الجزء الثاني .زواجي الثاني اوافق او لا ؟

اليديد فالموضوع
صليت استخارة كذا مرة و كل مرة ارتاح للزواج اكثر عن اللي قبله
المهم اشترطت اني اسمع الموافقه من زوجته و عمه قال لي من حقج و انا اللي بخليها تكلمج من دون علم الريال عسب تتاكدين بس و استغرب من الشرط و قال نحن اقل واحد عندنا عنده حرمتين و البنت امها الثالثة بس بعد من حقج و ابوي عطاه رقمي و فعلا بعد 3 ايام اتصلت بي حرمته و قالت لي انا زوجة فلان انا هني حسيت بماي حار ف جسمي سلمت و حسيتها هادية و انا كنت ساكته فالبداية كنت متخربطه مب عارفه شو اقول لها هي قالت لي مبروك الخطبة ما قدرت ارد عليها ضحكت و قالت شوفي انا اكيد بزعل و بشل بخاطري كمن يوم بس عقب خلاص بمشي حياتي عادي و هو خبركم بانه يدوام ف بوظبي يعني طول الاسبوع عندج و الاجازة عندي يعني بالنسبة لي ما بيتغير شي علي و هو قال لي تعالي بوظبي كمن مرة بس انا مااقدر اهد اهلي و جي بعد احسن لج و لي و تمت تتكلم ف امور الدين و انا مستغربة منها و
سالتها انتي زوجته اكيد ؟؟؟
ضحكت و قالت لي هيه و الله انا فلانه (اسمها و اسمي واحد) و قلت لها انا بعد اسمي …
انا قلت خلني اشل المستحى من الحين احسن
قلت لها انتي كيف جي موافقه و عادي عندج انا مستغربة منج بصراحه ؟؟
قالت لي شوفي قيسي الموضوع بالعقل انتي في عمره و انا اكبر عنه 4 سنوات و انا كنت اختيار اهله و ما قدر يرد وصية عمي المرحوم و وافقت بس انا كنت عارفه من اول يوم اني مش في باله و الدليل نقل لدوامه بعد زواجنا ب 4 شهور يعني كنت عارفه انه بيزوج فالنهاية و كل ما يكلمني عن الزواج انا اكون عادية معاه و اقول له الشرع محلل لك 4 و اذا تبي انا بخطب لك رد اكثر من مرة جدامي و جدام اهله اذا بتزوج الثانية ابيها من اختياري و الحين انتي من اختياره و نحن الاثنتين زوجاته و بالحلال ليش ارفض و عقب يروح بالحرام اول شي انا اتاثم فيه و ثاني شي بيتي يخترب و انا مش غير عن امي تراها الثالثه و عايشه و ابوي ابد مش مقصر مع امي و الثانيات
بس انا ابي اطلب منج طلب
قلت لها تفضلي
قالت عمي قال لي انج تطلقتي عسب اليهال صح قلت لها هيه قالت لي منحقج محد يلومج و ان شاء الله بتزوجين و بتيبين درزن و انا ضحكت قالت انا عندي بنت منه خليها مثل بنتج يعني قدري اذا بغته في نص الاسبوع لانها مرات تصيح تباه ف اييها و مرات يوديها بوظبي و تبات معاه يوم و ترجع يعني لا تتضايجين من وجودها قلت لها انا بكر ابويه و انا غاليته و اعرف كيف البنت لما تتعلق في ابوها و بالعكس دامه هو يباها ماحد يقدر يخرب اي شي و قلت لها انا طلبت رايج فالموضوع و تقريبا رايج وصلني و ان شاء الله من صوبي ما بيوصلج اي شي انا ماحب المشاكل و عسب جي رفضته اول مرة بس لما يي ثاني مرة مع عمه هني فكرت فالموضوع و قلت لها حتى يمكن ما تشوفيني الا نادرا قالت لي لا ان شاء اله بتيين عندنا فالاجازات وياه و مرحبا بج و عدي تراج زوجته
و اللي خلاني افكر اكثر و اكثر
عمج قال اقل واحد عندكم متزوج له ثنتين قالت صح نحن عايلتنا كبيرة
المهم لين هني و انتهى النقاش و طرشت لي مسج اذا مافي احراج بحضر يوم الملجة ؟؟؟!!!! امه بتحضر

انا خذت اكثر من ساعه اقرى المسج و ارجع اقراه مرة ثانية
و رديت عليها حياج اختي اكيد

و باذن الله بالخميس الملجه و بعد شهرين العرس