السلام عليكم خواتي
تذكرون موضوعي الي كتبته قبل عن العمر والتكيسات والدورة عندي تتاخر شهرين او شهر ونص ، وريلي انه ما كان مقتنع في مركز الاخصاب نسوي هالتجربة 
الحمد لله 
بعد ما خليت عمتي ام زوجي وخواته يكلمونه ويقنعونه بعد معاناة سنة من المحاولة وياه انه نروح المركز الي بتوام
واخيرا اقتنع هذاك الشهر ورحت للدكتورة نسا قالت لي اييها بعد 10 يوم من الدورة
المهم ييت وتقولي شكله التبويض راح وعندج سمك وايد في الرحم فما يصير ابدا نسوي لج لا تلقيح مجهري ولا اطفال الانابيب
قلت لها كيف دكتورة بتعرفين ايام التبويض انا من سنتين ما لاحظت ولا عرفت لان الدورة متلخبطه ابدا وتتاخر وايد فكيف بتعرفين مستحيل من عاشر يوم اذا الدوره تتاخر شهرين تقريبا
قالت لي نعرف من سمك الرحم وباين عندج راح تبويض وعندج سمك كبير
قلت لها كيف مب انتو تقولون انتم تسوون في المختبر وتحطون داخل الرحم شو دخل الحين سمك الرحم قالت عشان البويضة ما تقدر تعشش
داخل الرحم الي يكون سميك بتفشل الطريقة ولازم يكوم رحم رقيق وحجمه مناسب !
قلت لها ما والحيل الحين كيف ؟؟
زين يبت ريلي والحين كيف العلاج !
قالت تعالي ثاني مرة لمن تييج الدورة ؟! قلت لها يعني اصبر شهرين او شهر ونص تقريبا لين تييني !! الله يصبرني
ابا اعرف في بنات جي يصير لهم او حد حملت عادي اذا سوت تلقيح وحملت حتى لو سمك الرحم سميك
وشكرا خواتي
وادعولي ربي يسر لي الحمل فاقرب فرصة
الدكتور الشاطر يعرف يتعامل ويا هالاشياء يا بالابر او بالحبووب ..
لاني اعرف الدكتور هيومن الفطامي .. تعالج وياه وحده اعرفها
تلقيح مجهري من اول مره حملت .. كان عندها سمك بطانه الرحم وهرمون البروجسترون مرتفع ..
سبحان الله .. بعد سحب البويضات اخر الترجيع مده عشر ايام تقريبا لين خلى بطانة الرحم جاهزه للحمل
فانصحج تعالجين ويا دكتوره عندها خبره اكثر
اسالي الحريم ياللي تشوفينهن ف توام عن تجاربهن ويا الدكتوره
يمكن هالدكتوره ما عندها خبره كفايه
مشكورة أختي
وين هالدكتور ؟
إلى بتوم قسم الإخصاب معروفات 3 دكاتره حريم بس
مرحبا اختي
انا نفس معاناتج بالضبط ودوم يسون لي كحت لجدار الرحم والشهر الي عقبه يسون لي انابيب ويرجعون الاجنه
باول حملي وهذا ثاني حمل والحمدلله
اختي انا اتعالج بمركز فقيه في بوظبي عند دكتوره نجوان
وشي نفس هالمركز في العين فرع لهم
الله يرزقج بالذريه الصالحه انتي وكل من تتمنى يارب
حبيبتي بصراحة دكتورة نسا واااااااااايد تلف وتدور شكلهم بيقاعدونها وهي متكاسلة رغم انها شاطرة،، بس تيلس ادرب اليداد
قامت ترد الكل بدون علاج وتحاول تحرج الحرمة جدام ريلها ان وزنج زايد وعمرج يمر ويضيع وتضيعين بويضاتج ،، يعني ماله داعي هالاسلوب جدام الريال
المفروض تعطيج دوفستون عشان تنزل الدورة وترجعين لها 2 يوم من الدورة،، بس هي طرشتج بدون شي لا دوا ولا تاريخ
اتصلي توام مرة ثانية وكلميهم عن دكتورة نسا انها ما سوت شي ولا صرفت لج دوا
سيري صيدلية واشتري لج دوفاستون وابدي تاخذين عقب 20 يوم او متى ما انتي حابة المهم اقل شي 20 يوم من تاريخ دورتج اللي طافت
لو حابة اتريي عقب ما تعدين التاريخ اللي مفروض تي لج وسوي فحص حمل عشان تتاكدين ماشي حمل وعقب ابدي تاخذين دوفاستون لمدة 10 أيام مرتين في اليوم،، لان الدورة تنزل عليج عقب شهرين،، قصدي دورتج وااايد تتاخر
عقب عاشر يوم وقفي الحبوب واتريي دورتج ان شاء ما بتتاخر خلال 4 او 5 ايام بتنزل
المهم من تنزل اتصلي توام وخذي موعد
وبصراحة ما في داعي ريلج يروح معاج في موعدج الاول لانهم ما يحتاجونه،، بس جان بيسير وياج برايه
اول ما توصلين،، كلمي البنات في الريسبشن ان عندج موعد وما تبينه مع نسا،،
عندهم دكتورة اجنبية ناسية اسمها،، شاطرة وسريعة
وثانية عربية اعتقد عراقية يمكن بعد ناسية اسمها بس واااااايد تغيب ،، بس بصراحة شاطرة وطيوبة
ان شاء الله تترتب امورج وتحملين يا رب وتبشرينا
بالتوفيق
غناتي
شي كذا مكان غير توام تسيرين له شي عندج مركز فقيه للاخصاب في العين وعندج بعد مركز العين للاخصاب خلف كرومويل هذا المركز
وبصراحه انا اول مره سرت توأم وشفت دكتوره نسا بصراحه ردتني وحطمتني وطلعت من عندها وانا اصيح والله العظيم تعبت نفسيا وتميت فتره طويله مافكر اتعالج بس الحمدلله يوم سمعت عن مركز فقيه في بوظبي سرت وتعاملهم معاي بصراحه احلى بوايد من توام الدكتور والطاقم الطبي والممرضات بصراحه متعاونين والحمدلله تعالجت على طول وحملت من اول علاج رغم اني كنت واثقه اني مابحمل ولله الحمد ربيت ويبت ولد والحين ماشاءالله عمره سنه واربع شهور والحين انا بعد عدت التجربه وسويت للمره ثانيه انابيب ولله الحمد حملت بالثاني وربي يتمم على خير يارب ويثبته
اختي لا تيأسين ولا تروحين على كلام هالدكتوره سيري كذا مكان والحمدلله دولتنا وشيوخنا ربي يطول بعمارهم ماقصروا خلوا علاج العقم والحمل بالمراكز بالمجان يعني ماتدفعين الا للادويه الي بتاخذينها من الصيدليه برع وعقب الحمل ان شاءالله فتحي ملف بالحكومي وصرفي الادويه
وربي يرزقج بالذريه الصالحه انتي وكل من تتمنى
المشاركة الأصلية كتبت بواسطة r3boooba 
انا نفس معاناتج بالضبط ودوم يسون لي كحت لجدار الرحم والشهر الي عقبه يسون لي انابيب ويرجعون الاجنه
باول حملي وهذا ثاني حمل والحمدلله
اختي انا اتعالج بمركز فقيه في بوظبي عند دكتوره نجوان
وشي نفس هالمركز في العين فرع لهم
الله يرزقج بالذريه الصالحه انتي وكل من تتمنى يارب
ما شاء الله الله يبارك لج ويووفقج
مشكورة أختي