الحمدلله بداية الحل .زوجي كان يلعب بالفلوس

تكلمت عن مشكلتي مع زوجي ما يمسك ايده بالصرف

وديونه وايد وما يعطيني مصروف للبيت بحجة هالديون

والبنات ماقصروا بالردود

وانا ذكرت اني بديت اشيل ايدي من مصروف البيت بالتدريج

والحمدلله اللي فادني انه باجازه وقاعد بالبيت ويشوف كل شوي الطلبات اللي علي راسي

صار قبل لايرجع بالليل اتصل عليه واقول له يا بوفلان ترا ناقصنا الاغراض الفلانيه

وماعنده مجال يقول لي باجر اشتري انتي لاني خلاص سلمته السياره والمفاتيح ما

مابسوووووق ولا بصدع براسي خصوصا اني حامل

والله ان الثلاجه صفرت مافيها شي وماجلة البيت خلصت

بالعمد سويت لهم البارحه عدس واليوم باميه وتوه العشا عيش ورووووب

واليهال يتحرطمون وكل ما طلبوا شي قلت لهم روحوا لابوكم

حتي ولدي العود اليوم ما رضا يتغدا قعد يصيح يقول ابي صالونة لحم

وشفت ابوه متأثر ومفتشل

وانا طااااااااااااف لاتقولون قاسيه وما اقدر سنين وسنين وانا اصرف

وبالعمد المغرب قعدت اسوي روحي احسب بورقه وقلم واكتب مصاريفنا كل شهر وكم

ينصرف من راتبي وخليت الورقه اوني نسيتها بالصاله

مع انه عارف من قبل اني اصرف بس حبيت يحس انها نغزه

المهم مابطول عليكم لما شاف المبلغ اللي احطه عوود قال لي بروحه ومن نفسه

ذكريني كل اول شهر اعطيج مصروووف يعني بيشيل عني نص المبلغ النص عليه والنص علي

هذه الخطوه الاولي والحمدلله

انا ادري ان بروحه متأزم علشان ديونه وهو يشتغل باماره ثانيه ومشروعه هالفتره

خسران

بس يتم هو الريال وملزوم بالصرف حتي لو يقصر علي عمره

والله اني اقتنعت بكلام البنات اللي يقولون ترا الريال اذا ما علمتيه يصرف عليج

بيروح يدور علي حرمة يصرف عليها ويحس برجولته

والحمدلله علي كل حال

*

خصوصا البنات اللي ساعدوني بالموضوع الاول

ولله الحمد كان المنتدي متنفس لي بهالمشكله

ما كنت اقدر اكلم اهلي او اهله بالموضووع

مهما كان هذا زوجي بو عيالي والبيوت اسرار