لمحبي الباستا اللي تكون بالصلصه البيضه ويا المشروم

كيس معكرونيا اللي تكون طويله او اي نوع بس احلى شي بالنوع اللي قلت لكم عنه

1 كريما حمره واللي ماعنده ممكن يستخدم اي ساور كريم من اي ماركه واللي ماعندها ممكن تستغني عنها

1 قشطه نستله اللي تتبطل من فوق + 2 جبن كيري او اي جبن مثلثلات او ملعقتين من جبن السائل اللي متوفر

1 كيس سبانخ مثلجه+1 علبة فطر + 1 علبة ذره

بصل مفروم فرم ناعم + شويه ثوم مهروس + نص فلفل اخضر بارد مقطع صغير

بهارات اللي تبينها و2 ماجي

الطريقه سهله وايد

1- تحطين جدر فيه ماي وملعقه زيت وملح ومكعب ماجي وتخلين المعكرونياتستوي وتخليها على صوب بس لاتسوينها لينه وايد خليها عاديه

2- بجدر ثاني نحط زيت وبعدين البصل وبعدين الثوم لمدة خمس دقايق بعدين الفطر والفلفل الاخضر وتحطين بهاراتج والملح والماجي وبعدين السبانخ والذرة وتقلبين لمده عشر دقايق

3- تظيفين القشطه والجبنه وتقلبين لمه يذوب الجبن وتحطين فوقهم الكريما وتتركين على نار هاديه لمدة خمس دقايق وبعدين تحطين المعكرونيا فوقهم وعلى نار هاديه تقلبين لمده خمس دقايق مو اكثر

ملاحظه السبانخ طلعوه قبل الطبخه عشان يذوب لانه مثلج

ملاحظه ثانيه ممكن اضافه الدجاج اذا تبون

وبالهناء والعافية