ريوقنا بلاليط وخبز او فطاير بالهيل والشمر

وهاي صورته .. وطريقته الاغلب يعرفها وماشاءالله وايد خوات حطن طريقة البلاليط

وعقبها قلت خلني اسوي خبز وياه

المهم عينت العيينه .. ومقاديرها:
6 اكواب طحين
( وايد اعرف بس الطريقة ماخذتنها من امي .. وامي تقول ماعرف على اكوابكم .. وهي تستخدم علبة السميد الحمرا )

3 ملاعق خميرة فورية
2 ملعقتين ملح
ملعقة صغيرة هيل
ملعقتين حب الشمر .. وهاي صورته

3 اكواب ماي دافي
1 كوب زيت

الطريقة

تحطين كل المقادير ويا بعض وتعينييييين .. في البداية بتكون العييينه ناشفه بس انتي العبي وياها
وفريها يمين يسار وضربيها يمين ويسار وشوي شوي بطيعج وبتصير لينه حلوة

.. وخليتها وعقبها نشت ماماتي وقالت للبشاكير تعالن نظفن الحوي الخلفي

وانا سرت وياهم ولعب بالماي ووياهم .. ونااااااااااسه

وحليلهن استانسن جان اقولهم ترا عقب الماي لازم خم لوووول جان يعتفس ويهم خخخخ

الجو كان يجننننننننن الصبح .. والماي بارد حلو .. مب بارد وايد بس حلو

وانا انظف خست بالماي واتيييييييمدت من البرد

وتيمت انظف وياهم لين ماخلصنا وسرت بسرعه خذت لي شاور سريع عشان ادفي ريولي ولا بتم اصيح منها طول اليوم

وعقبها سويت الخبز … والتصوير سريع

هاي العيينه عقب ماتخمرت

تكورين العجينة وتضغطين بيدج عليها وتحطينها في صينية مدهونة

تحطين عليها بيض .. وسمسم … وها اختياري .. ممكن تدهنين بزيت بس او ترشين زعتر او الحبة السودا .. حسب شو تحبين او جان تبين اتنوعين

والبيض تحطين معاه زعفران او صبغة العيش .. شويه .. عشان يعطيه لون

جربت اسويه ع شكل صمووون

وهالشكل النهائي .. تاكلينه ويا كرافت وحليب .. لذيييييييذ

ملاحظة : تقدرين تحطين بدل الهيل والشمر زعتر ..يطلع لذيذ .. وتقدرين تحطين وياه سمسم محمص ويطلع بعد لذيذ .. يعني تقدرين تحطين الخلطة اللي تبينها .. واذا تبين اتنوعين

فيج تكورين كل عينه بنكهة معينة .. يعني تحطين الشمر او السمسم المحمص او الحبة الحمرا او الزعتر او الكمون او السماق او اللي تبونه .. ويطلع لكم بكذا طعم

واتمنى انه ريوقنا عيبكم .. ودعوه طيبة من كم تسعدني

وياريت تدعونلي انه ربي يرزقني الوظيفة الزينه

ملاحظة : اللي تبا تنقل عادي .. مسموحة ..