سوت لي مشكلة مقهورة منها

صارت لي مشكلة بسبب طليقة ريلي و ريلي عصب علي و كسر تلفوني بسببها. بخبركم السالفة و أتمنى تساعدوني.

أنا أستعمل بلاك بيري و مرت علي فترة توصل لي مسجات من رقم غريب بس ما كنت أهتم و لا خبرت ريلي. و عقب فترة يتني إضافة في البلاك بيري و تحريتها ربيعتي لأنها قالت لي أنها بتطلع بلاك بيري و هي تعرف الكود مالي و حتى نفس الإسم. أنا قبلت الإضافة و سولفت وياها و فجأة اكتشفت أنها مب ربيعتي و كانت ترمسني و تقولي أبي أتعرف عليج و أنا وحدة و أبيج تكونين صديقتي فأنا شكيت فطليقة زوجي لأن نفس الإسم بس استبعدت هالشي. تميت ساكتة ما سويت شي و اليوم الثاني ريلي اتصل بي و كان معصب و يصارخ علي يقولي كيف ترمسينها و تقبلين إضافتها و هاي تبي تسوي مشاكل و ياه بيتنا خذاني معاه في السيارة و صرخ علي و شل التلفون مالي و كسره. ما أبي أقولكم كيف هي حصلت الكود مالي و مب هامني هالشي بس مقهورة منها و ريلي عطاني تلفون يديد بدل اللي كسراه و اعتذر لي على اللي صار. الكود مالها عندي و من القهر اللي فيني أبي أضيفها عشان أتضارب وياها بس فنفس الوقت مابي تصير مشاكل نفس اللي صارت.

أنا مب عارفة هي ليش ضافتني و مب عارفة السبب اللي خلا ريلي يعصب علي أحس الموضوع ما يستاهل. الموضوع هذا صار تقريبا قبل أسبوع و أمس حاولت أفتح معاه السالفة تنرفز و قالي صكري الموضوع و لا تيبين اسم طليقتي لأن ما أحب أسمع أسمها.

أنا خايفة بصراحة قلبي مب مرتاح من الموضوع و أبي أعرف ليش ريلي عصب فيني وسواس أحس في سالفة كبيرة من ورا اللي صار بس ريلي ما يبغي تصير مشاكل فصكر السالفة.

أتمنى تفيدوني لأن الموضوع مضايجني بصراحة.

اللي محيرني في الموضوع كيف ريلي عرف سالفة الإضافة و عصب علي؟؟

و هي أصلا شو تبي فيني ليش تحاول تتواصل معاي و تضيفني عندها و تطرش مسجات.

ريلي من طلقها ماله علاقة فيها حتى رقم تلفونه مغيرنه عشان لا تحاول تسوي مشاكل.

و هو مرات يتواصل مع أخوها لأنهم ربع و يصيرون لبعض أصلا و بينهم طلعات و قهاوي و هسوالف. فيني وسواس أخاف هي و أخوها كانو يبون يسوون لي مشكلة بس ما أبي أظن السوء حرام إن بعض الظن إثم.

لا حول و لا قوة إلا بالله و الله مقهروة منها ودي أصفعها طراقات!!!!

سبحان الله وبحمده سبحان الله العظيم

سُبحانَ رَبِّيَ العليِّ الأَعلى الوَهّاب

الْحَمْدُ للهِ الَّذِي لَمْ يَتَّخِذْ وَلَداً ، وَلَمْ يَكُنْ لَهُ شَرِيكٌ فِي الْمُلْكِ ، وَلَمْ يَكُنْ لَهُ وَلِيٌّ مِنَ الذُّلِّ ، والله أكبرُ كبيراً ،
اللهُمّ إنّي أعُوذُ برِضاكَمِن سَخَطِك ، وبمُعافاتِك مِن عُقُوبتِك ، وأعُوذُ بكَ مِنكَ لا أُحصِي ثناءً عليكَ ، أنتَ كما أثنيتَ على نفسِك .

بما أن ريلج أربيع أخوها يمكن خذت رقمه من عنده و طرشت له مسج أنها ضافتج
لا توسوسين بس يمكن ريلج يخاف تسوئ مشاكل
و لا أدورين بالماضي لأنه شي و انتهى
و عيشي حياتج ويا ريلج و لا أدورين الشي اللي يضايجه عشان ما يضايج .. و اذا اضايج بينقلب هالشي ضدج و بتضايجين