الوسم: الغالي

فترة الحمل الصراحة من أحلى الفترات الي الوحدة تمر فيها .. خصوصا اول حمل احسه احساس حلو وفرحة وفضوول فضيع .. ولو انه فيها تعب و تغييرات وايد تستوي نفسية و فالجسم بس والله وايد حلو..

المهم انا حاطه فبالي اول ما ادش الشهر التاسع بربي على كيفي تراه خخخخخخخ… ومر اول اسبوع من التاسع ما في شي يديد و مر الاسبوع الثاني ما في شي يديد… بس كانوا مخوفيني انه الماي حول الجنين قل وانا حسيت حركة البيبي قلة شوي و قالوا لي حجمه كبير شوي ولازم تولدين بسرعه واذا ما ولدتي هاليومين لازم تاخذين طلق ..

وانا ما عليه منهم طاف صح تضايجت كنت دايما اسير اسوي تخطيط للبيبي ومرات يكون زين ومرات يقولون مب وايد لازم تردين مرة ثانية وتسوين ..

وانا كنت امشي ما خليت لا بحر ولا بر و لا حديقة مشيت كل مكان بس ما كان مشيي بشكل يومي .. وكنت اركب الدرب وانزل منه وريلي و خواته ما قصروا يودوني و يمشوني بالغصب..

لييين يوم الاثنين اظني كان تاريخ 4/1/ الساعه 1 فالليل ريلي كان ماخذ اجازة ويالس عالكمبيوتر وانا طايحة عالشربية اسولف وياه ونشيت ابا اسير الحمام اول ما نشيت حست بريولي تعورني والم فظهري و مفاصلي جيه نفس آلام الدورة .. سرت الحمام شفت شوية دم و بطلت عيوني قلت استوت الخايسة اليوم بربي؟؟؟؟ وطلعت من الحمام وخبرت ريلي و زاغ فديته يقولي اوديج المستشفى اقوله لا ما احس بالم .. اذا زاد يصير خير

ورديت ارقد على اساس بنش اي وقت بسير المستشفى .. بس من نشيت الصبح للصلاة ما اشوف فيني ويع ولا شي و استمريت على هالحالة يوم الاثنين كله كنت احس الدم ينزل بس مب هالكثر شوي يعني .. سالت اختي وحرمة اخويه قالوا لي عادي هذا لا تسيرين يوم بتحسين بويع سيري المستشفى .. ويا الثلاثاء و نفس الحالة دم خفيف بس ماشي هذاك العوار كان عوار خفيف ايي و يسير

ويوم الاربعاء تاريخ 6/1/ قلت بسير المستشفى عالاقل اشوف اذا النفس فاتحة وكم؟؟ يوم سرت جيكت عليه الدكتورة قالت لي فاتح 1 سانتي و على قولتها هيجت لي الرحم على اساس يفتح بسرعه لانها تعرف بحالتي دوم اسير لهم عسب التخطيط .. وقالت لي انتي شوفي اليوم فالليل ولا باجر لازم بتين المستشفى عسب تربين ..

رديت البيت واحس بالالام تي وتسير بس آلام عادية اقدر اتحملها.. و مستانسة انه الرحم فتح عنددي… و عالعصر سايرة بيتي اليديد و اشوف الألم يزيد .. و ريلي يقولي فيج شي .. شي يعورج اقوله لا عادي و متحملة … رديت البيت و ريلي قال بيسير الصالة يتمرن.. ودشيت انا اسبح بماي دافي و طلعت سويت لي دلة زعتر و يلست اشرب فيها و آكل تمر و اشرب شوية عسل واحس بويع مادري ليش سبحان الله ياني احساس انه خلاص اليوم بتكون ولادتي .. وسرت اتمشى فحوي البيت سايرة رادة و الألم يزيد و الدموع تنزل من عيني مادري ليش امشي ويوم يزيد الويع اوقف مكاني وكل شوي ام ريلي وخواته يطمنون عليه لين رد ريلي من الصالة جيه عالساعه 9 قلت له اليوم بربي وتميت اتمشى و كل شوي حاشرة اختي وحرمة اخويه اسالهم لين استوت الساعه 11 ونص قلت خلاص ما ارم اتحمل .. خص انه هذا اول حمل لي .. و الماي حول البيبي كان ناقص فقلت احسن اسير لاني كنت حاسة خلاص بربي احس بالم تحت جنه شي بينزل ..

