ياني اكتئاب رغم انيه كنت فرحانه

من اسبوعين اتصلت حرمه في امايه ، عسب انها تخطبنيه لولدها

وحددت لامايه انهم بييون رسمي عقب ماتخلص ختيه من الاربعين

المهم خواني استغلوا الوقت هذا كله في السؤال عن الريال واخلاقه

حتى انه اخوي ليش انه عنده صلاحيه جيّك ع ملف الريال اذا كان عليه

قضيه او جنحه او مطلوب الخ المهم كل النتايج كانت ايجابيه وماطلع

عليه شي والناس

تمدح اخلاقه يعني طلع محترم ، انا في البدايه كنت ماخذه الامور كلها لعب

ومصخره وضحك ويوم جد الجد ، صرت احس عمريه ماليه نفس على ييتهم

واحس اني مضايجه ومكتئبه وايد ،ومايه نفس آكل ولا ليه نفس اسولف عند حد

يعني خايفه اييون وافرح ع الفاضي ومايتم شي

وبعدين صرت اختصر على عمريه عسب ما افكر ارقد طووووول اليوم بس وقت

الصلوات انش

وارجع ارقد مر ثانيه

ووايد استخرت مرات ارتاح عقب الاستخاره ومرات اقول لا ما بوافق

المهم كان وزني 50 اليوم انصدمت اشوفه 45 ،،

الكل في البيت ملاحظ هالشي حتى اخويه قالي اذا ماتبين الريال نحن ماراح نغصبج واذا تبينه ماراح

نوقف في دربج لاننا سألنا بما فيه الكفايه عنه

بس هو ما يعرف انه سبب ضيجي خوفي من انه الموضوع مايتم اويتم ويفشل الزواج

ماعرف كيف اعبر لهم احسهم بس فرحانين وعادي عندهم جنّه الموضوع تم مب خايفين

من هاه كله ليش انا الوحيده اللي خايفه ما

اعرف

حتى اليوم اخت الريال متصله في ختيه اتقوولها نحن مب يايين نخطب يايين نتفق ع العرس والملجه

اختي عقب ماسكرت عنها قالت ليه نشي عسب انجوف شو بنسوي حق ييتهم وشو بتلبسين لانه هيه

اتعرف في الموضه والازياء وجيه هذا شغلها قالت لي شرايج نظهر انا وياج نتسوق وناخذ لج اللي

تبينه وجيه

قلتلها مالي خاطر ابد ابد على شي احس انيه بختنق مب عارفه ليش وشو الفايده نتشرا ونزهب اخر

شي مايتم او يصير شي يتكنسل الموضوع بعدين بكره كل اللي اشتريته

استغربت ف قالت لي نفس رمسة اخويه لاتغصبين نفسج ع شي ماتبينه وخذي راحتج في التفكير ومن

هالرمسه بس انا حاسه بضغط نفسي فضيع

هب قادره افكر ماعرف انا شوو اللي ابغيه متلخبطه مرات ابا الموضوع ومرات اكره حتى التفكير فيه

نظرتيه للموضوع صارت كئيبه

وكل ما تتصلبي وحده من ربيعاتيه اقولهم قولولها محد نايمه طالعه مسافره اي شي اهم شي مارمس

حد رغم اني قبل اتهاوش ليش انه تلفون البيت دوووم مشغوول ويا ربيعاتيه (ترا ماعنديه موبايل ممنوع)

واللي مخوفني اكثر ممنوع ارمسه اذا تمت الملجه وممنوع اجوفه لو دقايق خويه يقول مب من سلومنا

يعني كيف برتاح .. احس الموضوع كله مخربط

شسوووووي شوووو تنصحونيه .. ملّيت

مع العلم انه عمريه 18سنه وفي عايلتنا كل خواتيه عرسن في هالعمر واصغر بعد