السلام عليكم
خواتي من فترة لفترة ابند الثلاجة عسب ترتاح ..
وامس بندتها الصبح ونسيتها لليوم الفجر ..
الحمدلله تحت ما شي اغراض وايدة لاني بعدي ما اشتريت اغراض الشهر ..
وفي الفريزر فوق الكباب كان ذايب وما فيه ثلج فعقيته على طول ..
بس اللحوم والسمك حصلته ذايب شوي بس بعده فيه ثلج فهل اخليه والا اتخلص منه وهو ما في ريحة ..
افيدوني وجزاكم الله كل خير
اذا فيه ثلج وماذاب كله احفظيه
وجوفي شكله ولونه وريحته تغيرت او لا
اختي اذا ذاب الثلج ولو شوي ما ينفع يتجمد مرة ثانية …. وحرام ينعق لانه مب خربان … انا انصحك انك تطبخيه او تسلقي اللحم و تثلجيه مرة ثانية او وزعيه على حد م الاهل والجيران بس قوليلهم ما يجلدوه ابداااااا… من اول ما بدء يفك الثلج عنه ممكن تحطيه بالثلاجة من تحت لمدة 3 ايام كحد اقصى و بعدين اذا ما نطبخ لازم ينعق…
بس السؤال مين قال انه الثلاجة لازم ترتاح؟؟؟ هي بروحها تريح نفسها بنفسها… يعني كل شوي تبرد و تفصل و ترد تبرد … ما يجوز اختي تتغير حرارة الاكل و تسكريها… هذا الشي بخبرها واسألي وكالتها احسن
حبوبه ما يحتاي تبندين الثلاجه عشان ترتاح؟؟
نحن فحياتنا ما سوينا جيه الا اذابنسافر نطلع عنها الاكل ونطفيها
والحمد لله ماصار فيهن شي
جزاكم الله كل خير خواتي … ما قصرتن
الغاليات بخصوص الثلاجة ترتاح لاني سمعت هالمعلومة من ريلي هو كان يدرس كهربا وهو خبرني اول ما تزوجنا ..
الثلاجات الحديثة كلها تريح روحها بروحها… مرات تسمعين صوت الماكينة مالها تكون تبرد ولما يكون لها صوت تكون تحافظ على درجة البرودة …. و بصراحة اختي اخوي بعد مهندس كهربا وما سمع بهالشي….
الشي الوحيد يقولونلك لما تكون الثلاجة يديدة خليها واقفة ترتاح ساعة او نص ساعة و بعدين اوصليها على التيار الكهربائي
واختي نحنا نسافر شهر و اكثر مرات وما نسكرها لو فيها اغراض بالفريزر "المجمدة يعني" و افضي الاغراض من تحت … يعني ما اخلي جبن و اكل لانه طبعا بيخرب لو المدرة طويلة وما حد اكله.
جزاكم الله كل خير الغاليات
ومنكم نستفيد