هذا أول موضوع لي .. بصراحه أنا إنسانه لاعت جبدي من البشاكير ..
ضغط وعذاب نفسي .. ويسوون ساعات حركات تحسينها متعمده عسب يرتفع ضغطج..
وينبشون الأغراض خصوصا إذا كنا برع البيت .. الاشياء في الثلاجه بسرعه تخلص ..
وين ما تسيرين في البيت تشوفينها في ويهج ..
صدق صدق أنا ابغي إذا خلصت مدة شغالتي أني ما أييب غيرها .. بس ابغي اعرف هل بقدر استحمل؟ خصوصا اني مب موظفه يعني اكون في البيت اغلب وقتي
عندي اربع صغاريه .. 3 يسيرون المدرسه يعني من الصبح الى الظهر هم محد ..
وهم من النوع المرتب ماشاء الله ويسمعون الكلام .. يعني مب وايد فوضوييين ..
أبغي أعرف منو منكم ما عندها خدامه وأمورها ماشيه تمام؟ يعني مرتاحه نفسيا .. طبعا البيت يباله شغل شوي اذا سوينا جدول نقدر نخلص شغل البيت اللي هو .. طبخ +غسل الثياب والكوي +التنظيف والترتيب ..
خبروني اقدر استحمل أني أتم بدون بشكاره؟ ولا لازم اييب علشان اكون فاضيه لعيالي وزوجي يوم يردون من الدوام ؟
ممممممممممممممممم الصراحه ما اعرف شو اقولج
هالبشاكير اذا ما بيناهم ابتلينا
واذا يبناهم بعد ابتلينا
ان شالله الخوات بيفيدونج
الغالية بعد ما تخلص مده خدامتج
تمي فترة بدون خدامة
اذا قدرتي تسيطرين على الشغل لا تبين
اما اذا ما قدرتي وحسيتي ان كل وقتج بس للتنظيف والكوي والغسيل والطبخ
احسن اتيبين خدامة تساعدج عشان تتفرغين لاهل البيت
إن شـــآء آلله الخـــوآت يســـآعـدونـج
وآلله يكــــون فـ عــونـج
اختي انا ماعندي خدامة اموري ممتازة ولله الشكر مع العلم ان عندي 3 بنات
صدقيني بس احط راسي وانام اكون مرتاااحة غير يلي عندهم خدم نفسيا مو مرتاحين
انا ملارتاحة اقوم انظف وارتب وكله تمام صدقيني اريح وانظف وراحة وتاخذين راحتك احس الخدم مثل الهم على القلب يعني انتي في البيت تاخذين راحتج من ملبس وغيره تحسي هذه مملتك انتي بس
وغير كذا النظافة تكون من الخاطر
حاولي جربي بتلاقي صعوبة في البداية بعدين تتعودي
ولاتنسون قبل كان لافي خدم ولا حشم وكل حد عندهم 6 و7 و8 عيال ووماشاء الله بركة في كل شي
انا الحينة بدون خداامة الحمد لله مشية اموري فالاول استصعبت الامور لاني ام جديدة بس الحمد لله حصلت تفهم ومساعدة من ابو شباب وتفرغت الحين كليا للبيبي وريلي وشغل البيت قلللت طلعاتي الا للضرورة مثلا , اقوم من نوم ابتدي بالاساسيات يعني لي عودة مع شرح مطول …
الغاليه انا مسيطره على وضعي للحين بس انا غير عنج ما عندي عيال وعايشه مع اهل ريلي
يعني اموري يمكن اهون عنج
بس انا من رايي من اتسفرينها تمي مده من غير بشكاره وجوفي اذا بتقدرين ع شغل البيت ولا لأ