بسم الله الرحمن الرحيم
السلام عليكم و رحمة الله و بركاته
بدون مقدمات نبدي بالموضوع ع طول
الريل:
الريال يتمنى من زوجته
تجهز الريوق كل يوم الصبح و تقومه قبل الدوام بنص ساعة يتريق و يتلبس و هي واقفة بالمدخن لين يجهز و يتبخر و يطلع
يرجع من الدوام تعبان
طبعا الغدا جاهز يتغدى و يدخل يريح و الحرمة تغدي العيال و تنومهم بعيد عن ابوهم لانه تعبان
العصر يطلع مع ربعه و يقضي مشاويره و هواياته و يرجع بالليل مع ربطة خبز و يحصل العشا جاهز يتعشى و طبعا المدام منومه اليهال و متجهزة له بالغرفة مع جو شاعري حلو.
طبعا هذا من غير اللبس و الكشخة و البخور و صبغات الشعر و الحنا ع الايد و الريول و ما الى ذلك من لوازم كشخة الحريم
بالمختصر يبغيها:
طباخة ماهرة و ام حنونة و ربة منزل ممتازة و مدبرة منزل مقتصدة بالمصاريف و بيتوتية من حيث الطلعات.
البنت لما تزوج:
تتمنى شهر العسل يكون في بلد واااااو روعة وو الريل مخباه مثل مكينة الصراف الالي و هي تاخذ اللي نفسها فيه
ترجع البلاد كل ويكند طلعة و عشا برا
و بعد الحمل و العيال يساعدها باليهال من لبس و حفاظات و حليب و مجابل قبل النوم و شغل البيت بعد ما عندها مانع لو ساعدها بالطبخ او غسل الهدوم
هدايا ملابس و عطور و عبي و ما الى ذلك و يا حبذا لو يكون ذوقه راقي ومناسب للموضة من قصات العبي و الالوان و ما الى ذلك.
العمة لما تزوج ولدها:
تحب مرت ولدها من البداية و تغار منها بنفس الوقت
تحب تكون هي الامر الناهي على ولدها و حرمته لانها ماربته من هوه صغير و كبرته و سوته ريال عشان تاخذه الحرمة ع البارد المبرد و تروح الفلوس و الرواتب و الزيادات و الدلع و الطلعات لها و الام المسكينة يالسة في البيت تقطع بصل و ثوم عشان تسوي لهم غدا و عشا لان طباخ الحرمة مب لين هناك و الام معودة ولدها ع الاكل الغاوي و ثيابه و لبسه جاهز لين باب غرفته <<< أي باب غرفته ،،،، إلا اغراضه كلها بالكبت و جاهزة بعد
فتتمنى من حرمة ولدها انها تكون طباخة وقت الاكل، و وقت المناسبات تاخذ لها هدايا، و اذا كانت العمة معصبة لازم مرت ولدها تهديها و ما تزعل من كلامها الجارح.
ولازم مرت الولد تكون حنونه ع عمتها تقعد معاها اربع و عشرين ساعة و تسليها و تونسها و تسولف معاها عن سوالف سنة الغرقة و ما إلى ذلك
و تطلع معاها بالعزايم و الاعراس و هي اللي توجبها و تدفع الشوفات بالعروس لانه الناس لما دفعو الشوفات لها في عرس ولدها عشان تكمل مصاريف عرس المحروسة اصلاً الفلوس راحت للمعرس و العروس مب للام.
و يا حبذا لو كل يوم تحبها ع راسها في الطالعة و النازلة و اذا حبت تطلع مع ريلها يتمشون ما فيها شي لو تعزم عمتها و حمياتها !!! ليش يعني هم ما يبون يشمون هوا مثلا !!!
و بالنسبة للحميات
يبون مرت اخوهم قريبة منهم يحبنها و تحبهم مثل الخوات بالضبط و تدلعهم بعد من الدلع اللي تحصله من ريلها اللي هوه اخوهم اصلاً.
