السلام عليكم
العنوان وايييييييد كبير و مخيف و واقعي
و لكن يستحق
وقفة
مع النفس
موضوعي خاص للموظفات وحتى بعض ربات البيوت
اللي تبغي تكون ريال و حرمة كانها روبوت
تبغي تصرف ع البيت و ع ريلها و تبغي تكون مكانه
انتي تسوين كل شي
الصرف عليج
الايجار عليج
اساسيات البيت عليج ……….الخ
توصلين اليهال و ترجعينهم
مواعيدهم مستشفياتهم
مراجعاتهم الخاصة ف المدارس و المستشفيات
اغراضهم ملابسهم
مستوية اساس البيت و عمود البيت
مجابل البيت كل شي عليج
طيب اللي عندج شو دوره ؟؟ يلسة و شيشة و قهوة و رقاد و دوام بس
وين دوره ك رب اسرة ف البيت ؟؟؟
تذكرت مووضوع خاص شوي
تقول لي تريييت احمل من سنين و يوم حملت
قلت له خاطري اراجع ف مستشفى خاص تقريبا يكلفني 4000
درهم ل 9 شهور حمل
اخاف ع الياهل اللي اترياه من 7 سنين
ادفعي من راتبج ما يخصني
وصلني با فلان عندي موعد ،، تعال شوف النونو بالسونار
مو متفيج كالعادة
والله يا دانة نزلت مني دمعة
ما ابغي فلوسه
بس لو قال لي يفداج المستشفى
و يفداج كل شي
لاجل أول مولود وانا بروحي اراجع عادي بدفع من جيبي
طيب انتي عودتيه تسوين و تروحين و ترجعين
مب انتي موظفة و عندج سيارة ،، برايج سيري و خلصي امورج
انتي غلطانة
بنات منو منكم هي الربان
و هي القايد
هي الاساس و هي عمود البيت
هي تودي و اتييب
هي تدفع و تسوي
هي الريال و الحرمة
راتبها ضايع ع مصاريف البيت المستشفى اليهال مدارسهم
ولو نشوف لحالتها المادية و الاجتماعية
صفر لا بيت لا سيارة لا حياة شرات العالم
هي تسد نفسها و تسد ريلها
""انا تكلم عن استغلال الرجل لزوجته بصورة مفرطة ""
""الحرمة اللي تاخذ دور ريلها ""
""ما ارمس عن الحرمة اللي تساعد ريلها ف حدود الحاجة و المعقول و اللازم""
كل وحدة تقول الصدق عشان ابدأ موضوع
الغباء النسائي في مجتمعنا
ها الغباء مب بس نحن نسويه
حتى بعض امهاتنا الكبار اللي وصلن 40 و 50 سنة
مع ذكر امثلة و امور منتشرة بينا و نحن ما ندري
انتي توصلين اليهال
انتي تشترين من الجمعية
انتي توصلينهم المستشفى
انتي انتي انتي انتي انتي انتي
انا ما ارمس عن الامور المادية فقط
انا ارمس عن دور الرجل ف الحياة الزوجية وين دوره ؟
ليش خذتي دوره ؟؟؟؟؟؟
بأمانة وقفة
مع نفسج
؟؟؟؟
و ابغي إجابة صادقة جدا
طيب باجر بتستقلين شو بيصير لج ؟
باجر بتتعبين مو قادرة توصلين و ترجعين و تسوين كل شي ؟
و كيف ريلج بيتعود ع مصاريف البيت ؟
كيف بعد سنين بتقولين له انا تعبانة اروح و ارجع ساعدني شوي ؟
لي عودة مع التفاصيل
و اعذار الحريم المعرووفة
فديته مب مقصر علي
حبيبتي تفديه من اليوم لباجر ما عندي مشكلة
وانا لازم اشاركه ف كل شي
لا يا عيوني ،،،، هاي مب مشاركة ابدااااااااا
انتي خذتي دور الريال في كل شي ،
، في كل الامور المادية و الاجتماعية
لا تحطين كلمة مشاركة لعذر لتصرفاتج
وين كلمة المشاركة عن كلمت كل شي فوق راسج ؟؟
فرق بين المشاركة و اخذ دور الرجل
انتي خذتي دوره ف كل شي
خلي الريال ياخذ دوره ،،،،،،،
و انتي خذي دورج
لا تخلطين الادوار ابدا
الريال له دور
و الحرمة لها دور و حتى ولو كنتي موظفة ،، لا تطلعين برى حدود دور المرأة
متى ما اختلطت الادوار بصورة دايمة و مفرطة
انتي اللي بتتعبين و هو المستريح
نسوي و نسوي و نسوي لين ما بيوتنا اطيح ع راسنا
و عقب نولول و نقول
ليش انا شو قصرت انا بشو قصرت ؟
قصرنا و قصرنا و قصرنا
انا حرمة ،، انثى
و هو ريال ،،، ذكر
