لكل الحريم لازم تدخلون

من سنة 2024 مسجلة ف المنتدى ولا حطيت موضوع ولا رد مجرد اني ادخل اتصفح بين فترة وفترة لكن هالمرة قلت بنزل موضوع لاني بغيت اوضح شي لكل الحريم لازم يتنبهون عليه ولكل اللي يدورون حلول لمشاكلهم الزوجية خاصة والمشكلات اللي تكون شوي كبيرة ومحتاجة خصوصية وتعامل اكبر … وربي يشهد اني مابغيت لكم الا كل خير

كل ما شوف وحده منزله موضوع تستشير فيه البنات عن مشكلة صايرة بينها وبين ريلها انصدم من بعض الردود اللي ينطبق عليها المثل "بدل ما اتجحلها عمتها" وكل وحده تعطي حلول من خيالها او من واقع تجربة شخصية وطبعا تشوف انه هي الصح لكن لو تفكرون فيها شوي كيف انا اخذ برأي وحده تعطيني حل من تجاربها الشخصية !! حبايبي هذا مب فون واخترب ولا اجراءات سفر ! هذي حياة اسرة كاملة .. فديتكم بنات الله يخليكم لا تعطون حلول زوجية ممكن اتدمر حياة انسانة مع زوجها وخاصة انه فيه حريم بالفعل ياخذون على شوركم وتجاربكم ولا جان ما حطت الموضوع من الاساس.. وانتوا يا خواتي لا تاخذون على رمسة كل وحدة لانه مهما كانت المشاكل تتشابه لكن الحلول تختلف والفرق انه الريال يختلف الظروف تختلف الاسلوب المكان الزمان كل شي يختلف ..
نصيحتي لكم لا تتعذرون بكتابة مشاكلكم في منتدى عام او حتى مع مجموعة صديقات هذا لانكم مب محصلين حد يسمعكم او لانكم تبون حل سريع واصلا مافيه حلول سريعة واي مشكلة ف الدنيا عمرها ما نحلت بانفعال وغضب وتوتر .. اصلا من اقرا مشكلة لوحدة من الخوات واقرا الردود اللي تشتت التفكير وكل وحدة تسرح بكيفها وبكلامها على طول احط نفسي بمكانها واحس اني من الردود تشتت اكثر من الاول !!

يمكن فيه ناس بتأيد كلامي وفيه ناس لاء .. لكن انتوا فكروا فيها شوي وخذوها بالعقل المشاكل لازم تكون موجودة في اي علاقة او اي حياة وحياة بدون مشاكل مب حياة ولانه نحن مب ف الجنة فلازم نعاني ف الدنيا ، دايما من تصير لج اي مشكلة تعاملي مع مستشارة او اخصائية متخصصة في العلاقات الزوجية ويا مكثرهم هالايام ما شاء الله ومواقع التواصل الاجتماعي ماقصرت كل بعيد قربته حتى ارقامهم تقدرين توصلين لها مب لازم من الاخصائيين المعروفين، دوري واسإلي عن اي اخصائية ف امارتج وتعاملي وياها عن طريق الزيارات او عن طريق التيلفون لو ماقدرتي وطبعا اولا واخيرا الدعاء ثم الدعاء ثم الدعاء مع الاستغفار

ادري طولت عليكم والسموحة واللهم اجعل كلامي هذا حجة لي لا علي
والسلام عليكم

بس اعتقد بعض البنات او الحريم يبون استشاره او يفضفضون من الضيقة او يمكن تلقى حل من وحده مرت بنفس الموقف او المشكلة