يعني لو اشترت ثياب ، تاخذ لهن معاها قطعة وحدة…
و اذا ريلها عزمها ع طلعة ، تخبرهن ما تطلع بروحها من باب الملحق اللي ورا بالشردة عشان محد يحس فيها… يعني خلج كووول معاهم
و روحي معاهم العزايم و الاعراس و طقمي معاهم باللبس و العبي عادي حلوة الحركة…
و قعدي معاهم بالبيت بالصالة و غرفهم ، لو مالهم بارض يطلعن بالصالة روحي لهم غرفهن و لو حسيتي عمرج مرتزة عليهن عادي خلج كووول و ردي غرفتج ما فيها شي
و المطبخ و طبخي لهم من اكلاتج الحلوة و سلفيهن فساتينج و اكسسواراتج و العبي بعد يعني ساعديهم ع كل شي و كوني معاهم مثل اختهم يعني لو دخلتي على اختج و هي نايمة عادي تصبين عليها كوب ماي عشان نتش تستشور لج شعرج قبل ما يوصل ريلج >>> عـــــــــــــادي خلج كوووووول
و اذا وحدة منهم بمشكلة ساعديها و كتمي اسرارها
و اذا طلعتي و يييا ريلج ما يمنع انج تاخذي لهن هدايا من وقت لاخر عطور ملابس عبي و ما إلى ذلك…حتى لو روج او كحل بيستانسن عليج وايد و بتحبيهم بدون ما تحسين…
الحرمة و بيت اهلها
الام تقول لبنتها اذا ريلج محد لا تمين بروحج هناك و تنامين بروحج بالملحق تعالي عندنا لين يرجع ريلج من الدوام او السفر و خواتهها يقولن لها يالله امس طلعتي مع ريلج و شالة حمياتج يالله شلينا وياج…
الحرمة و حمياتها
تباهن دوم يمدحنها و يمدحن ثيابها و طبخها و ذوقها في كل شي من لبس و اكل و ترتيب و اثاث و كل شي
و اذا يات بتطلع مع ريلها و عزمتهن ع الطلعة،،، ما يتناقزن قدامها موافقات ع العرض !!! لا لا لا يعتذرن بلطف عن المرزة… و انتي راة مم برع ييبي لهن شي يفرحهن حتى لو قوطي اسكريم باسكن و الا وجبة من ماكدونلز <<< يعني أي شي
و بعد شووووووه
اللحين بنيي للمشاكل
تقول انا طيبة و ع نياتي و كله بروحي بغرفتي و كافيه خيري شري و مالي خص بحد حتى الاكل اكل بروحي ما متعودة اكل مع رياييل خاصة انه بيتهم كله شباب…
و بعد ما عايبنهم
حتى الطلعة اللي اطلعها مع ريلي بروحنا حاسديني عليها
هذا من غير التنغيز بالكلام من عمتي و حمياتي اني خذت ولدهم منهم و اني قاصة عليه و مخليتنه مثل الخاتم بايدي…
والله ما مخليني بحالي
العمة تقول: ما ادري شو فيها كله بروحها … أكلها قعداتها تلفزيونها بروحها …
حتى الاكل الشغالة توديه لها بالغرفة و ثيابها مغسولة مكوية و مجهزة لها عند باب الغرفة
ما عايبنها تزن ع راس ولدي طلعني بيت بروحي…
غرفتها أكبر غرفة بالبيت و فيها صالة و حمام و ديكور من اروع ما يكون و غرفة نوم من الغالي و تلفزيون و قنوات ع كيفها و نت شغال اربع و عشرين ساعة…
وحليله ولدي دفع دم قلبه ع الغرفة (أو الملحق – ع حسب)
ثيابها مغسولة مكوية لين باب غرفتها و الطباخ احنا نسوية … ولدي المسكين يرجع من الدوام يبا ياكل لقمة
تزااعج ع الشغالة يبي غدا لين بابا حتى ما تتنزل تروح بروحها المطبخ… تخاف تعلق فيها ريحة المطبخ!!! شو هالدلع…
فوق كل هذا ما عايبنها و كل يوم تزن ع راسه قوم طلعني بيت روحي…
الحميات…
والله انه اخوييي مدلعنها دلع احنا ما حصلناه مع انه اخونا لكن الطلعات كله حقها و الهدايا كله حقها و ما عيبنها
الاخت ما تتنزل تلبس شراتنها لازم اخوي يوديها المول الفلاني تاخذ بروحها ما تبانا ناخذ شراتها ما ادري على شوه شايفة عمرهاانتو اقروا و احكموا ع الكلام
هذي المواقف وايد منها
انتي مريتي بها و أنا مريت بها بشكل من الاشكال…
و كلنا بنمر فيه بالمستقبل و الشاطر اللي يعرف يتصرف
هذا من خبرتي في الحياة
و انتو شو خبراتكم
اترك لكم باب التعليق ع الموضوع مفتوح
أم محمد
المشاركة الأصلية كتبت بواسطة زم_قمر_ان 
