الحمدلله ربيت بالسلامه

يوم الاحد تاريخ 6/1 حسيت بآلاام واستانست قلت اكيد ولاده بس بتريا واخت ريلي دكتوره نسا و ولاده قالتلي تعالي المستشفى بقول لربيعتي تفحصج وتشوف اذا فيج ولاده ورحت المستشفى والدكتوره شافت البيبي وقالت لي كل شي اوكيه البيبي راسه تحت بس البنوته وزنها كبير تقريبا 4 كيلو (لان فيني سكري الحمل) ومايه الراس وايده وسوتلي تخطيط وقالتلي الياهل تخطيطه مب لين هناك تعالي باجر الصبح بندخلج وبنسويلج فحوصات
ورحتلهم ثاني يوم تاريخ 7/1 الصبح سوولي فحص دم و اشعه وقالولي البيبي اوكيه بس انتي غير سكري الحمل فيج فقر دم
ويووني استشاريات شافوا ملفي في ولادتي الاولى ربيت طبيعي بس بعد الولاده اكتشفوا ان ايد بنتي اليمين ملتويه وماتروم تحركها وكنا دوم نوديها علاج طبيعي اكثر عن سنه لين ردت طبيعي وتحركها
المهم قالتلي الاستشاريه الاحسن لج تربين قيصيري لان انتي قصيره وحوضج صغير وبنتج الاولى كان وزنها 3 كيلو وتعبتي فالولاده هالبيبي اكبر وزنها 4 كيلو وفيج فقر دم وسكري حمل ولو ربيتي طبيعي وطلع الراس الكتوف بتعلق فالاحسن تربين قيصيري
هالكلام كان الساعه5 العصر يلست اصيح وما اتخيل يستوي شي فالبيبي وما ابا اتعب فيها واراكض من مستشفى لمستشفى نفس بنتي الاولى فقلت خلاص بسوي قيصيري على طول يابولي الاوراق و وقعت وانا مب مستوعبه وريلي يهديني وامي يت واهل ريلي كلهم يو
عالساعه 8ونص دخلوني اسوي العمليه وما طاعوا يدخلون اي حد وياي ريلي حاول معاهم بس قالوا ممنوع بس اخته كان وقت دوامها ودخلت وياي الغرفه وقعدت تهديني وحطت الفون في اذني وريلي كان يكلمني لين خلصت العمليه
والساعه 9 طلعت احلى ماريا والساعه 9ونص خلصت العمليه

نصيييحه يابنات اللي فيها سكري الحمل لا تهمل عمرها مب زين انه البيبي يكبر احتماليه انها تسوي قيصيري50٪
وفقر الدم بعد لازم الحامل تهتم في عمرها

والله يوفق و يسهل على كل الحوامل يارب