بتحطين اعذار من اليوم ل باجر ،،، حطي لج اعذار و تحملي النتاييييج
الي قلتيه واقع بس شو الحل
حبيبتي انا و ريلي دوم متفاهمين ( الله يبعد عنا الحساد) يعني يدفع بس مرات انا اساعده
بتقوليني لا تساعدينه .. بقولج ما اعوده ع هالشي بس ها من نفسي مع انه ما يقولي هاتي او نقص عنده
اكيد انتي من بداية عوديته انتي تدفعين يعني واثق ليش يعطيج بيزات و انتي تقولين لا انا بدفع
انتي حاولي من بداية الشهر تاخذين منه مبلغ حتى لو انتي من محتاجة عشان انتي تحسين انج حرمة البيت
صح احن نشتغل بس من واجب الريال يدفعلج و يدفع لمصاريف البيت و اليهال
موضوعج حلو بس ما راح نسميه الغباء النسائي انا بسميه التضحيه النسائيه في مجتماعتنا
تعرفون شو السبب لكل هذا في سببين من وجهة نظري
السبب الاول : (( التربيه))
من شب على شي شاب عليه
يعني اذا كان الزوج طالع من بيت فيه ان المسؤوليه كلها في ايد الام هي الي تامر وتنهي
هي الي شاله البيت على راسها من صرف من كل شي والاب مرتاح ف هني يتعود الزوج
ان الزوجه هي الي تكون المسؤوله عن كل شي حتى عن الصرف وهو بس يساهم بشي بسيط
واحيانا يعطيها المصروف بس انتي تصرفي فيه ولا اتين عقب تطلبين اكثر
اما السبب الثاني
(( الزوجه))
اكثر الزوجات يحبون يريحون ازواجهم ويحبون يكسبون ودهم وحبهم ففي
بدايه العشره الزوجيه الزوجه تحاول تشد انتباه الزوج من خلال الصرف هذا
اذا كانت موظفه طبعا ف شو تسوي تقول للزوج انا اشتغل واحب اساعدك
ومثلا تكفل شغاله بروحها ومثلا هي الي تشتري اغراض البيت ومثلا ما تطلب مصروفها
على اساس انها موظفه لا تقول ما يستوي لان هالشي والله يستوي واجوفه قدامي يوميا
فهني الزوج شوي شوي يشيل ايده من البيت ومن مصاريف البيت وعقت طبعا الزوجه تحس
وتتعب نفسيا وماديا من هالشي وتطالب الزوج انه يصرف بس عقب شو عقب ما تعود عقب
سنوات من الراحه اتي وتقول له تعال شيل عني المسؤوليه
الحل لكل هذا هو ان في بدايه الزواج او قبل الزواج يتفقون على كل صغيره وكبيره
حتى على الصرف وعلى المصروف لازم كل شي يكون واضح قبل الزواج علشان
الزوجه ترتاح والزوج يرتاح
الي حابه تساعد زوجها هالشي عادي بس مب تشل كل شي وهو مرتاح
ساعديه بس بجزء بسيط وبس
وعلى فكره انا كنت موظفه وزوجي ولله الحمد عمره ما قال ادفعي او شاركيني مع ان احنا نبني بيت احلامنا
ومع انه مزحوم عمره ما قال ادفعي لي وساعديني بالعكس انا اذا شفت انه هالشهر هو مزحوم اشيل عنه شي بسيط
اساعده مثلا اقوله خلاص هالشهر الاغراض علي والا اقول له لا تدفع هالشهر مصروف اليهال يعني اشيل عنه شي بسيط
بس مب دوم ومع هذا مب مقصر ويعطيني مصروفي وزود لان هالشي الي المفروض يصير الزوج الي يدفع مب الزوجه
وبعد 9 سنوات من الشغل قال لي استقيلي وفعلا سمعت الكلام واستقلت بس وانا مجمعه بيزات ولله الحمد وهو مب مقصر
هالكلام مب علشان امدح زوجي لا بس علشان اقول ان الزوجه لا تعطي الزوج الخيط والمخيط وعقب تقول انا اصرف وهو
شايل ايده انتي من البدايه لا تعودينه على هالشي
هيه انا اسوي كل شي قلتيه اختي
لكن انا اسوي هالشي علشان عيالي
اممم ما سميه غباء كثر ما اسميه "مشاركة" بس مب دوم طبعا ومن خاطرج انتي مب هو ايي يقولج دفعي وسوي
لان هالايام كل شي غالي والريال بروحه مابيروم ع كل هالصرف ( بيت – عيال – مدارس – روشن – بشكارة – دريول – قسط سياره – مصروف زوجة – ديون بنك … الخ )