متضايقة ومليت من هالحال ،،،،

زوجي من النوع اللي تصيبه حالات مزاجية مختلفة اذا تغير عليه شي ولا مرض أو انضغط في الشغل ،،، يعني بالمختصر المفيد في اغلب الوقت ..
في البداية كنت افكر انه مزاجه على طول بيتعدل من يرجع كل شي عادي بس من فترة صاير مزاجه كئيب بدرجة صرت اكره القعدة معاه ،،، يعني صرنا على هالحال اكثر من 4 شهور والصراحة مو عارفة السبب الرئيسي لانه كل فترة يشتكي من شي ،،، واذا حاولت اكلمه تحجج لي بالف شي و شي واطلع اخر شي انا اللي ما اصبر واتحمل …

الصراحة هاليومين كارهة نفسي وكارهتنه موت ،، ودي ارجع بيت ابوي وما اكون متزوجة ،،، بس بنتي هي اللي كاسرة خاطري … والله حاولت كل شي ،،، في البداية كانت حساسية عيونه هي السبب ،، صار يشكى من كل شي ،، ما اقدر اطلع معاج لأنه عيوني مضايقتني ،، ما اقدر اجوف ،، ما اقدر حتى اسولف معاج ولا اصد صوبج … ووظيفتي اني اسكت وابلعها ولا انطق بحرف واتحمل لأنه على قولته انه وايد متضايق من عينه …
آمنا بالله ،،، قلت يمكن الموضوع مضايقنه وبتكون فترة وتعدي ،،، مع اني مجربة كل أنواع الحساسية حتى فترة كنت ما اجوف منها والحمد لله ما اذكر اني كرهت حد بحياته بسبة حساسيتي ،،، بس طبعا ريلي غير …
جربت كل شي اني اسكت واصبر مثل ما يقول ،،، اني الهي نفسي ببنتي وشغلي و اهلي ،،، اني اطلع مع ربيعاتي … بس والله ما فاد ،،، ساعات ارجع مستانسة واصد في ويهه اجوفه جنه حد ميت عندهم ،، و لا ينطق بكلمة ،، ويخرب لي يومي كله …

حتى اذا طلعنا ولا رحنا بيت اهلي ولا اهله ،، لازم على اخر شي يقول كلمة عن اي شي وتخرب كل الطلعة ،،، المشكلة انه مع ربعه غيييييييييييييييييييييييييير ،،، مع انه من اول ما تزوجنا ما كان جي ،،، كان يرجع البيت يقعد معاي ، يسولف واحيانا بدون تخطيط نطلع ،،، الحين هذا كله جزء من الماضي …
المشكلة شكل هذا الوضع ما بيتغير ،،، لأنه حاليا قاعدين نبني بيتنا ونجمع اللي ورانا واللي جدامنا حق هالبيت ،،، وفوق هذا غير دوامه ،،، وعلى قولته عيونه تعوره ،،، يعني كل ما بناقش معاه شي ولا بقول له شي يقدر يتحجج بأي شي و يطلعني انا الحنانة اللي ما تقدر ،،، بس والله انا تعبت ..

من اسبوعين كنت وايد متضايقة وخاطري اطلع ،، وعدني وكالعادة اخر شي تحجج انه تعبان وما يقدر ،، انا بعد ما قلت شي ،، فكرت حرام مودني بيت اهلي وبخليه على راحته ،،، والله انه خلال اقل عن ساعة من هالكلام وهو قاعد معاي اتصل له واحد من ربعه وتواعدوا يروحون السينما !!!!!!!!!!
يعني حقي انا تعبان وحق ربعه فاضي ،، بس بعد ما قلت شي ولا فتحت بوزي بكلمة ،،، قلت له باجر اذا ما عليك امر نطلع ، صار لنا اسبوعين ما طلعنا مع بعض وقال اوكي ،،،، صار اليوم الثاني والا هو مواعد ربيعه الثاني ،،، عاد انا صج ضقت من الخاطر وما قدرت ،، قعدت اصيح…
اول مرة اصيح على هالسالفة ،،، قمت وقلت له بروح بيت ابوي لأنه خلاص بيطلع وبيخليني ،،، ويوم رحت هناك طرشت له مسج وقلت له أنا مب راجعه البيت وايد متضايقة خلني بيت اهلي …. عاد اهني حس شوي وظل يتصل و يعتذر ،،، وشرحت له ليش اتضايق وسالته ليش يعاملني جي ،،، والله العظيم كلها مسألة 5 أو 6 أيام ورجعنا لنفس الحال …

والله مب عارفة شو اسوي ،،، حياتنا ابدا ما كانت جي ،،، صرت اتملل منه اذا رجع البيت لأني ادري خلال أي لحظة ينقلب ويهه علي وبعدين يطلع ولا كأني موجودة ،،، ودي ارجع بنية بيت اهلي لا تهمني الدنيا ولا احد ،،، اسولف ، اطلع لو على الاقل اجوف اهلي …
والله ادري انا في ناس مصايبهم اكبر بس هذا الشي ما ادري ليش مأثر فيني جذي ،،، قاعدة اكتب ودموعي ما توقف ….

المشكله ان هو عودج على شي وفجأه تغير عليج

ما عليه كلها مسألة وقت وان شاء الله بيرد شرات قبل واذا ما رد شرات قبل انتي حاولي انج تتأقلمين شو بتسوين يعني

محد يخرب بيته وحياته عشان هالامور

خلااص برايه خليه فتره وعقب بروحه بيحس انه محتاي يظهر ويقعد مع اهله

حاسه فييج ياروحي

ربي يصبررج يارب

مشكورين وما قصرتوا ،،،، محد يحب بيته يخترب على هالاشياء ،،، بس ساعات من الضيقة ما اقدر حتى اكلمه لاني ادري الوضع نفسه ما بيتغير …

الله يهديه