفج وقوليلها او كنتي بمكاني شو بتسوي وبتعذرج والله يهدينا يارب