وسرنا انا و ريلي وامه و اخته .. طبعا ولادتي كانت فمستشفى القاسمي .. و يوم جيكت الدكتورة قالت فاتح 4 سانتي خلاص بتولد اليوم احس جنه حد جب ماي بارد عليه مادري ما كنت خايقة من الولادة لاني ما اعرف شو يترياني بس فيه رهبة..

بدلت ملابسي و كل ما يدخل ريلي عندي ما كنت اقدر اشوفه مادري ليش في هاللحظة كنت اباه وياية وفنفس الوقت احس جيه بصيح يوم اشوفه ويلس يسولف وياية لين يت النيرس وقالت له خلاص اطلع ..عطتني المسهل الي يمشي البطن و نظف لي بطني و عقب قالوا لي قومي امشي كانت الساعه 12 فاليل قالوا احتمال تربي الساعه 3 ولا الساعه 6 الفجر لانها بجر.. عقب ودعني ريلي لانه ما يقدر يدخل فقلت له سير البيت بدال ما يتريا برع عالفاضي لانه امه واخته كانوا وياية داخل… و كنت مرمسة خواتي اني فالمستشفى وبربي بس قلت لهم لا تخلون اماية تي لانها فديتها تعبانة كانت طول اليوم يالسة فالسوق لانه بالباجر خطوبة اختي ووصلت البيت الساعه 12 فاليل..

و يلست امشي فقسم الولادة وامشي من 12 لين 2 احس بآلام تي وتسير و اشوف فغرف الولادة الحريم يربن ما شاء الله 10 دقايق ولا ربع ساعه بالكثير ويربن استانست قلت ان شاء الله انا شراتهم واشوفهم يمسكون البيبي و يبشرون اهلهم والله شي حلووو ..و كملت مشي بس كيس الماي ما تبطل عليه .. و شوي الا اشوف اماية فديتها وحرمة ابوية يايين عندي اسميني ارتتتتحت من شفت اماية صح كنت اقول لا تخلونها تي لانها تعبانة بس كنت فنفس الوقت اباها .. وهي قالت كيف ما ايي ولادة بنتي ويابت لي شاي حار قالت لي اشربي زين تشربين شي حار..

عقب عالساعه 2 يتني الدكتورة وقالوا لي خلاص تعالي انسدحي بنبطل كيس الماي عنج.. وجيكت النفس قالت فاتح 5 سانتي .. حطولي اكسجين و بطلت كيس الماي وهذا كله فغرفة ما قبل الولادة .. وافففففففففففف هنيه بدأ الجد .. بدأ الويع يزيد عليه ومب متحملة واحس ببرودة وجسمي يرجف لحفوني بلحافين.. ويابوا لي اكسجين .. واحس عظامي تعورني ويلست اماية تهمزني واقولها اقوى اقوى متفيجة خخخخخخخخ…

وكل ما زاد الويع اشفط من الاكسجين والله طول الوقت استغفر واستغفر لو شو ما سويت احس ما بيفيد .. ادعي ربي واستغفر واستسمح من اماية يا الله كيف تعبن امهاتنا علينا ما تحسين بهذا الشيء الا فوقت الولادة..

