السلام عليكم بنات وعرايس وغيره فديتكن..
عندي استفسارات واتمنى تساعدني دخيلكن.. عرسي اول شهر 11 وماسويت شي ومهري 150 مع الذهب ومتوتره ابا أجر فستان وابا اسوي جدول للزهبة وابا اهتم بعمري وجسمي..
بنات العين منو تعرف صالون تنظيف بشرة وخبرة لان بشرتيه معالجتنها عن الحب وابا بعد صالون للحمام المغربي وصبغةرشعر وكيراتين..!
بعد لبنات العين ابا وحده اوخياط يسوي شيفونات حلوه وسعره حلو ..!
والسموحة ثقلت عليكن اتمنى تساعدني وماتهملن طلبية…
الله ييسر لك امورك امين
الله يوفق الجميع..
وينكن يا بنات ردن عليه….
صالون الزفة
و صالون فكتوريا
وصالون بتافيا
الله يتمملك على خير
بخصوص جدول الزهبه
اول شي شوفي نفسج انتي بتسكنين ويا اهل ريلج ولا بروحج
ومن هني ابدي واكتبي اللي تبينه
مثلا لو ويا اهل ريلج ، كثري المخاوير والجلاليب
واذا بروحج ف لاتكثرين لانه بتقردين تلبسين فساتين ودرسات واشيا جي دلع
والمخاوير يوم حد بييج وجي وطبعا لازم شيل البيت
وعقب شوفي كم عباه تحتاجين وشيل
وصح لا تنسين الذهب ولو تكثرين منه احسن لانه بينفعج وبيتم وتقدرين تبيعينه
وعقب عليج بالجايم والقمصان النوم والملابس الداخليه مالشلح والصراويل
قمصان النوم لا تكثرين منهن لانه بتملين منهن بسرعه والبجايم عادي ينلبسن اكثر من القمصان النوم
عندج النعول والشنط وطبعا لا تكثرين لانه عقب العرس بيتاخذين
العطور والدخون واللوشنات
المكاين ؛ السشوار ومكينه براون
اغراض الجمعيه ؛
المكياج والمناكير
اكسسوارات خفيفه + الساعات
وشو بعد اممممم هاللي يا في بالي
ودوري فالقسم بتلقين مواضيع عن الزهبه
وترى احس ماشي وقت ، من عقب العيد سيري الخيايط لانه يبالهم وقت لين يفصلون
واحجزي الفستان والماكيره وطقم حق العرس لا تنسينه
وابدي تهتمين ف نفسج
شوفي شو الاشيا اللي تبين تعتنين فيها
والله يوفقج
فـي مـواضيـع فـي القسـم بتٍـسـاعدج فـي تقسيـم الزهبـة
شوفيهـم و ان شـاء الله تستفيـديـن منهـم