بنات انا عرسي بعد اسبوعين وخواتي كلهن حوامل و بيربن وما عندي حد ينصحني فممكن حد يقولي شو آخذ وياي ليلة العرس علما اني بسافر بالباجر على لمغرب فشو آخذ وياي كم عدد قمصان النوم آخذ وياي ( علما بأنه الدورة بتيني بعد 5 أيام من العرس) وبسافر ماليزيا ؟؟؟؟؟؟؟؟؟؟؟؟؟؟؟؟؟؟
الاغراض اللي تاخذينها معاج
حاولي تاخذين ملابس داخلية بمعدل طقم لكل يوم و زيدي عليهم 3 او 4 لانه ساعات تحتاجين انج تسبحين اكثر من مرة في اليوم لانه جو البلاد اللي بتروحيلها شوي حار يعني بتعرقين
و نصيحة خذي الاكياس الشفافة من السوبر ماركت اللي تتسكر من فوق و حطي كل طقم بروحه بعد ما تعطرينه و اتدخنينه لانه بيكون اسهل عليج (طبعا لا تنسين اتطلعين منه الهوا يعني يكون الكيس مضغوط).
بالنسبة لقمصان النوم سوي نفس الطريقة و نفس العدد و نوعي لا تقولين عروس و كله تاخذين اشيا صغيرة و قصيرة (يعني بس بيبي دول) لا خذي بجامتين طوال (بنطلون و قميص) و بجامتين قصار (شورت و فانيله) و الباقي على ذوقج لانه بتيج فترة بتحسين انج مليتي من البيبي دول و تبين تغيرين. و لازم تاخذين معاج 3-4 غيارات للدورة عشان ما تتلعوزين
الملابس: يعتمد عليج انتي شو تلبسين في السفر بس حاولي ثيابج تكون خفيفة لانج بتحرين
لا تاخذين كعب عليج بجوتي رياضة حلو لانج وايد بتمشين و لاتنسين تاخذين دلاغات.
اخذي معاج بس عدد 2 حقيبة يد وحدة سودا ووحدة جينز مثلا و يكونن متوسطات الحجم عشان بتحتاجين تحطين فيهم وايد اشيا مثل مناديل معطرة و لبان و عطر صغير و اغراضج الخاصة و نظارتج الشمسية.
لاتاخذين معاج ذهب غير قلب و حلق صغير و دبلتج و ساعتج (ممكن تاخذين ذهبي و فضي للتغيير)
شامبو و بلسم
مناديل ديتول
كيرفري و كوتكس
فرشاة و معجون
سشوار
مشط
شباصات
سجادة صلاة و شيلة مال البيت
فوطة سبوح ووحدة للوجه
كرم معطر للجسم
مزيل العرق
لا تنسين كريماتج الاساسية مال الوجه اذا كنتي تستخدمين
اخذي معاج كريم خذيه من الصيدلية اسمه كنستين لانه يمكن تحسين بحكة في المنطقة الحساسة و هذا بيساعدج
اذا ما كنتي تلبسين عباة في السفر انصحج بالبناطلين الواسعة و القمصان الطويلة اسرع في الحركة لانه التنانير تلعوز شوي
و طبعا الاسكارفات الملونة و حاولي انج تاخذين كم واحد يمشون مع معظم ثيابج
حاولي شنطتج ما تكون ثجيلة لانج طبيعي بتتشرين من هناك
و اخر شي خذي معاج عطر واحد بس و مضرب دهن عود و مضرب مسك ابيض سائل من عند القرشي و اذا سألتيني ليش عطر واحد بقول لج عشان يوم بتردين من السفر و عقب فترة بتتعطرين من نفس العطر ريلج يوم بيشمه بيتذكر شهر العسل و لحظاته الحلوة
ان شا الله ما اكون نسيت شي
موفقة
أخت mannawee ما قصرت جزاها الله خير وفت وكفت
THANK YOU VERYYYYYYYYYYYYYY MUCH mannawee
عسى الله يسهل لج حياتج يارب ويرزقج الخير من كل صوب
تسلمون خواتي
و للاضافة لا تنسين اهم شي
قميص نوم ليلة الدخلة و زيادة واحد احتياط و لبسج مال الصباحية
و اذا بتزورين اهلج قبل السفر نزلي هالاغراض عندهم لانج ما بتحتاجينهم
جزاك الله الف خير اختي mannawee
والله ما قصرتي
والله يحقق لج كل ما تتمنين يارب
mannawee ما قصرت نفعتينا كلنا، أنا عندي اضافات بسيطة
كاميرا ديجيتال ( انتي او هو واحد منكم يآخذ )
مقص أظافر ومسحل ( مبرد)
bandaid لصق للجروح لا قدر الله تقطعت الريل او صار جرح بسيط
مناديل مزيلة للمكياج
كريم واقي من الشمس
بودره معطره للجسم ويا كريمها
مكينة نزع الشعر للطوارئ، ما اعرف كم يوم بتيسلسن هناك ( اذا انتي من النوع اللي ينبت الشعر بسرعه)
غسول الوجه أو الصابون اللي تستخدمينه
خيط الأسنان
عدة المكياج ولا تكثرين
الملابس الداخلية للدورة خذي القطنية، وبتحتايين اتغيرين، مع الأطقم زيدي القطنيات بعد
فلوس – ريجلج بيعطيج و هو بيدفع عنج، بس خذي وياج فلوس او بطاقة الفيزا احتياطا يمكن في خاطرج شيء او تبين هدايا لحد
خليه هو يدفع، بس لا تخسرينه
والله يوفقج ويسعدج
ويوفقنا جميع
أنا عرسي آخر ثمانيه وحاسه من الحين ضايعه، الله يستر
اللهم تمم أمورنا على كل خير، ووفقنا لما تحبه وترضاه، وسخر قلوب أزواجنا