يت الدكتورة تقولي بجيك .. اقولها جيكي قالت لي فاتح 7 سانتي عالساعه 3 قلت الحمدلله و الويع يزيد ويزيد وانا احسني مدووووخة من اشفط الاكسجين وادعي و استغفر حسيت اني بموووت خلاص .. و النيرس مسكينة كل شوي اطالعني و تهمزني شوي.. عقب عالساعه 4 قالت بجيك و يوم جيكت قالت 9 سانتي ولادة؟؟؟؟

تقولي الدكتورة قومي امشي لغرفة الولادة واانا موووول مب رايمة و شلوني فكرسي ومن وصلت غرفة الولادة قالوا لي سيري الحمام وسرت وعقب حطوني عالشبرية و اشوف الطلق يزيد و الويع يزيد اخخخخخخخ احاول اني ما اصارخ لانه ما شاء الله الي ربن قبلي مول ما سمعت لهن حس و سالت الدكتورة متى بربي قالت الحين 4 يمكن عقب نص ساعة ولا ساعة… و النيرسات يسولفون وياية وانا مب متفيجة اقولهم سوولي اي شي ساعدوني سوولي شفط .. يقولون لي لا بتربين طبيعي بدون شي .. استوت 4 ونص ولا ربيت و من يزيد الويع اصارخ ازقر الدكتورة و ايوني ركض يقولون لي من تحسين بويع سوي بوووش .. ومن يزيد الويع اسوي بووووش 3 مرات وما يطلع شي .. تميت على هالحالة و اسوي بوش وعقب ما تحملت اسوي بوش المرة الاولى و الثانية و الثالثة تطلع صرررخة قوية واماية وحرمة ابوية وام ريلي كلهم اييون ركض لغرفة الولادة و النيرسات يروغونهم ..

حسيت ماشي فايدة من البوووش استسلمت قلت برايه البيبي يتم فبطني ماقدر اطلعه ومن اييني الويع ارد اسوي بوش لين يووا الدكتورة و نيرسات ثنتين وحدة مسكت ريلي اليمين و الثانية ريلي اليسار و الدكتورة جدامي تبا تشق ماسكة المقص و انا غمضت عيوني ما حسيت بشووا يسوون لي غير آلام الطلق فظهري فضيييعة وفبطني و اسوي بوش و هم حاشريني فوق راسي شدي شدي يا الله شدي فجاة الساعه 5:25 الفجر بتاريخ 7/1/ حسيت شي سبحان الله مادري كيف شي انزلق وحسيت جيه بالحبل السري يا الله لك الحمد والشكر ..

وين كل هذاك الويع و الموت الي كنت احس فيييه كله اختفى من طلع حمودي فديته .. وانا اشوفه جيه محطينه جدامي عالشبرية و الدكتورة تنفخ عليه شوي مزرق كان … لين صاح وكان جسمة ابييييض مادري قالوا لي لانه الماي شوي فيلست تنظفة وما حطوه على صدري اول ما طاح مثل ما قالن البنات كلهن بس اشوفه جدامي وربعت النيرس عند الباب تقولهم مبروووووك ولد ولد ويوا ركيييض لغرفة الولادة وغطوني .. عقب الدكتورة قالت بنطلع المشيمة و الله زغت من كلام البنات انها تعور اكثر عن الولادة و يمكن ربع ساعه لين تطلع بالعكس آلام خفيفة مب شرات الولادة و فاقل من 5 دقايق طلعت .. وانا اشوفهم من بعيد ياخذون وزنة و طولة و لحفوه ويابوه عندي فديييت روحه قالوا لي رضعيه وخلوه عندي والله لحظات حلوة و التعب كله يختفي من تشوفين ضناج جدامج بخير الحمدلله و الشكر…ويت الدكتورة و خاطتني كانت تعور بس سبحان الله كل هاييج الآلام يوم ابا اتذكرها الحين ماقدر اتخيلها كيف كانت..
والي تعبني فوقت الولادة حجمه البيبي كان كبير شوي ..

والله كم يسوى يوم تشوفين الفرحة فعيون ريلج و اهلج بييت البيبي.. و الفرحة كانت فرحتين ولادتي بحمودي و خطوبة اختي فنفس اليوم..محد غمضني غير اماية الي طلعت من المستشفى لتجهيزات الخطوبة بس الحمدلله كانت خطوبة رياييل بس..